新鋪未開張，王敏德已經著住自家品牌 T恤落新鋪，充當生招牌。
探熱針
生意經 王敏德開檔搵男人錢
影齡近卅年，由飛虎隊做到警司再在荷李活電影《變形金剛 4》做埋警務處長的王敏德，拍戲已成玩票，正職從商。最近又有新搞作！經兩年時間籌備，專賣男人嘢的自家品牌 MW將會於今個月十六日試業，為免出錯，王敏德坦言會抽時間落鋪釘實，還滿腹大計說：「下年會喺上海、北京開分店，我會慢慢 expand我個 brand！」
唔係開車行
王敏德的名模老婆馬詩慧（ Janet Ma）近日出席公開活動時，已漏晒口風，指老公為開新鋪忙到一頭煙。
「佢忙到 short short哋，每晚返到屋企都好攰，唔講嘢，但你會知道佢喺度諗緊好多嘢。」
投資拍戲過老闆癮的王敏德，近年大部分時間搞生意，花了兩年做籌備的自家品牌 MW，開檔在即。
本月初，本刊記者發現王敏德揸住貼滿新公司貼紙： MW的坐駕，現身位於銅鑼灣耀華街新店，鋪頭裝修近乎完工，只見他在店內個多小時，和一名老外密密斟，不時指手畫腳俾意見，離開時，還對着兩名工作人員合十雙手。面積有千三呎，擁有特大玻璃櫥窗的鋪位，據知月租超過十五萬，店內擺放了一架寶馬電單車，令人錯覺王敏德要開車行。
「 No No No，呢間係我 MW Michael王鋪頭， a full collection with sunglasses、 accessories同 men's apparel，仲會 carry埋 Rimowa搞 crossover。（全部都係自家設計？我自己 design，有成個 team， graphic designer、設計師幫我一齊設計。」王敏德說。
大陸搞分店
過去幾年，王敏德多次同品牌聯乘推出時裝及生活用品，因為銷情理想，啟發他開鋪推銷自家品牌。新鋪暫定本月中開始試業，明年一月八日正式開張。
「下年仲會喺上海、北京開鋪，慢慢 expand個 brand。」王敏德說。
|
鍾意就快D Share啦！
|
|
|