飯枱連椅，係愛女陳禛嘅契媽阮兆祥女友所送。兩歲女兒的「寫字枱」放正廳中間，可想而知家中 CEO係邊位！
探熱針
藝人愛巢 戲痴陳國邦 新居百呎私人影院
過去十二年，陳國邦搬過五次屋。兩年前為迎接小生命陳禛，兩公婆租住有會所設施的大埔滌濤山；早前再動用多年積蓄，買下二、三樓連天台的西貢村屋，再花百五萬裝修打造安樂窩，落地生根。
裝修大權由老婆話事，明知陳國邦是超級戲痴，體貼的羅敏莊不惜使大廿萬，為另一半打造設備齊全舒適的私人影院。所謂安樂窩，應該是伴侶一份心意。
一屋兩調
認識陳國邦的圈中友好，均會一致認同他有演技，亦出名黐家。西貢新居由老婆羅敏莊一手打點裝修，設計方面，更加要為宅男設想。
入屋後，先經過一道掛滿家庭照和畫的草綠色樓梯走廊。「呢個係我嘅『畫廊』！」屋主陳國邦說。上到大廳，首先最吸睛的，是愛下廚的女主人「基地」：半開放式廚房；但更令客人嘩然的，是屋企花二十萬打造的百呎私人影院。
一間屋，出現兩種不同風格的色調。男主人喜歡家居色彩強烈，紅黃藍綠七彩對比最啱心意；女主人追求柔和，灰米白啡才是首選。遇上意見分歧，解決方案是陳國邦放棄堅持，任由老婆揸主意。
放權冇拗撬
「咁多年來，我哋相處都有一個默契，就係要協調到兩個人同意先去做，裝修如是，教女都一樣。當我決定交晒俾老婆話事嘅時候，咁我就真係要做到冇所謂，唔可以睇完結果又要問：『點解咁㗎？』
「新屋裝修半年，我哋係零拗撬！當然，我都會同老婆反映，我想要七彩格調，雖然佢揸晒弗，但其實我老婆好顧我感受，好清楚我想要乜！所以一入屋，已經見到有幅好搶眼嘅綠色牆襯七彩燈，二樓走廊係黃色牆配紅色燈。」陳國邦說。
做好隔音
男方讓步，女方體貼，一切問題，自然迎刃而解。
羅敏莊善解人意，甚至落重本，打造老公夢想的私人空間。
「阿邦好鍾意睇戲同睇書，過往住嘅地方，唔係空間唔夠，就係租屋住無理由落重本裝修；難得今次買到間兩層連埋天台嘅村屋，地方夠，可以騰出一個百呎嘅房，俾老公做私人影院同書房，間房做晒隔音唔會騷擾到鄰居，又有 L形真皮梳化，我希望俾佢一個好好嘅享受空間。依家除咗陪個女，阿邦匿喺電影房嘅時間係最多，直頭係佢私竇。」羅敏莊說。
|
鍾意就快D Share啦！
|
|
|