阿蓮上週五往實德找「契仔」經紀黃棟，公司說他已辭職，她預備一疊
他照片的街招四圍貼，連實德玻璃門亦貼上幾張，希望大家警惕。
大錢題
一聲「契媽」 炒金蝕廿萬
警訊都有話：「騙徒嘅犯案手法，係層出不窮嘅！」但你我身邊，都仍然有不少人落疊。今次的個案，被欺騙的不單是金錢，還有感情。
任貨倉出納員的阿蓮，於四個月前，收到實德環球（ 487）旗下實德環球金業的經紀 Cold Call。對方隨後每天致電，在聽筒的另一邊噓寒問暖、關懷備至，未見過面已主動叫她「契媽」。兩人第一次見，經紀即露出真面目，要求「契媽」開戶投資「黃金價格」。當正對方契仔、迷得瘟瘟沌沌的阿蓮，聽話拿出二十多萬血汗積蓄買金。兩個月間，蝕晒！
這類「倫敦金」騙局，由八十年代叫人填問卷、送禮；到如今進化以 WhatsApp、 WeChat賣 personal touch。舊酒新瓶，結局一如以往：血本無歸。
外表如普通牛頭角師奶的阿蓮，今年五十多歲，在葵涌一間貨倉做出納員，一做竟然二十年。歌仔都有得唱：生活靜靜似是湖水；兒子早已長大成人，有自己的生活，雖同住但甚少交談，與丈夫的生活亦乏善足陳，簡直無話可說。她平日的工作，就是聽吓電話點吓貨。她說自己悶到要晚上走到茶餐廳做幾小時兼職。她說：「唉，返到屋企，咪又係對住部電視機！」
四個月前有一日，一個不知名的電話，打來她公司枱頭，為她平凡的生活，泛起了陣陣漣漪。對方是一名叫黃棟的實德環球金業經紀，「喂，你係咪陳小姐呀？」剛巧阿蓮姓陳，話匣子就這樣打開。阿蓮隱約記起兩年前，已接過這名經紀的電話，當時因工作而無暇詳談，今次再聽到這聲音，覺得雙方有點緣分，便聊起來，「佢每日打嚟，落雨問我有無帶傘，有無飲水，問我鍾意食乜，話買嚟俾我食。佢話自己二十五歲，同我個仔差唔多，我聽聽吓覺得佢把聲都似我個仔！」打蛇隨棍上，知道阿蓮愛錫兒子，但關係疏離，黃棟開始稱呼阿蓮為「契媽」。阿蓮說：「我話咁核突，但佢唔理又繼續叫。」記者翻睇兩人的微信對話，大部分都契媽前、契仔後，如「快的覆契仔啦」、「我瞓喇契媽」等。
夢中俾錢「契媽」旅行
一聲「契媽」之後，黃棟在這時候，開始露出接近阿蓮的目的，「佢同我講，之前買金賺咗好多錢，如果契媽俾錢佢投資，中秋節契媽就有錢去旅行」阿蓮聽過不少有關倫敦金的騙案，但黃棟跟他強調，她投資的是「黃金價格」而不是倫敦金，而且能「輸粒糖、贏間廠」，「佢話金價跌兩蚊就同我止蝕，賺就唔會同我止賺。佢仲會每日清倉，可以隨時拎錢走。」加上黃棟指實德是上市公司，信譽有保證，阿蓮不虞有詐，便應黃棟邀請，去公司附近茶餐廳見面，這次是這對契媽契仔首次見面。「阿仔知道咗，仲叫未來親家打俾我，叫我唔好去，我打俾黃棟話唔去喇。」怎料黃棟向阿蓮撒嬌說：「我已經換晒靚衫喇契媽，你唔係叫我換番衫呀。我阿媽今日生日，我都寧願約你呀。」阿蓮唯有應約，過程中把與黃棟的對話錄音及拍照，當做買個安心，而黃棟並不反對。這次第一次見面，阿蓮就決定開設戶口，並投資七萬元，過了兩日黃棟一早就打電話給她，「契媽，我同你賺咗幾千蚊喇。」
幾天後，一如所有的騙案，由於投資可升可跌，劇情逆轉。這天蝕掉萬多元，那天又蝕四萬多，契仔致電契媽安慰說：「我哋唔係蝕緊錢，我哋依家係捱緊價！」但由於戶口按金不足，故要求「契媽」補倉，「最初我唔肯，但佢好惡鬧我話：『你都唔明！都話唔係蝕錢，我自己都用咗六十萬去買，點會呃你，用多少少錢就可以贏番晒。』」「仔迷心竅」的阿蓮，覺得像被兒子點化，故再拿多三萬元出來，但最終一樣「輸晒」。
夢醒一日利息千元
這時阿蓮才細心翻閱手上的日結單，發現不少問題，「佢話同我即日清，但好多日都無清。」由於合約以美元結算，付港紙的阿蓮變相是向實德借美金交易，故每日都要付利息，一日幾百至一千蚊。阿蓮激動說：「如果我知要收息，你用棍打我一個月，我都唔會買！」而黃棟雖然講到明會每日清倉，但現實是部分合約過夜並未平倉，故又要補倉。經契仔又氹又鬧，她再拿出十萬，「佢話有咗呢筆錢，就可以走到好遠。」結果是，一、兩星期後，又輸掉。
記者話阿蓮貪心，阿蓮無奈回應，「最初係，但無幾耐我知道蝕咁多，我寧願輸晒個十萬就算，但黃棟話你睇在契仔份上啦，我太信佢。有次我搵佢成朝都搵佢唔到，仲擔心佢出意外。」最終由於無錢再補倉，阿蓮堅決斬纜，取回萬多元，其餘十九萬元石沉大海，她說：「我當時無嬲佢，仲同佢講：『算喇，將來阿仔結婚，你都嚟飲啦。』」
阿蓮一向有投資股票，但多數買銀行股、貪股價穩陣，她對投資黃金只一知半解，輸掉近廿萬，她拿着一疊疊日結單研究點解，她才終於發覺：「有幾次佢朝早打嚟，同我講今日睇升，但轉頭升咗少少就同我放，走去沽貨；明明有六張合約喺手，佢就同我講只買咗四張。佢仲話過跌兩蚊止蝕，都無做到，我叫佢每次買賣之前打電話俾我先決定，但佢打得幾次！」記者睇過日結單，每日交易頻繁，例如今年十月十日，即日買出買入的合約，總共已有十多份。阿蓮開始覺得不是投資失利，而是遭人騙財，她想找契仔投訴，但對方已無聽她電話，故她希望轉向實德追討。
實德無賴回應
記者上週五跟隨阿蓮，到實德位於上環永安中心的辦公室，想找黃棟對質。但黃的上司江先生指他已離職，阿蓮質問對方，她買的是倫敦金還是黃金價格，江先生說：「係買緊倫敦金，佢點同你講，唔關我事㗎。你覺得有問題，你最初又唔 cut咗個戶口？總之黃棟有同你交代乜嘢價買乜嘢貨，你自己都有日結單㗎。你哋點溝通我唔知道，你同我講都無用。」江先生拿出一份阿蓮簽署、授權黃棟操作戶口的授權書，說：「你自己簽㗎。」合約條款中，說明代理人可全權操作戶口，而實德無須為授理人任何行為或疏忽負責。至於明明睇升轉頭沽，另一位同事鄭先生回應說：「佢不時都要睇實，個市會轉㗎。」他還帶點諷刺說：「係喎，佢知道市幾時升幾時跌，唔怪得辭職唔做」他們提議阿蓮，「如果你覺得有問題，你最好去報警。」阿蓮已試過報警，但警方不受理，她為「報復」，影印了一疊寫着騙徒黃棟的照片，既貼在實德寫字樓的正門，又落樓下周街貼。
阿蓮的家人已知悉事件，並怪責她易上當，令阿蓮很傷心。牽涉的實德環球金業，是上市公司實德環球旗下，由楊受成弟弟楊海成創辦。記者往上址觀察，出入的都是只有二十多歲的年輕男士，記者說想聯絡投訴部門，江先生說：「佢哋都係搵番我㗎咋。」
由於此類經紀無須牌照亦不受證監監管，過去有關投資倫敦金的投訴，已屢見不鮮。但橋唔怕舊，最緊要受。由最初用問卷、送禮物，引人開戶口，到現在用 WhatsApp、玩 line漁翁撒網，大賣溫情，騙徒也懂得「與時並進」。有行內人說：「有經紀專登要你短時間內蝕多啲，令你想甩身都難。間中先替個客短炒賺少少，等你信佢。一有機會，又將贏咗嘅輸番落去。」事實上，經紀賺佣金以每張單計，單邊佣金兩點子，一買一賣賺逾三百元，愈開得多單、佣金便愈多。百利好金業（香港）研究部董事黃耀明說：「佢哋睇嘅係好短線嘅波幅，呢類黃金係無任可規管，經紀亦唔需要有牌照，買賣守則都係公司自己定。」既然政府無監管，唯有師奶自己提防，契媽千祈唔好咁易上當呀！
|
鍾意就快D Share啦！
|
|
|