側田又有新對象，早前帶住新女踎茶餐廳，之後買餸返愛巢玩煮飯仔。
探熱針
睇住嚟食 唐樓玩煮飯仔 側田手緊瘟女
返祖國搵食苦無門路，側田由北京回流香港投靠林建岳，但事業依然一池死水。冇乜嘢做，入不敷支的側田早前索性由貝沙灣豪宅搬到鴨脷洲，降格住唐樓。靠食老本，樣樣都要慳住使，連溝女都要錫住荷包，側田同新女友踎完茶餐廳，再幫襯街坊鋪仔上糧返歸煮飯，出街消費，可免則免。
女友埋單
以往側田住得豪，玩得更豪！月前被踢爆一拖二返私竇尋開心，話口未完，最近又再換馬！新歡一頭長髮，身形又夠高，完全迎合到側田的口味。
「以前側田好手鬆，好鍾意同啲女仔去啲高級餐廳、酒店食飯，送花送禮物更加唔少得，不過今時唔同往日，而家收入少咗，冇咁多錢氹女。」知情者說。
量入為出，生活起居全線下調，招呼女友，亦要勒緊褲頭。
有錢冇錢但一定有女！早前記者發現打扮街坊的 cap帽側田，在大坑一間便利店買了一支水和鮮奶，之後再走入一間越南餐廳，原來女友早已攞定位，但側田純粹齋望伴食，等女友食完一大碗麵仲未飽，於是轉場到附近的茶餐廳再食，二人並排而坐，今次側田同女友都各自點了一份下午茶餐，唔使再得個睇字。醫飽肚由女友埋單，側田負責遞手截的士，一齊返鴨脷洲。
吹水玩狗
到埗後，先到超市買日用品，沿途不斷有街坊跟他們打招呼，狀甚熟絡；見到有人放狗，二人又停低跟對方吹水玩狗。去完超市，再到附近凍肉鋪買牛扒，側田揀完，女友即拎出紙巾替他清潔，十分細心。最後去菜檔買埋菜，一袋二袋返歸。
買餸返屋企玩煮飯仔，有情趣又比外面食經濟，側田唐樓瘟女，平玩一樣得！
|
鍾意就快D Share啦！
|
|
|