爆 Like王
棄做律師 街頭歌王香蕉奶：畀力量大家撐落去！
佔中嚟到 65日，週日晚學聯更將行動升級圍政總，港生好熱血，歌手香蕉奶更係瞓身撐。
體重 100磅唔夠嘅港大法律系畢業生香蕉奶（岑瑋倫），有律師呢份好工唔做，做街頭歌手，全因為親眼見證過法律有不公義。
香蕉奶嚟足 65日，卻發現運動愈來愈迷失，希望用自己歌聲去鼓勵大家，他說：「我唱歌唔能夠爭取到真普選，但我畀到一種力量令大家撐落去。」
F：《 FACE》 香：香蕉奶
F：點解有律師唔做？
香：做律師同我想像好唔同，第一次去做實習生，處理一個男被告影裙底，條罪係公眾地方行為不檢。我哋係辯方，他一直話自己冇做，一直話個女仔屈佢，但去到最後他突然話自己有做，我跟嗰個律師同佢講表面證供都幾唔足夠，都好大機會告唔入，你會唔會當冇事發生呀？最後真係畀佢打甩。當時我好記得望住嗰個女仔，佢望住我哋成班律師，佢個眼神我好記得，好似我做錯咗啲事令到佢有寃冇路訴咁樣。
F：做歌手仲黑暗？
香：係㗎！可能仲多㗎！我唔係想做一個要上《勁歌金曲》嘅歌手。我幾 enjoy喺街頭，我唔使要唱啲歌去討好觀眾。我鍾意呢種感覺，成世喺街都冇所謂，如果我成日都諗住出名，就好違背我當日唱歌嘅初衷。我唔想參加嗰啲《中國好聲音》、《超級巨聲》因為我覺得唱歌唔係咁，唔係成日係度嗌，飆高音就係唱得叻。
F：喺金鐘唱歌對佔中有咩作用？
香：每次表演完收到好多紙條或者 inbox，佢哋好多可能會愈來愈迷失，唔知點解要坐喺呢度。好似政府唔會畀到咩回應我哋啦，可能思想混亂，但佢哋話每次聽完我唱歌可以舒緩心情啦，咁呢樣就係我想帶畀大家嘅嘢。我並唔能夠畀到實質嘢佢，我唱歌唔能夠爭取到真普選，但我畀到一種力量令大家撐落去。
F：第一日到𠵱家你心態有咩轉變？
香：一開始喺急救中心幫手，之後又去過物質站，有時要揾個定位畀自己究竟嚟做啲咩嘢呢，可能好似我朋友咁，喺樓梯畀隻手人做扶手，一個微笑可能係一個崗位。我問自己點解要嚟呢度？為呢場運動有咩付出呢?就係以我嘅唱歌啦，或者一啲卡通人物公仔放喺度，希望呢啲微小東西可以幫到大家，畀力量大家撐落去！
|
鍾意就快D Share啦！
|
|
|