[FACE - 393] 偽術相 婚照增高術 亞男超平底襯祖藍 祖藍,王祖藍,MF,

攰到放蚊嘅王祖藍，同着住超平底鞋嘅亞男，身高差異明顯冇咁大。

真面目

偽術相　婚照增高術　亞男超平底襯祖藍

上月求婚成功的王祖藍，公布明年情人節 2月 14與李亞男在九龍城浸信會教堂行禮，又會在之後一日去迪士尼擺 50圍酒，高調迎娶女友過門。

仲有兩個月就結婚，祖藍趁唔使開工當然要盡早籌備婚禮。上週三（ 26日），祖藍同亞男秘密到第一次拍拖的地點迪士尼影結婚相，兩人由早影到晚，搞足一日，要祖藍扮鬼扮馬唔難，最麻煩係要就住「藍男」相差 6吋的身高！好在矮仔多計，祖藍着番對增高鞋，亞男就着超平底，三日後發嗰批結婚相，祖藍竟然「高」過亞男，奇！

在台慶當眾向女友李亞男求婚的王祖藍，事後被唔少人插爆，有人話佢為擦鞋寧願出賣人生大事，亦有指佢一早已向女友求婚，欺騙觀眾。最近更有傳亞男母親唔鍾意祖藍做女婿，搞到祖藍婚後都要避孕唔敢生住。

祖藍都知自己矮，呢張擺明車馬趷高腳，都幾有幽默感㗎！網上圖片

明知同老婆差半呎，惟有用蠱惑招補數，呢張揸住汽球升起嘅相，升起咗咁多，都係高過亞男少少咋！網上圖片

影足 18個鐘

是非湧埋身，好在無損準新郎新娘的心情。上週三（ 26日），本刊發現「藍男」秘密到迪士尼影結婚相，同場仲有亞男父母，陪影之餘仲可趁機傾下偈改善關係。

當日一行四人早於朝早 6點、樂園未開門前入場影相，由城堡、美國大街影到咖啡杯場景，直至 9時左右，便轉場到酒店繼續影。兩人幫襯了日間及夜間攝影套餐，影完酒店景，休息一陣等樂園 8點半關門後，再入場影夜景。朝 6晚 12，影足 18個鐘，分分鐘攰過拍劇！

想孭起 5呎 9亞男唔係咁易，睇下祖藍孭到擘晒口幾辛苦！

𥄫胸

堅守婚前冇性行為嘅祖藍，當日見到老婆嘅事業線，忍唔住𥄫咗兩眼。

亞男嘟晒咀望住老公，肯定冧到祖藍暈陀陀！

亞男影單人照時絕不求其，每影完一個 shot都會睇下效果靚唔靚。

呢張深情對望，真係甜到漏㗎！

亞男父母都有入園陪阿囡同女婿影相，不過似乎等到呆晒！

孭極孭唔起

週日（ 30日）《老表》大結局，祖藍亞男一齊上台抽獎，有啲似婚宴預演喎！

難得可以扮王子，祖藍當日梳了個蛋撻頭，穿上深灰色西裝打煲呔，比起平時騎呢搞笑 look型得多！而亞男則身穿低胸白色婚紗，加上簡單的鑽石首飾，似女神多過似公主。

型男索女，可惜亞男高達 5呎 9，祖藍只得 5呎 3，爭成半呎，唔想望落差太遠，亞男唯有揀對着咗等於冇着的超平底鞋，而祖藍就學郭富城着增高鞋墊高自己。兩人全程喪擺 pose，又拖又錫又攬，祖藍更向高難度挑戰，嘗試扮 man孭起亞男，可惜試了三次都孭唔起，衰咗！本刊週一（ 1日）致電祖藍，可惜截稿前仍未回覆。

想學祖藍？盛惠 140萬

網上圖片

婚紗相（日與夜）$88,600

酒席（稀世寶鑽婚禮）$25,000× 52=$1,300,000

女仔 10個有 8個都想做公主，同另一半有個浪漫婚禮，不過 dream wedding當然有代價，好似祖藍揀的稀世寶鑽婚禮，每圍連加一要近$25,000，包 2晚酒店房、蜜月早餐、回禮小禮物等，最多可擺 52圍；加埋喺樂園影夢幻婚紗相，冇 140萬唔使諗！如果你有 140萬，恭喜你，幫你問過， 2016年情人節仲有得 book，快手喇！

鍾意就快D Share啦！

下一篇 》