有女萬事足
楊思琦非常保護囡囡楊卓穎，今次難得合體影賀年照，母女甚有默契，坐在羊仔上玩到哈哈大笑，場面溫馨。
打頭陣
母女合體賀羊年 楊思琦心願：想搵到另一半
羊年到又是新開始，單身港女勢必求搵到 Mr.Right。楊思琦當年誤信「空心老倌」吳帥是 Mr.Right，最後獨自在美國未婚生女，多年來母兼父職搵錢養家，轉眼囡囡楊卓穎快將 3歲喇！
上周五（ 13日），楊思琦和囡囡破天荒合體為本刊拍攝賀年封面，卓穎可愛活潑，人見人愛。訪問時思琦透露羊年願望：「我都想搵到另一半嘅！希望呢個人等緊我」而玄學家麥玲玲亦批楊思琦羊年有桃花，今年有望遇到合適對象。若能搵到個愛錫思琦母女的好男人，咁就真係「楊楊得意」喇！
去年孭住未婚媽媽標籤離開大台的楊思琦，眼看失靠山前路茫茫，誰不知工作四面八方湧來， job接 job不停中港兩地跑，人氣亦漸漸提升。
拍內地劇搵真銀
一直醉心幕前演出的楊思琦，坦言羊年想有新突破：「我好鍾意拍劇，傾緊今年可能參與內地一個新劇，但時間仲度緊，希望成功冇法，我係屋企嘅經濟支柱，心口掛住個勇字，勇氣加啲冒險精神，冇嘢難到我嘅。其實我都想有新突破，始終人成熟咗經歷又多咗，好想發掘自己唔同嘅一面。」除拍劇外，去年在電影《辣警霸王花》和《哥基王子》客串過的思琦，感到拍電影十分新鮮好玩，故她已經接了一部電影，今年 6月開拍，實行影視同步發展。
本刊找來麥玲玲師傅為思琦預測羊年運程，她表示思琦今年財運相當不錯，工作方面會更多機會走動，甚至赴外地發展。不過要小心一些動作片，因為會好容易受傷。
思琦：想找個人分擔
單親媽媽要獨力照顧孩子日子原本很難過，幸好楊思琦有個「得力助手」楊媽媽，由 BB開始已全力幫手照顧孫女卓穎，令思琦可以放心在外工作賺錢。始終女人都想有個依靠，思琦首次敞開心扉表示：「我都想有個伴嘅，不過呢個人未出現。但工作以外都要照顧個女，啲時間真係好唔夠用。我唔會刻意去諗嗰個人幾時出現，不過真係想有對手幫吓忙。我相信佢會喺適當嘅時候出現，希望呢個人等緊我。當佢出現咗，我先會知道將佢放喺咩位置，依家去諗都冇用。」
難得思琦開腔自白想搵個伴，對於上月有傳吳帥上門尋女，她聞言即顯得甚為避忌：「哎吔！唔答喇！已經講咗冇咁嘅事情發生。呢啲係舊聞，唔答喇！」看來吳帥的所有事情，始終是楊思琦的忌諱。
對於麥玲玲批思琦羊年姻緣運不錯，還會出現合適人選，楊思琦感到很好奇，想了解更多：「哈哈！真係㗎？有冇話幾時呀？點適合法呢？（師傅話年中會出現。）突然間話有就有，我未準備好喎！既然師傅咁講，我就開始擘大啲對眼留意吓，睇真啲唔好走漏眼先。」
《 Frozen》令囡囡聽話
本刊今次特別邀請楊思琦及囡囡楊卓穎一同拍攝賀年封面，取其楊姓與羊同音。雖然明知拍攝小朋友是件十分困難的事，但拍攝初期，卓穎比想像中更難搞。
記者：穎穎換衫囉。
卓穎： No！
記者：你唔想化妝扮靚靚咩？
卓穎： No！
記者：等一陣扮完靚靚，同媽媽一齊影相喎。
卓穎：我唔要同媽媽影相！
快將 3歲的卓穎，由抵步到正式拍攝擾攘近半小時，其間試過尖叫、每事 say no及狂谷眼淚。但當記者使出撒手鐧，即場播放《魔雪奇緣》主題曲〈 Let it go〉時，她竟乖乖聽話，還識得跟着唱。
上契有利健康
對於母女檔拍攝，思琦感到十分開心，還讚卓穎表現不錯，給她 75分。「因為佢今日有少少唔舒服，加上佢咁細個，專注力一定唔及大人。佢又冇呢啲影相經驗，所以佢今日嘅表現算好好喇！」據知囡囡向來體質差，前年大病要入院及即時做切腸手術，近月亦間中感冒纏身。麥玲玲師傅表示楊卓穎今年身體會好番少少，但由於屬土都是弱，所以最好找個契爺或契媽就會轉好。
愛女心切的思琦眼見女兒受苦怎會不心痛，「囡囡健康係我一生嘅願望，佢就係我嘅生命。至於契媽呢，真係要諗吓有咩人會合適，始終一契就一世，唔可以即時答到你喎！（會唔會搵好姊妹鍾嘉欣做囡囡契媽？）都想嘅！不過都要問准人哋意見先得，我唔可以單方面做決定嘅。」卓穎人見人愛，思琦要幫佢搵契媽契爺，應該冇難度。
離大台有運行
在大台涯足 13年的楊思琦，去年 4月約滿即時走人。之後她靠自己密密搵銀，先去有線主持清談節目《往事並不如煙》，又拍港台劇、北上登台加廣告，吸金超過 500萬。
節目主持 13萬
多套港台劇 10萬
客串電影× 2套 15萬
商演或剪綵× 15場 150萬
內地登台× 20場 220萬
廣告 150萬
合共： 558萬
狂谷寶貝女
楊思琦於 2012年狠飛吳帥後，獨自飛到美國產女，囡囡跟母姓，全名楊卓穎。之後思琦母兼父職，但她並沒有一絲後悔，反而投放更多愛給寶貝女。
思琦是個緊張媽咪，去年暑假已安排卓穎學英文、普通話及數學，加上 playgroup和游水班，生活極之充實。思琦避談女兒有否遺傳父親吳帥的跳水天份，只讚賞她有唱歌天份，及喜歡表演。卓穎現於紅磡名牌學校讀學前班，與陳慧琳的細仔劉琛是同學。
|
鍾意就快D Share啦！
|
|
|