探熱針
有眼光 鄭嘉穎幫句口 林子善串星變配角
11年拍《怒火街頭》同林子善 friend爆的鄭嘉穎，前年投資百萬支持對方的冰室開分店外，最近視帝同謝安琪合作新劇《殭》，亦幫口提議監製搵好兄弟客串一角。操到一身「格仔餅」的林子善，肯捱又打得，加上視帝牙力夠，最終由兩集客串，變成八集戲大配。
早前兩兄弟同場開工拍外景，唔鍾意俾鏡頭「隊住」的鄭嘉穎， cool爆左閃右避，但當好兄弟埋位，視帝就經理人一樣 mon到實，見林子善打到露底，第一時間通水，照顧周到。
幫手除護墊
高登人妻謝安琪初拍劇，大台安排同視帝鄭嘉穎合作做對手，隆而重之！
新劇《殭》早前拉隊到薄扶林邨開工，黐了二撇雞的鄭嘉穎，晨早已經 stand by現場。等埋位期間，有工作人員遞上煙仔，但視帝眼力驚人，手指指示意附近有傳媒「隊」住，隨即走開避鏡頭。
黐滿護 pad的林子善埋位，準備拍被圍毆場面。七情上面拍咗多 take，但導演都未肯收貨，搞到一直「柄」埋的鄭嘉穎，都忍不住蒲番出嚟，睇吓搞乜？
再拍多七、八次，不停俾人圍毆的林子善打到甩褲露底，導演先滿意收貨。
當正對方是細佬的鄭嘉穎，第一時間上前慰問，又幫手拆護 pad，助手、經理人崗位，都撈埋！
「子善都算唔話得，客串都咁搏，換轉第二個，拍四 take都唔收貨，實詐型！」劇組工作人員說。
七成動作戲
除了鄭嘉穎、謝安琪，劇中主要角色有陳凱琳和大奸角陳山聰，其餘便是外援。據了解，鄭嘉穎見劇本其中一個有不少動作戲份的角色，好適合林子善，於是向監製提議起用。
「最初預咗子善客串兩集，佢開咗兩日工，但導演同負責做動作嘅指導，對子善都讚不絕口，加埋有嘉穎幫口，戲份加完一次又一次，結果兩集變八集，其中有七成係動作場面，剪埋剪埋可能有十集，同大配無分別。」一名工作人員透露。
稱兄道弟
一○年拍《鐵馬尋橋》，自認小器記仇的林子善在訪問中踢爆鄭嘉穎在化妝間內踢走他的鞋，並做出不屑表情……不打不相識，一年後再合作《怒火街頭》，兩人冰釋前嫌，成為好友。林子善憑劇中米佐治一角彈出，由於拒做大台親生仔，被雪藏無劇拍，轉行開冰室做老闆，一三年，計劃在灣仔開分店，林子善想做大股東又唔夠 cash，適逢鄭嘉穎在內地憑《步步驚心》爆紅，賺到盆滿鉢滿，好兄弟二話不說借出一百萬，圓他大股東夢。鄭嘉穎對林子善，唔話得！
|
鍾意就快D Share啦！
|
|
|