一場病，正正給鄺佐輝與細他廿年的少妻感情考驗。一講到老婆的情深義重，鄺佐輝感動得緊抱對方，盡在不言中。
探熱針
四期腸癌奇跡康復 鄺佐輝：欠老婆太多
去年六月， 58歲再婚不久的鄺佐輝發現患有腸癌第四期，並擴散到肝臟要切肝保命。經歷半年艱辛化療，鄺佐輝奇跡康復。繼患血癌的梁潔華，又一個抗癌成功藝人。
回憶病在床上的點滴，尤其細他廿年的少妻衣不解帶照顧，硬淨抗癌的鄺佐輝也禁不住眼泛淚光：「我欠佢太多！」
執番條命，鄺佐輝最想盡快補影婚紗相，報答共患難的老婆仔。
癌細胞降至正常
再婚半年，鄺佐輝證實患癌，唯有咬緊牙關兩度做大手術，接住是為期半年的八次化療。捱過重重難關後，挨年近晚終於收到好消息，癌細胞指數由最高的七點幾降至穩定的三點多水平。
大步𨂾過，眼前的鄺佐輝精神抖擻，頭髮濃密。
「仲有兩次療程未做，要做到下個月先完晒。事前做定心理準備，會甩頭髮會嘔，預咗辛苦。點知我乜嘢副作用反應都冇，食得瞓得，冇甩頭髮，體重逐漸回升到出事前七十公斤，同病緊嗰段時間比，相差十公斤。醫生對我康復進度好滿意，癌細胞指數跌到三點幾。至於將來有冇機會復發我唔會諗，我好樂觀，今日打得贏呢場仗我已經賺咗。我阿媽知道個報告後，不知幾開心。」鄺佐輝說。
梁潔華送補身偏方
跟他一樣走過抗癌路的梁潔華，在鄺佐輝打仗期間曾送他一條補身偏方，助他捱過難捱的化療。
「華女教我用花生『衣』煲蜜棗水，飲咗我都覺得身體冇咁唔舒服，之後先接受化療。」
一場病，令鄺佐輝看到跟他拍拖數月便結婚的老婆仔，原來是如此重情義。
「之前我接受廖安麗主持嘅《生前行動》訪問，講到感激老婆，都忍唔住喊咗幾次。我哋識咗冇耐就結婚，雙方其實仲用緊時間去了解，點知就……呢半年佢朝朝六點起身煮早餐我食，陪我去公園晨運，陪我去完醫院又要去買餸煮飯，為我頻頻撲撲，冇半句怨言。」鄺佐輝含住一泡眼淚。
唔想長期靠人資助
對妻子的感激，鄺佐輝無以名狀，一手擁住另一半。
「我欠佢太多，好番之後我會盡我能力，同佢去美加、澳洲、台灣旅行，補度蜜月同影婚紗相。我成日同老婆講，冇咗佢我唔知會係點樣。」聽到老公肺腑之言，鄺太在旁默不作聲，表現內斂。
與少妻患難見真情，也感受朋友雪中送炭的可貴，演藝人協會、藝進同學會及張衞健等多位藝人均向他予以經濟援助，令過去半年來不愁生活，安心養病。
「要感激嘅人太多。佢哋嘅幫助，可以讓我未來半年仍可輕鬆生活，但我都希望靠自己雙手搵食。香港衞視（深圳）班同事好好，一直等我歸隊，仲就住我身體狀況，每次只拍一集，做個幾鐘就收工。希望嚟緊四、五月可以復工。」鄺佐輝說。
跟死神擦身而過，鄺佐輝卻未有懼怕。現在的他唯一不願成為另一半的負擔，這也是他抗癌求存的動力。
大步𨂾過
生命無常！近年娛樂圈有不少藝人受到癌魔或慢性病長期困擾，但當中亦有很多勵志康復個案。
吳孟達
去年四月，吳孟達在河北石家莊拍劇期間傷風感冒，回港後突然心臟衰竭被送院，其間情況嚴重，要入 ICU接受治療，最後證實是細菌感染，引致心臟衰竭得番三成功能，雖然搶救成功，但自此要減少工作，專心休養。
|
鍾意就快D Share啦！
|
|
|