陳豪唔肯拍墮樓戲，最終只肯在天台邊行來行去，但都表現得十分驚青。
探熱針
仔細老婆嫩 陳豪跳樓搵替身
三月又再做老豆的陳豪，這陣子正埋位拍新劇《鬼同你 OT》，務求趕在農曆新年前煞科，然後放假陪老婆陳茵媺生仔、坐月。
仔細老婆嫩，陳豪事必將家庭放最首位，拍戲亦比以往錫身。上星期，劇組外景拍一場在五層樓高的天台半天吊戲，導演原本要求陳豪親自上陣，但他堅決拒絕，極其量是在天台邊行來行去，其餘全交替身負責，自己坐埋一邊，「印印腳」同田蕊妮打邊爐。
兩年抱兩
陳豪與陳茵媺婚後開行 turbo全力造人，大仔梓樺去年十二月剛滿一歲，下個月就輪到細仔出世，家庭為重的陳豪，為了照顧老婆同兩個仔，一早向公司攞定近兩個月假，待新劇《鬼同你 OT》煞科，農曆新年開始悠長假期。
日前，劇組拉隊到位於大角咀一幢舊樓拍外景，當時的戲份是陳豪從五樓天台墮下，其間他扯住天線半天吊的陳皮設計場口。
由於位處只有五層樓，特技組認為危險性不算太高，加上導演想拍到陳豪的反應，所以一直預計由他親自上陣；但去到現場，陳豪突然拒絕，認為在五樓高半天吊，始終有一定風險，加上地面未有安排任何安全氣墊，單靠威吔吊住，擔心一旦發生意外，必定凶多吉少。
向危險說不
最後，陳豪只願意親自演出在天台邊緣行來行去的鏡頭，其他要半天吊場面，全交替身負責，他就和當日有份埋位兩個女主角，田蕊妮和胡定欣坐埋一邊，打住邊爐睇拍戲。
「以前未結婚生仔，阿 Mo（陳豪）拍戲都好搏命，好多吊威吔戲佢都主動自己嚟，幾年前拍《心戰》一場綁住鎖鏈潛落水底戲，阿 Mo都冇用替身，而家結咗婚，又有細路諗法一定會唔同，萬一有乜損傷真係唔知點算，始終仔細老婆嫩，佢唔再咁搏命，大家都好明白同體諒佢！」一名工作人員說。
不單只拍危險鏡頭錫身，今時今日的陳豪，連拍親熱戲都可免則免。據了解，他早已向公司監製表態，所有 kiss和床上戲，都避得就避，萬一避無可避，他都要問准老婆，攞到豪嫂 permit先拍。愛妻號，如假包換。
|
鍾意就快D Share啦！
|
|
|
