2015年2月5日星期四

智孝BB清純素顏look出發紐約金鐘國有望與尹恩惠合體智孝,金鐘國,尹恩惠,宋智孝,

【韓流】智孝BB清純素顏look出發紐約金鐘國有望與尹恩惠合體

2015-02-05 16:11:00

憑韓國熱播綜藝節目《Running Man》而人氣爆燈嘅女星宋智孝，今日係韓國出發到紐約，今次智孝BB去紐約，係為時裝雜誌進行拍攝工作。

一向都對自己靚樣有信心嘅智孝BB，今日繼續以素顏上陣，即使一頭散髮，但仍能展現佢自然又樸素嘅魅力，真係羨慕死唔少女星。

智孝BB亦都好親民，由保母車下車一刻，佢都全程面帶笑容，不停向在場的粉絲同傳媒揮手，Nice到爆，而穿上一件啡杏色長外套，及粉紅色頸巾嘅智孝BB，仲散發出少女嘅味道，點睇都唔似三十三歲。

講開《Running Man》，今日係SBS嘅官方Twitter就更新咗「轉發並呼喚尹恩惠來Running Man」嘅status，仲話只要轉發超過一萬個就會請尹恩惠來做嘉賓，之後仲上載一段以前尹恩惠上過《RM》時嘅片段，以及係另一個綜藝節目《X-man》中，金鐘國用手遮住尹恩惠耳仔嘅經典場面，似乎暗示尹恩惠將有機會上節目。唔少粉絲知道後都大感高興，因為一直都傳金鐘國暗戀尹恩惠，加上玩遊戲時只要提尹恩惠個名，金鐘國就會如中死穴一定輸咗，所以唔少人都好期待佢哋可以一齊現身《RM》。