探熱針
洪永城殺敗馬國明 唐詩詠：情人節 OK
唐詩詠跟糾纏多年的崔建邦分分合合後，去年八月被目睹跟洪永城赤柱遊車河，男方事後擺明冧爆對方，不過唐詩詠未有表態；日前洪永城在活動再公開 like爆，並預告約會過情人節。
洪永城高調出招，原因是早前馬國明被發現帶唐詩詠睇車撐枱腳，情敵擺明挑機，追足對方一年的他唯有加快插旗。雖然馬國明有公開還招，但洪永城誠意十足；對於情人節之約，唐詩詠笑晒表示 OK。
日日短訊
已經三十三歲的唐詩詠，恢復單身後一直未有穩定對象，○九年拍電視劇《鐵馬尋橋》後，經常被拍到和馬國明行街食飯，不過二人強調是劇集兄妹關係的延續，彼此只是「好兄妹」。
到去年初，唐詩詠與洪永城合作《載得有情人》，對方不單自爆入行前已視唐詩詠為女神，開劇不久，已經咬住唔放，短訊追求。去年八月，二人到赤柱遊車河，斷正！
「佢哋第一次合作，洪永城已經成日喺其他人面前讚 Natalie（唐詩詠）好女仔，私底下又日日同佢 WhatsApp；當時 Natalie都有意思，但之後大家都各有各開工，洪永城又返咗大陸四個月拍《張保仔》，咁耐以來佢哋只係食過幾次飯，相處了解機會好少。」知情者說。
公開插旗
上星期二（一月二十七日），洪永城突然在一個啤酒活動爆響口示愛，公告全世界他正在追求唐詩詠。
「佢（洪永城）差不多用咗一年時間去追人，但 Natalie個人比較慢熱，加上唔係咁易就到時間約會，見到 Natalie同馬國明去街，佢咁緊張即刻做嘢，都係要俾對方知道，呢個係佢嘅人。」
馬明還擊
洪永城公開抗情敵，馬明立刻有反應；在活動上代「妹」回應情人節邀約。
「其實佢（洪永城）咁都好主動，但阿妹（唐詩詠）係咪會應約先？可能阿妹唔應約呢！我哋可能會約阿妹食飯㗎！」馬國明出口術。
兩男爭一女，招來招往。本週一（二月二日）晚，唐詩詠離開寓所外出，對洪永城力追一年，春風滿面的她未有否認。
「多謝關心， thank you。（馬國明都追緊你？）唔係，唔係。（洪永城大機會啲？）多謝關心， thank you。（係咪一齊過情人節？）唔……我希望我嘅情人節……多謝關心。 OK嘅。」唐詩詠一句 OK，洪永城有景！
一拍即合
拍劇，連續幾個月，日對夜對，男女藝人代入角色，特別容易將一段假情發展成為真愛，變成一拍即合的急速煲。
|
鍾意就快D Share啦！
|
|
|
