滾熱辣
陳嘉輝負責湊仔 梁小冰狂接騷撐頭家
轉戰內地發展的梁小冰，近日憑港視神劇《導火新聞線》爆紅，一幕裸背「露波邊」，令她迅即成為內地搶手貨。本刊連日發現，小冰趁人氣旺，日日拖喼早出晚歸狂接騷𢱑銀。反而其夫陳嘉輝則化身住家男，負責買餸及接送 8歲囝囝陳洋溢返學放學。
去年二人以 557萬購入離囝囝學校不遠的「一號•西九龍」新樓。在家主力教仔溫書的陳嘉輝，去年更以底薪 8千翻簽大台，變相供樓重任便要落在主力賺人仔的老婆身上。
梁小冰 90年當選港姐季軍，獲當年評判之一周潤發公開讚她是「最有演戲天份的香港小姐」，隨即被大台力捧，七年內拍了 25部劇。直至 97年尾，她終於捱到病，梁曾說：「對一個中五畢業嘅女仔嚟講，冇得玩、冇得瞓、冇得見朋友同屋企人，覺得自己冇正常人生活，身心都好疲累。」故與當時仍是男友的陳嘉輝一起離巢，孖住到台灣及內地發展。
為仔返港𢱑銀
直至近年，夫妻二人相繼回流返港搵食，梁小冰以一百萬簽約港視拍兩劇，而陳嘉輝由於名氣、人氣不及老婆，惟有食回頭草以底薪 8千蚊翻簽大台。其實，二人明知人民幣好賺過港幣，依然堅持回港，目的是為了 8歲囝囝陳洋溢。據知今年讀小三的洋溢，就讀深水埗直資學校 St. Margaret小學。為方便囝囝返學，去年夫婦二人聯名以 557萬購入一號•西九龍一個實用面積約 500呎的單位。一知情人士透露：「小冰同嘉輝好錫個仔，知個仔想學做導演同魔術，專登請人一對一教佢。原本佢哋住開元朗，明知市區樓貴地方細，都特登搬出嚟住，為咗個仔乜都肯。」
月花 7萬
為搏命搵銀，梁小冰日日做到冇停手。梗係事關孭起頭家嘅佢，開支好大，每月使費估計七萬，唔努力點得。
騷價升三倍
近日梁小冰憑住《導》劇人氣飆升，隨即成內地搶手貨。跑慣江湖的她，上周更隻身到內地簽新經理人約。據知她將兩年拍三套劇，每集酬勞五萬港幣。而食住個勢，近日她在港的騷價亦由兩萬躍升至六萬。記者連日採訪，發現她不時拖着行李喼獨自坐地鐵開工，身邊並冇助手。知情人透露：「小冰姐係舊式藝人，唔講究排場同形象，始終搵錢最實際，所以佢講明唔會嘥錢請人做助手，化妝 set頭都係自己嚟，咁佢就可以淨袋騷錢。」
老公做住家男
梁小冰為頭家外出拼搏日做夜做，老公陳嘉輝去年以 8千底薪秘密翻兜大台。連日來他都不用開工，負責接送囝囝返學放學，買餸煮飯等。知情人續說：「佢兩公婆一早夾好， Gary（陳嘉輝）負責 Louis（囝囝洋溢）學術性嘅嘢。因為嘉輝學歷好啲，讀 Poly時修土木工程，乜都識啲！既然 Gary要負責阿仔學業，所以就唔可以好似老婆咁返大陸搵食。兩公婆商量過， Gary簽番大台，雖然明知人工少，但總算有收入，幫補吓啲日常開支，重點係多啲時間照顧阿仔。」
婚姻曾現危機
近年小冰夫婦以兒子為努力目標，一家三口樂也融融，但 3年前女方曾被拍得繑手夜會前有線主播王志海，被指背夫偷食。事件曝光後，梁小冰曾被拍得面容憔悴，獨自攜子返娘家住，婚姻一度亮紅燈。事後她解釋：「繑手之嘛，都未擁抱，大驚小怪。我先生知道唔係事實，佢相信我。」雖然婚姻曾出現裂痕，但近年二人不時在微博上載甜蜜溫馨照，相信夫妻關係早已雨過天晴。
周二（ 24日），本刊向等接仔放學，無聊逛商場的陳嘉輝訪問，問到是否女主外、男主內一事，他擰擰頭未有回應，跟着極速步行回家。而小冰日前接受本刊訪問，亦直認努力賺錢為培育囝囝：「佢想將來做醫生，又對跳舞、唱歌、拍片、魔術都有興趣，所以幫佢搵間有齊德文、法文、西班牙文、日文學嘅學校，希望佢搵到自己成就。」原來養一個小朋友唔止 400萬咁簡單。
女角剝上癮
《導火新聞線》被譽為繼《選戰》後又一神劇，據知劇情將會愈趨緊湊，女角更輪住剝衫。
|
鍾意就快D Share啦！
|
|
|
