樂天黃鶯
2歲半大的黃鶯與媽咪朱茵一個餅印，性格樂天的她非常黐爹哋，經常笑瞇瞇，好可愛。
滾熱辣
與經理人反目量地半年 阿 Paul網上賣畫
被喻為香港樂壇搖滾教父的阿 Paul黃貫中， 3年前與性感女神朱茵奉女成婚。婚後老公負責搵錢養家，老婆主力湊女，只是間中出席活動賺私己錢。
好景不常，阿 Paul近年工作量大減，冇碟出又冇演唱會開，收入長期不穩定。本刊收到消息，指阿 Paul及朱茵不滿合作多年的經理人 Ada未能為他們接 job，半年前雙方反目不再續約。為撐住頭家，一向有鑽研畫油畫的阿 Paul，最近不惜將作品放上網拍賣。
阿 Paul與朱茵連日帶囡囡黃鶯在九龍城一帶活動，罕有地一家三口在公園玩耍。產後兩年半的朱茵依然未修身，女神要出山接 job，睇嚟要先減磅。
近年阿 Paul與朱茵的工作均由經理人 Ada負責接洽，朱茵自 2012年 10月誕下女兒黃鶯後，一直處於半引退狀態，兩年來曝光率非常低，而阿 Paul近年亦工作不多。
據知二人有感 Ada辦事不力，未能為他們增加工作量，故阿 Paul不再聘用 Ada為經理人，實行自己接 job。知情人士指：「佢哋雖然合作咗好多年，不過近呢兩年 Ada真係接唔到 job。你睇吓阿 Paul就知自從前年上完《我是歌手》後，就冇乜大型演出，呢兩年亦冇出過碟。朱茵仲慘，對上一次開工，已經係上年年中，幫護膚品牌做代言拍攝硬照廣告。半年前阿 Paul決定同 Ada斷絕合作關係。」
酬勞減半𢱑撈
回復自由身的阿 Paul工作量近乎零，為重出江湖，他不惜減價搵 job。「阿 Paul咁多年嚟都未試過自由身。呢半年佢決定主動出擊，無論出 show出埠登台，或者以前佢最唔鍾意出席嘅商業 event，依家都話 okay。為咗吸客，佢仲放風話收半價都肯制。不過阿 Paul始於都係 band仔出身，鍾意做 live，依家最想就係搵人幫佢開 concert。」知情者說。
阿 Paul兩公婆的經濟狀況不至於拮据，他們現居位於九龍城的物業屬於朱茵所有，基本生活不成問題。不過囡囡黃鶯快將 3歲，要入讀幼稚園，使費一闊三大，不得不另謀財路。而畢業於香港理工學院設計系嘅阿 Paul除了創作音樂，從小更有畫畫的嗜好，閒時在家都會畫油畫。最近他便找來兒時好友兼畫家 Toda余俊偉代他在網上賣畫。本刊記者曾致電 Toda查詢。
他直認幫阿 Paul賣畫，「其實都係啱啱開始，準備競投第一幅。依家個價都去到萬幾蚊，有啲人出到幾十萬。不過冇留低資料所以唔算。當然有啲 fans諗住幾千蚊買到，不過冇乜可能！」
揸筆一樣掂
身為 Beyond主音結他手的阿 Paul，除了彈得一手好結他外，原來對畫畫素有研究。今次他夥拍好友 Toda賣畫，以二人之名開了一個微博戶口，已曝光的畫作有四幅，會以拍賣形式接受私信及電話競投。第一幅名為「 Black Dog」的作品，現正接受投標，標價現已高於 1.5萬。
多才多藝的阿 Paul亦擅長攝影，分別於 02年及 07年舉辦攝影展。他不只對視覺藝術有興趣，也喜歡文字創作，先後出過《顛倒》及《長話短說》兩本文字加相片的書。
Paul：冇打算追多個
本周二（ 24日），阿 Paul揸車外出時接受本刊記者訪問，直認與經理人 Ada已斬纜。
記：記者 P：阿 Paul
記：知道你同經理人 Ada冇再續約。
P：係，依家冇合作，約滿冇續約。
記：咁依家要自己接 job？
P：依家我係喺真空期裏面。
記：有傳你減價接 job喎？
P：唔會，都係合理價錢。
自囡囡出世後，原本憤世嫉俗的阿 Paul被融化，為人變得和善。記者問他可會再追多個，他笑說：「唔喇！我哋冇呢個打算！」
阿 Paul努力搵 job，老婆朱茵亦有難同當。知情人士指：「朱茵產後冇拍過劇同戲，好多人都期待佢復出。佢脫離經理人後，即刻有內地經理人公司搵佢，今個月初仲正式簽約，不過冇大搞之嘛！」據知，朱茵所簽的是凱藝國際，旗下藝人包括蔡少芬、張晉、陳法蓉、鄭佩佩、原子鏸、伍詠薇等，主攻內地市場。
九龍城打躉
阿 Paul兩公婆暫時未有工開，終日弄女為樂。上周六（ 21日），阿 Paul與朱茵罕有地帶囡囡到附近的九龍寨城公園玩。周一（ 23日）一家三口又到九龍城的平民 cafe食午餐，一家所需都在九龍城解決，真係慳唔少。
嫁雞隨雞的朱茵夫唱婦隨，不過她的身形依然脹爆，面容憔悴，不復當年性感女神之勇。要復出幕前，朱茵真要努力保養至得喇！
一年接一 job
朱茵 2012年與阿 Paul奉女成婚，婚後甚少露面。她對上一次開工已是去年 7月為護膚品牌瑞士葆麗美拍攝硬照廣告。而前年 9月拍攝的《 Mian is品質香港》微電影，已算是最近一次出現熒幕，名副其實一年一 job。
|
鍾意就快D Share啦！
|
|
|
