熱爆娛樂: 不分輕重　男友踩場　陳嘉寶開工玩失蹤 [壹週刊

2015年4月2日星期四

不分輕重　男友踩場　陳嘉寶開工玩失蹤 [壹週刊 - 1308] 陳嘉寶,M1,

探熱針

不分輕重　男友踩場　陳嘉寶開工玩失蹤

現年二十五歲，有「邦民女」之稱的陳嘉寶（ Anjaylia），去年拍無綫劇《女人俱樂部》成功入屋後，廣告、電影、劇集、 model job，接到冇停手，在新劇《殭》中，更升呢做女二。做咗姐仔， Anjay唔單只公主病發，只要富貴男友 Epaphras到拍攝現場探班，她就不分輕重，會忽然唔見咗人玩失蹤。上星期，劇組在中環拍外景， Epaphras又校啱時間踩場。

人肉速遞送禮

上週五（三月二十七日）， Anjaylia同劇中與她飾演兄妹的黃又南在中環開工拍外景，其間，有米男友 Epaphras失驚無神揸車到，但 Anjay正在埋位，他唯有不停在附近徘徊踱步。

等咗陣， Epaphras開始不耐煩，仲忍唔住打電話給女友。接電話後， Anjay唔理咁多，第一時間會合男友，接過對方人肉速遞來的禮物，才繼續埋位開工。

「 Anjay係有啲公主病，個人仲冇乜耐性，試過有場戲要佢坐喺地下拍，開頭幾個 shot都冇乜嘢，但休息完再返嚟拍，佢就發𤷪𤺧：『吓？又坐呀？』只要出外景，佢男友就成日走嚟探班，搞到 Anjay分晒心，有次仲拍拍吓兩個唔知走咗去邊，要成組人等佢返嚟。」劇組人員透露。

在劇中做女二的 Anjay，同黃又南飾演兩兄妹，二人當晚拍攝一場鬼上身戲份。

帶埋禮物去探班的 Epaphras，愈等愈唔耐煩，最後索性打電話搵 Anjay。

拍至凌晨， Anjay一手拉喼一手拎住男友送的禮物返電視城繼續拍廠景。

守教規但同居

Anjaylia入行不久，已和同公司的有錢仔黃頌祈 Epaphras撻着， Epaphras冇做 model後轉投金融界，二人一直秘密來往，到去年被拍得拖手行街後， Anjay才逼住公開戀情。

為 mark實長期飯票，以基督徒自居的 Anjay口口聲聲堅拒婚前性行為，但數月前，她已搬到男友位於北角的海峰園寓所同居。

「 Anjay覺得自己有人識，出入屋邨唔方便，所以幾個月前已經搬咗去男友屋企，一個星期先返屋企瞓一晚，陪吓媽咪。」知情者說。