熱爆娛樂: 《歌手》總導演怒插宇宙 G.E.M.：「唔換歌就換人！」 [壹週刊

2015年4月2日星期四

《歌手》總導演怒插宇宙 G.E.M.：「唔換歌就換人！」 [壹週刊 - 1308] G.E.M.,G.E.M,鄧紫棋,M1,

首新歌都有×叫㗎！（設計對白）

探熱針

《歌手》總導演怒插宇宙 G.E.M.：「唔換歌就換人！」

自以為紅到上宇宙的「宇宙巨 G.E.M.」鄧紫棋，耍大牌情況一日比一日嚴重，忘本睇唔起香港市場細，就算上台灣阿姐阿哥小 S（徐熙娣）同蔡康永的節目《康熙來了》，都要擺款，結果被小 S當場寸到冇聲出，𤓓爆宇宙。

小小打擊，絕冇嚇窒宇宙 G.E.M.，連俾錢佢賺，一手將她捧紅的大陸《我是歌手》節目，一樣唔俾面。今個星期五（四月三日），宇宙 G.E.M.將會回歸《我是歌手》同第三輯歌王韓紅等人同台演出，但霸氣的她唔理節目組反對堅持唱新歌，結果辣㷫總導演，講到明：唔換歌，就換人！

紅爆囂爆

靠《我是歌手 2》爆紅後， G.E.M.更加不可一世，四圍燃起火頭。最新災區，竟然是一手將她捧起，助長「宇宙巨 G.E.M.」的節目《我是歌手》。

四月三日， G.E.M.原定要到湖南出席《我是歌手雙年巔峰會》節目，聯同韓紅、胡彥斌、韓磊及周筆暢等歌手一齊表演×叫。為宣傳自己的新歌， G.E.M.方面要求當晚演唱剛發表的《單行的軌道》，但該節目向來主張唱舊歌或重新編曲，就算唱自己歌也要經過改編加入新元素， G.E.M.要唱一首全新歌，是打破常規，節目組一早已表態反對，但 G.E.M.卻堅持。

「其實節目組嗰邊同 G.E.M.解釋得好清楚，點解唔俾唱新歌，因為如果佢開咗先例，其他歌手都話要唱新歌，就會影響節目風格同觀眾反應；點知 G.E.M.嗰邊仲要大番人哋轉頭，話佢上中央台春晚咁大個台咁大嘅節目，都俾佢唱一首全新歌《多遠都要在一起》，無理由湖南衞視唔俾囉！」一名電視台幕後人說。

《歌手》總導演洪濤，去年親自揀選 G.E.M.參賽，如今見到佢一紅即囂都相當勞氣，忍唔住要在微博發火。

忘恩負義

G.E.M.企硬，電視台方面軟硬兼施，依然無法令她軟化，結果搞到《我是歌手》總導演洪濤發晒火，星期一（三月三十日）晚在微博隱名怒轟 G.E.M.：「你不換歌，我們換人！晚安！」

據知，湖南衞視方面覺得 G.E.M.忘恩負義，試過之前邀請她上其他節目，已要求多多，大牌程度，比韓紅有過之而無不及。有指電視台方面亦作好換人打算，其他歌手已有當晚節目流程在手，亦獲分派好 fans位，唯獨 G.E.M.一方仍未獲得任何通知。

今年央視春節晚會， G.E.M.有份演出，仲可以唱埋新歌，認真巴閉。

G.E.M.的經理人張丹，同樣出名要求多多，兩個是最佳拍檔。

原本 G.E.M.與同屆歌王韓磊一齊，與今屆《歌手》韓紅、胡彥斌等人一起演出，但現在隨時被飛。

自己丟架

事實上，宇宙 G.E.M.唱新歌的霸道做法並不是第一次，早前她到台灣錄影《康熙來了》，講好會唱成名歌《泡沫》，但臨錄影前，她突然要唱新歌《多遠都要在一起》，其時工作人員曾解釋所有歌手都不可以唱新歌，也不許在節目宣傳新歌，否則，電視台可能會被罰錢。

點知 G.E.M.經理人張丹竟然口出狂言：「如果要罰錢，我哋全數負責。」雙方爭拗近一個鐘， G.E.M.才肯妥協，但目睹整個過程的小 S，就在節目錄影途中不停狂寸宇宙 G.E.M.，搞到她尷尬又無癮，攞嚟衰。