岑麗香係網民女神，大台用她孭飛拍新處境劇，目標清晰。
探熱針
網民優先 大台放棄 C9 岑麗香張繼聰接力拉客
無綫《愛•回家》收視低處未算低，網民日日嗌腰斬，大台被迫順應民意，提早收檔。接力的新一套處境劇，原本打算沿用部分「家人」，但經過高層商討，決定改變初衷，以討好年輕觀眾為目標，馬家成員全部冇得留低，但一班二打六，包括張振朗、謝可逸等反而有份冧庄，再由岑麗香、張繼聰擔大旗，加埋吳業坤、何君誠等新面孔入組，卡士削到爆。
再見膠劇
《愛•回家》一二年首播以來，成功吸納師奶 fans捧場，三年來多次添食；但近年劇組不斷換班，先後踢走了朱慧敏、湯洛雯、蔣家旻等骨�身脷 A換上高海寧、張嘉兒、古明華等新角色，面目全非，加上新班底唔夠討好，劇情更被嘲愈做愈膠，收視由最高廿七點，暴跌到十七點，唯有嗌停止血。
原本打算換湯不換藥，六月接力出街的新處境劇保留原有班底，但高層眼見近年「師奶劇」冇套掂，決定變陣，新劇走後生路線，希望吸納到另一批年輕觀眾；本來可以留低的《愛•回家》台柱，包括劉丹、徐榮、林漪娸、黎諾懿等，全部被 out，反而奀星張振朗、謝東閔、謝可逸、陳志健就有得留低，再由張繼聰夥拍岑麗香孭飛領軍。
兵行險着
「班阿頭覺得就算大卡士都未必一定有收視保證，相反好似《四個女仔三個 Bar》咁，大膽用一班後生仔女，因為有新鮮感，觀眾反而 buy，所以今次決定用晒班後生嚟孭。」一名劇組人員透露。
無綫兵行險着，大膽用新人本來無可厚非，但新班底只得岑麗香和張繼聰稍有知名度，其餘卡士包括吳業坤、何君誠等都弱到爆，後生網民觀眾一旦唔啱睇，隨時連班師奶客都留唔住，得不償失。
|
鍾意就快D Share啦！
|
|
|