熱爆娛樂: 照顧昏迷母　吳若希停工 [壹週刊

2015年4月2日星期四

照顧昏迷母　吳若希停工 [壹週刊 - 1308] 吳若希,M1,

探熱針

照顧昏迷母　吳若希停工

吳若希（ Jinny）母親謝芬芳上週六（三月二十八日）在大埔炒單車接受開腦手術後，至今仍處於半昏迷狀態；十年前吳若希經歷父親破產，父母離異，與細佬跟媽咪相依為命，意外後第二日便要扮無事照開工，情緒已失控的她，打算暫時停工照顧，直至母親完全康復。

匿埋喊

週一（三月三十日）下午五點半，電視劇《衝線》拍檔蔡思貝及周志文，陪同吳若希到醫院探媽咪，而出事後陪住她以及照顧吳弟的大隻仔溫家偉，則再沒有出現，有指 Jinny在微博半公開戀情後，即收到指示，要低調。

「佢哋都知咩事，所以唔敢再孖住出入，其實大隻仔好擔心 Jinny，見佢失控鬧番嗰個笑佢媽咪嘅網民，就知 Jinny情緒好差。」知情者說。

匿埋喊的吳若希，當日要戴超遮樣，講到母親情況，她坦言未敢樂觀。

「媽咪情況唔能夠用好去形容，只可以話比之前進步，過咗幾日水腫期，如果冇復發，就可以離開 ICU轉去其他病房。」吳若希說。

吳若希坦言近年媽咪才開始過安定生活。

吳母男友（黃衣）在事發現場接受查問，表示二人踩單車做足安全措施。

唔敢太急進

據了解，吳母手術後一直處於半昏迷狀態，為助母親儘快甦醒，吳若希每日會用個半小時跟她說話，胞弟亦會講些生活片段，為母親打氣；而每次聽到兒子聲音，吳母反應尤其明顯，不過也因此而令吳若希進退兩難。

「 Jinny細佬每次同媽咪講嘢，佢都好有反應，但腦壓亦因為咁颷升，因為 auntie本身有高血壓，所以唔敢太心急。 Jinny話成家人當中以自己最硬淨，如果今次冧低嗰個係佢，一定會好快起到身，因為佢仲要照顧頭家。反而 auntie離婚後變得脆弱，好多事都唔敢做。」知情者說。

大隻仔幫手照顧吳弟，出事後翌日，他孖住周志文接女友收工，跟住再去吃飯探病，陪到實。

慳錢食白飯

出身富裕家庭，直至在內地經營酒店的吳父十多年前生意失敗，吳母幫丈夫還清所有債後離婚，一個女人帶住姊弟倆移居香港，生活艱苦，近年吳若希事業開始有起色，才不讓媽咪工作。

「最初入娛樂圈， Jinny為咗慳錢，同朋友出街都係叫一碗白飯，近年生活改善咗咁多，以為媽咪可以開始享吓福，點知又搞成咁！每次見到媽咪全身插晒喉，叫佢有反應啲手腳會郁，有意識但冇力擘大眼， Jinny就好心痛。佢已經諗住停工照顧媽咪，加上細佬亦要人睇住，所以會同公司商量，完成手頭工作，等媽咪好番先再開工。」吳若希身邊人透露。

吳母仍昏迷，吳若希三日前在 facebook留言「喪喊完一輪」，並指實在忍得太辛苦。

網民攞吳母炒單車意外開玩笑，心情極差的吳若希忍不住在 facebook以粗口鬧爆。

剛播完的《衝線》以單車比賽為題材，吳若希也有份演出。

患難見真情

意外後第二日早上，壓力爆煲的吳若希仍要開工做節目《魔法王》，踩到下午一點多，大隻仔跟周志文帶同吳弟跟她會合，到九龍灣 MegaBox醫肚。患難見真情，大隻仔要睇住女友，又幫手照顧其弟。

「其實 Jinny細佬同大隻仔感情好好，兩個經常約埋打籃球；大隻仔亦好識氹 Jinny媽咪，成日讚佢煲湯好飲，所以 auntie經常叫大隻仔去屋企飲湯。」知情者說。

對於計劃停工照顧母親，吳若希在電話回應：「我有諗過，睇情況啦。」隨即掛線。