日系動漫落戶香港 3D精品齊搶灘 [FACE - 415 - 數碼科技] MF,

Geek友講場

日系動漫落戶香港　 3D精品齊搶灘

喺香港，有一種長期大賣嘅元素，叫「集體回憶」。只要曾經引起話題、有感動位，即使之後再翻炒，都必定有人撐！其中香港人嘅 all time favourite，日系動漫一定有份，而吸納咗唔少本地 fans嘅《海賊王 One Piece》、製作《龍貓》、《魔女宅急便》等嘅吉卜力工作室同《美少女戰士》，最近都落戶本港開設專屬 3D展覽同限定店，靠精品式布置同新品搶客。今次《 FACE》幫大家精選各個必睇、必買位，定力低者小心會否出現過度購物症，最後千金散盡、餐餐捱麵包！

香港海賊王 3D展覽

日期：即日至 7月底

時間： 10:00am-10:00pm

地點：尖沙咀加連威老道 96號希爾頓大廈 1樓

票價：$149、$100（ 3-11歲小童、 65歲或以上長者）

查詢：香港 3D奇幻世界（http://www.hk3dm.com.hk）

騎劫海賊王　施展拍攝創意

貴為「賊王」，登場形式當然與別不同，所以今次登陸尖沙咀之《香港海賊王 3D展覽》大玩近期流行嘅立體錯視布置，有索柏、路飛、娜美等一眾角色登場當布景版，亦展出動漫中〈薇薇伙伴的記號〉、〈前進號道別〉，以及〈海賊懸賞牆〉等 30多個 2D及 3D場景，方便大家用最有心思嘅「方法演技」，將自己完美融入漫畫現場。

今次我哋帶 FACE UStar校草 Phoebus到展覽現場進行拍攝，雖然佢事前話自己冇睇過呢套咁出名嘅動漫，但睇到場內製作得咁 detail嘅場面，再同佢講解劇情內容，都好快可以代入其中，發揮平時擅長 chok樣得嚟又帶點搞笑嘅演技。佢甚至見到平時鍾意娜美到發晒狂嘅山治畫像，都忍唔住要做「小三」，用錯視借位形式摸住臉介入佢哋嘅感情關係！不過，各位 fans可以放心， Phoebus係直嘅，因為見佢走完場內海洋迷宮，揭開布簾後見到 1:1女帝嘅興奮樣加心心眼，就肯定佢絕對唔係 hehe！

不論 2D或 3D場景都製作精美，一個字：「靚」！

〈薇薇伙伴的記號〉、〈前進號道別〉呢啲經典場面，冇理由唔相機食先啦？

Pop Up Store旁邊有個小型海洋迷宮，記得行埋先走，皆因有超 lady嘅 1:1女帝等緊大家。

拍攝要訣　限量精品一齊影

貴為全球首個《 One Piece》立體展，當中各大小布置都比想像中正，近鏡仲見到油畫筆觸，超有層次！不過 Phoebus體驗完後就認為要影得開心嘅話，都需要少少拍攝要訣。如果手頭充足，仲可以買埋 Pop Up Store新品，用嚟一齊合照可能更入戲。

貼士 1：請加小動作

遇上有烏索普呢種有道具（斗篷）輔助拍攝嘅場景，不妨加少少小動作撥起斗篷，令相片更具動感。

貼士 2：務必企啱位

要做好錯視效果同布魯克扮 moon walk，記緊企正黑影邊緣，同埋留意場景前方嘅「最佳拍攝位置」 icon，企定影相就一定 good take。

貼士 3：顛覆演繹

好似 Phoebus喺〈海賊懸賞牆〉點 chok都唔似被通輯，或者試吓做當下最自然嘅表情，可能仲有效果。

精選新品

頭巾$188

索柏毛公仔帽$130（粉紅）、$140（淺藍）

木質杯墊各$88

美少女戰士升呢潮 icon

如果話 One Piece 3D展係以場景布置呼喚大家嘅回憶，咁喺銅鑼灣世貿中心嘅《 TMDJ× Sailor Moon Pop-up Store》就肯定係走精品路線，貴精不貴多。唔少 deco同產品造型都有原著風貌外，又不失時尚一面。其實近年《美少女戰士》已成為唔少少女同中女嘅偶像，單係兩小時採訪期間，便有唔少女途人問及新品售賣詳情。

激罕 500珍藏

場內仲展示店鋪搞手王友良收集多年，合共 500幾件珍藏手稿及玩具，但估唔到係連麻雀（右）都有！

精選新品

阿提密斯立體八達通套$199

仿皮散銀包各$149

文件夾各$29

禮服幪面俠大型咕𡃁$1,280

螺旋愛心鏡盒大型咕𡃁$1,280

TMDJ× Sailor Moon Pop-up Store

日期：即日至 7月 25日

時間： 12:30nn-9:30pm

地址：銅鑼灣告士打道 280號世貿中心 P433舖

查詢：世貿中心（ 2576 4121）

橡子共和國　繼續合家歡

《美少女戰士》確實係 hit，之不過除非好似王友良咁鍾意佢哋，否則一般男仔陪另一半去睇嘢買嘢，齋等可能有少少悶。好在喺世貿中心附近，時代廣場那邊都有吉卜力工作室旗下嘅「橡子共和國」，內有飛天龍貓、貓巴士駐守外，仲有《龍貓》、《天空之城》、《魔女宅急便》等多款精品，仲加設「香港限定」專區，相信不論男女、大人定細路都想去影相、打咭同開心 shopping。

喺 9樓出 lift向左望，就見到飛天龍貓守候鋪頭。

店鋪會將新舊陳設共冶一爐，有 old school嘅《魔女宅急便》 corner，也有近來火熱之母親節花藝裝置。

精選新品

吉卜力角色造型手指玩偶各$20

《魔女宅急便》摺叠行李袋$390、《魔女宅急便》手提行李箱$1,110

《天空之城》 HQCD原聲大碟$120、《風之谷》原聲大碟$200

《幽靈公主》夜光樹精擺設各$90

《龍貓》迷你幸運石各$40

進軍時代　追加香港限定

近年時代廣場 9樓持續變天，人流冇以前仲有琴行、 Page One嗰陣咁旺，不過新開嘅橡子共和國應該會吸引唔少 fans朝聖，畢竟《龍貓》、《天空之城》等宮崎駿動畫深受香港觀眾歡迎，而且造型可愛，又有獨家飛天龍貓同有「銅鑼灣」字樣嘅貓巴士做吉祥物。加上時代廣場新店比尖沙咀舊店有更多「香港限定」新品售賣，好似《龍貓》攜帶式鏡盒連梳，唔用嚟梳頭，亦可以當小型按摩刷用，輕力刮吓手掌同指間關節，真係幾舒服。

香港獨賣

《龍貓》粟米造型毛巾套裝$200

《龍貓》攜帶式鏡盒連梳$60

《龍貓》水壺（左）、保溫瓶（右）售價、推出日期待定

橡子共和國時代廣場店

時間： 10:00am-10:00pm

地址：銅鑼灣勿地臣街 1號時代廣場 9樓 925C舖

查詢：橡子共和國（https://zh-hk.facebook.com/dongurirepublic.hk）

鍾意就快D Share啦！

下一篇 》