真人騷
一次封面影響一生 周嘉儀：下一次會諗多小小
告別新聞部女主播崗位， 32歲的周嘉儀話咁快已經返咗證券界新工一個月。
有十一年大台專業背景，再加上人靚，確係有着數：新工極速接軌，還有相當自由度，朝九晚六 Office Hour既可接受報刊訪問亦有得出席公開活動賺外快：「我嘅工作接近 marketing，見下報公司都覺得有幫助，不過好多嘢公司都睇得好緊，衫唔可以太性感、講太多自己嘢感情事都唔係太好，公司成日話叫講多啲證劵！」
咪玩啦，娛樂雜誌點寫證劵？好彩娛樂圈嗰一套，周嘉儀伸一伸脷，完全明白：「其實我有講，不過次次講完都冇人寫啫嘛！」
因為生得是正做咗「 bb」，因為受關注叉咗隻腳落娛樂圈，亦因為做咗半個娛圈人，和已婚前主播許方輝的戀情登上雜誌封面被停職，然後才會有報讀 EMBA和轉行的念頭，一切並非預期，卻又都是當事人一步一腳印自己走出來的路，後悔？她說她不是這種人。
「以前喺感情事上確係容易投入，下一次我會小心啲、會諗多小小。過咗去嘅嘢，望返轉頭都意義唔大，人生每個階段出現嘅人、發生嘅事都對下一步有幫助，所有嘢一環扣一環，雖然嗰一年嗰個經歷係我人生低潮，原來有危亦有機。」
說起來容易，但是一夜之間由小花變別人眼中的小三，你估話咁易？
我唔係花瓶同讀稿機
由主播變娛樂版頭條，係唔係預期？
的確唔係預期之中嘅事，但係近年見到主播明星化係趨勢，好似又好難避免，其實我係想上財經版多過上娛樂版。
可以點上財經版？
未來我都會考證劵相關牌照，都有財經記者打嚟問我股市……但𠵱家呢個階段我唔可以 conmment住。等我讀完個 EMBA先，仲有兩個月畢業，跟住就要考牌。
讀財經、轉行呢一步，又係唔係預期？
我 2013年報城大嘅 part time EMBA課程，我都想學以致用，再講主播都 11年，係時候換下工作環境。同新聞冇乜直接關係，我讀，除咗因為有人介紹我去，亦因為我覺得會擴闊自己人脈關係。我嗰班同學，酒店又有，開廠又有、做 bank又有，真係嚟自五湖四海。
咁樣聽落，呢個圈子有錢人多？
咁又唔係咁計，呢班同學好成熟，工作經驗又多，喺佢哋身上可以學好多嘢。
新聞同財經係唔係兩個世界？
兩個行業其實好相似，節奏都好快，報新聞我喺 24小時頻道、每半小時要報一次，同事採訪完返嚟好快已經要剪好出街。財經公司亦都係，尤其呢排個市咁旺，見到啲同事好緊好快落盤，兩個行業我都鍾意，我鍾意刺激……但報新聞已經 11年，唔多唔少流水作業覺得悶，再報多兩、三年唔係話唔得，但始終幕前工作唔會提供到一個長遠嘅發展，所以會諗轉工作環境。
其實係唔公平，喺職場能幹又要靚，女性就總被人懷疑靠咩上位。
都試過……我覺得越係俾人懷疑能力，越係要證明自己表現，最終一定有人眼睛雪亮會睇到你嘅付出。呢樣嘢係我做宗旨。出邊好多人話女主播就係花瓶、讀稿機，真係聽唔少，啲人覺得我哋化靚個妝、梳好個頭，就係咁簡單，其實背後都有付出努力你哋睇唔到。最基本，稿讀得流暢要花時間，做 live要有技巧，一個兩個鐘嘅直播節目，我用咗一個月時間去準備又有冇人知？立法會競選節目，我哋係背熟咗所有競選人嘅資料在先，同埋主播係最後把關嘅一個，頭腦要清晰、責任亦好重，絕對唔係化靚個妝梳靚個頭就可以。
主播最唔應該變新聞人物
一開始點解會做記者？
我唔係嗰啲細細個就立志做記者嘅人，都係中七揀科，怕悶唔想做辦公室，覺得讀傳媒可以接觸好多人，見證到社會大事，傳遞訊息之餘，理想啲嘅諗法亦可以改變不公義……
讀書年代，你係唔係一樣咁搶眼？
細個我好文靜、怕醜，從來冇諗過自己有一日靠把口搵食……俗啲講句。我媽咪話我三、四歲時講嘢仲係黐脷根，學講嘢進度好慢，佢直情擔心我係唔係有障礙。
跟住入電視台，因為靚俾人留意、截圖、叫 bb，感覺如何？
我又唔係第一個，喺我之前已經好多師姐試過，幾得意嘅，見到有人談論我，但係點都係新聞工作者，我唔會當我係明星，舊時嘅上司都成日提點我哋，我哋係報新聞，唔好變咗新聞入面嘅人物。一個主播應該要中立，因為我哋係想公眾 focus喺我哋傳達嘅信息，而唔係我哋……
結果你就走咗去新聞裡面……
係囉……都唔知點解……
普通人可以選擇保守秘密，但當你出咗名，最唔想人知嘅嘢（與已婚主播許方輝緋聞）全世界都知，嗰一下嘅感覺？
就係……無奈，有啲不知所措。第一時間，要諗下點同公司、屋企人交待。尤其係屋企人，佢哋最錫我，最擔心我，嗰一晚所有嘢都嚟得好快，已經唔到我一步一步去解決。
同屋企人交待啲咩？佢哋擔心你啲咩？
唔想再講嗰件事，但係我好開心，可以得到佢哋嘅支持同諒解，慶幸風吹雨打，到咗呢個時候我至知屋企至係真正嘅避風港。
係唔係呢啲時候就見到邊啲係人，邊啲係鬼？
我諗我啲精神主要擺咗喺 care我嘅人身上，其實成件事，關心我嘅人多過落井下石嘅人。
呢件事之後強逼放假，係唔係直接令你諗轉行？決定讀 EMBA？
都唔係嘅，從來都知做女主播唔會做到六十歲，我咁多年都有諗，但嗰一下係有加速咗籌備同行動嘅進度。我更關心嘅係我前途……
從來唔信童話式愛情
有喜歡就有唔喜歡，跟手又嚟咗好多 haters，見到啲負評你嬲唔嬲？
我唔會諗嘢太負面，始終冇辦法討好所有人，惡性批評咁多年聽唔少，如果樣樣都理，就真係好唔得閒。
有冇諗過邊度走出嚟咁多人話你貪錢、收禮物、揸靚車、識有錢人又講同事事非？
問心無愧……我真係取悅唔到咁多人，所以都係嗰句，問心無愧，做好自己嘢就算。
你係唔係真係講過男朋友起碼要月入七萬？
我真係冇講過，我真係唔明喺邊度走出嚟，總之唔係出自我把口……話送我返屋企嘅金融才俊只係普通朋友，話咩揸靚車，都係八、九年車齡，好舊嘅 Benz，係我自己買，絕對唔係咩貴車。
咁你覺得搵男朋友，對方應該月入幾多？
總之唔係講月入，兩個人相處最重要一定係溝通，係睇相唔相處到，要睇生活習慣、價值觀同埋方向一唔一致，搵幾多係身外物，當係 bonus。
今年 32歲，有冇開始心急？
都急唔嚟，你話工作生活我可以控制到就有得急，但感情想急都急唔嚟。我都唔知點解，大家對我呢方面特別感興趣。
你話你做人 EQ唔錯，拍拖呢？有冇 EQ？
醒唔醒？
小脾氣我都會發，但係醒唔醒……我又冇咁樣計算，今次我拗贏你，我唔係嗰啲人。
為咗愛情，你唔理錯對，覺得啱就去馬？
以前都投入嘅喺感情方面，下一次我會小心啲，會諗多小小。每一次感情關係都學到嘢、都吸收到經驗，令我自己更瞭解自己、知道自己想要啲乜。我諗人生每個階段出現嘅人、發生嘅事都對下一步有幫助，我又唔會話上一次係衰咗、瀨咗嘢。
咁同嗰位主播嘅一段，你又學到啲咩？
我諗我會更加珍惜對我好嘅人，原來有人支持有人錫唔係必然，以前唔識表達，𠵱家都學吓關心人哋。
愛情係唔係冇錯對呢？當時你肯去馬係唔係都有你嘅原因？
唔談論過去喇，過咗太耐，我想向前望。我從來都唔係嗰啲人，唔相信童話式嘅愛情，我相信每段感情都唔會一路暢順，都有階段需要磨合需要了解。
32歲人，同許先生嗰次係唔係跌得最傷？
一生都算順利，嗰次的確係一個低潮。但過咗去，有危亦都有機，都係因為嗰年經歷，我至會諗進修、諗轉行，呢個世界嘅嘢都係一環扣一環，就算低潮都無謂諗得太灰太負面。
|
鍾意就快D Share啦！
|
|
|