世榮先斬後奏 家駒紀念 show泡湯 [壹週刊 - 1315] 世榮,葉世榮,M1,

家駒離世後， Beyond三子各有心病，要再次同台，談何容易！？

探熱針

世榮先斬後奏　家駒紀念 show泡湯

日前，葉世榮向外公布將與家強阿 Paul重組 Beyond，於年底舉行「真正紀念家駒演唱會」，並已入紙申請紅館檔期。講到言之鑿鑿，但原來世榮只是先斬後奏，阿 Paul家強一直不知情，事件見報後，世榮才以短訊知會二人。被人擺上枱，阿 Paul嬲爆同友人呻：「又攞家駒個名搞騷，冇知會我，我亦唔會做！」至於黃家強亦講到明：「冇可能！」

自把自為

○五年 Beyond三子舉行告別演唱會，自此是是非非一直沒完沒了。阿 Paul家強不和，不時句句有骨互相數臭。至○九年，家強阿 Paul突然破冰，飛起世榮合作開騷，但完騷後又再反面，近兩年關係更有惡化跡象，家強曾親自撰寫「萬言書」，公開阿 Paul八宗罪，坦言不會再重組 Beyond。

較早前，世榮單方面公開表示年底會舉行「真正紀念家駒演唱會」， Beyond三子將重踏舞台的好消息，令不少 Beyond迷起哄熱切期待，但原來一切只是世榮個人意願，事前未有知會阿 Paul和家強。

「阿 Paul睇到報導先知有件咁嘅事，最離譜係世榮喺件事見報之後先發短訊通知佢，連電話都冇個，短訊內容係話有人會喺六月搞家駒紀念騷，與其俾人搞，倒不如自己搞好過，話稍後會再同佢傾。其實呢幾年世榮不停用 Beyond個名喺內地做巡迴，阿 Paul已經唔係咁鍾意，但亦管唔到，今次拖埋佢落水，事前又冇聲冇氣，太過分！」阿 Paul友人說。

除了埋首創作音樂，阿 Paul近年亦專注畫畫。

Beyond三子反面，首個導火線是來自朱茵。

拒絕重組

至於身為家駒親弟的家強，同樣是見報後才「被通知」。

「家強冇諗過世榮會咁冇分寸，佢所屬嘅經理人公司都係睇到報導，先打電話俾世榮了解，佢冇講詳情係點，乜都未傾！」知情者說。

本週一（五月十八日），家強接受新城電台訪問，就重組一事作出回應：「 Beyond已經緣盡！問心講，家駒唔喺度都冇乜嘢意思。」

就年底會否重組 Beyond舉行「真正紀念家駒演唱會」，阿 Paul經理人回應說：「其實上個禮拜出報紙時都未知！佢都係呢兩日先 call我哋負責內地嘅經理人，但詳細嘢未知，（阿 Paul會唔會做？）阿 Paul呢排忙緊新歌同工作，佢哋要同我哋呢邊溝通，要睇番晒啲時間先知！」

○九年兩子開騷，再因演出鬧不快，傳一度大打出手。

近年世榮長留內地做巡迴，亦以 Beyond個名做賣點。

千絲萬縷

自家駒離世後，餘下三兄弟屢傳不和，尤其阿 Paul和家強，更經常爆發隔空罵戰，去年阿 Paul在微博爆粗鬧家強，二人正式決裂。

懷疑放料

03年，阿 Paul跟朱茵到蘇梅島度假，傳媒追踪拍到朱茵素顏穿三點式，其後阿 Paul懷疑身邊有人放料，矛頭直指家強。

互當透明

05年， Beyond舉行告別演唱會，阿 Paul與家強因選曲意見不合，二人即使同台亦互當透明。

缺席婚宴

06年，家強與日籍妻子補擺結婚喜酒，阿 Paul未有現身，事後有骨落地表示要去北京為愛犬配種而缺席。

陷入僵局

08年，阿 Paul與世榮在北京開「 Beyond雙傑演唱會」，引起家強不滿，指二人借 Beyond之名賺錢，阿 Paul不甘示弱，反擊指家強兩年前亦曾用 Beyond之名開 show，二人關係陷入僵局。

世榮缺席

09年，世榮在內地開 show，主辦單位以 Beyond之名作招徠，惹來家強不滿，其後家強與阿 Paul合作開 show，只透過助手通知世榮，世榮一怒之下缺席。

冇收囍帖

12年，世榮在北京結婚，阿 Paul與家強冇收到囍帖，對婚事毫不知情。

Beyond沒有了

13年，家駒逝世 20周年兼 Beyond成立 30周年，家強計劃開紀念 show，但不是重組 Beyond，並公開說：「對不起！沒有 Beyond了！」

攞記者上枱

13年，有記者公開與家強的合照，由於阿 Paul和記者有私怨，於是留言狂插對方，並埋怨家強跟「毒人」一夥。家強則留言回應：「當我兄弟就不要說我什麼和毒人一夥，多傷心！」二人罵戰引起網民關注。其後家強於微博上載一封「給家駒的信」，內容寫到自己「沒有把 Beyond守護好」，再次激怒阿 Paul。

萬言書

近年阿 Paul與前經理人 Leslie不斷數臭家強，去年 10月，家強在微博發文狂數阿 Paul八宗罪，逐一反擊多年來阿 Paul對他的無理指控，並發毒誓以「死全家」證明句句屬實，又公開 Beyond解散真正原因是阿 Paul不想再養世榮，要求個人發展。

鍾意就快D Share啦！

下一篇 》