《賤熊 2》替左膠發聲 [壹週刊 - 1315 - hotpot] M1,

電視精

《賤熊 2》替左膠發聲

三年前，《賤熊 30》（ Ted）以五千萬美金的成本，全球狂收五億美金，集導演、編劇、配音於一身的 Seth MacFarlane，紅到做埋奧斯卡司儀。

靠乜？靠口臭，靠鹹濕，靠意識不良教壞細路。來到續集《賤熊 2》（ Ted 2），本來應該俾班道德佬剷死，偏偏劇情講到平權，講到賤熊要同一般男人睇齊，擁有同人類結婚再生兒育女的合法權利，中晒左膠口味。

Well，政治咁正確，應該老少咸宜喎！

換女主角

有種人，在幕後諗計，還可以，一出幕前，必死。我不是指李力持，係話緊 Seth MacFarlane。

拍《賤熊 30》，紅爆，做奧斯卡司儀，用番同一種 style，被批評過分低俗。小事啦，似林家棟似陳小春，做司儀又唔係正職，俾人插有幾閒。之後自編自導自演的《奪命西》（ A Million Ways To Die In The West）才大鑊，美國票房得四千萬美金多少少，口碑一面倒負評，笑料賤格唔緊要，賤得嚟唔好笑就好大罪。想收復失地？都係拍番《賤熊 2》啦。

上集的女主角，做 Mark Wahlberg條女嘅 Mila Kunis，因為俾 Ashton Kutcher搞大咗個肚，今集無影。導演見過鬼唔怕黑，居然搵番《奪命西》兩位配角 Amanda Seyfried同埋 Liam Neeson加盟。

嘩，呢兩個都係配角？係呀，《奪命西》基本上係 Seth MacFarlane的不停個人自娛。咁都收到四千萬美金，算很厲害了。

上集， Jessica Barth未算有什麼戲份，今集就重要了，嚟緊仲會喺一套笑片同一齣恐怖片做女主角，神奇。

講你都唔信，拍咗咁多年戲嘅 Mark Wahlberg，竟然從未拍過一套戲之後，再拍埋個續集，今次係第一次。

Amanda Seyfried今年有好幾齣戲會上畫，除咗《賤熊 2》，同 Hugh Jackman合作嘅《小飛俠魔幻始源》《 Pan》，講 Peter Pan，更受矚目。

反政府

電影安排喺六月尾上畫，同期無乜大片，一到七月，有《未來戰士》又有《迷你兵團》，對手硬淨好多。

冇咗 Mila Kunis，唔緊要，因為人類 Mark Wahlberg可以換女朋友，反而扮演賤熊個收銀員女友嘅 Jessica Barth一定要留低，因為今集講賤熊打算結婚生仔，如果講佢換咗畫，就好唔合理。

Jessica Barth又係導演班底，幫開導演創作嘅卡通《 Family Guy》配音。開始上位啦，嚟緊會喺啲小本製作升上女一。算好難得，不要忘記，在《賤熊 30》，佢嘅戲份其實都係得好少。

上一集，靠新意，要隻熊啤啤爆粗隊草飲酒非禮，加少少男人之間的友情，刀仔鋸大樹。今集，新意無晒，仲由溝女熊變成住家熊，如何撐下去？靠反政府。劇情講到政府要賤熊證明自己係符合法律定義的人類，先俾佢生仔。於是， Amanda Seyfried飾演的女律師，幫賤熊打官司。

希望啲證供唔會又被揭發前後矛盾不盡不實亂咁屈人，搞到場官司無得打住先。

鍾意就快D Share啦！

下一篇 》