熱爆娛樂: 兩入 ICU借錢交租　失寸 Barbie焗做 OL [壹週刊

2015年7月30日星期四

兩入 ICU借錢交租　失寸 Barbie焗做 OL [壹週刊 - 1325] Barbie,夏尉喻,M1,

探熱針

兩入 ICU借錢交租　失寸 Barbie焗做 OL

已經五個月冇蒲頭的寸嘴 Barbie（夏尉喻），上週以 35D爆乳女神打扮出席動漫活動，曾兩度入 ICU，走出死門關的她，年初拍完星爺新片《美人魚》後身體又出問題，惟有推 job保命。半年冇收入， Barbie要厚住面皮問朋友借錢交租，數月前更收起寸嘴轉做 OL，日日搭巴士入大埔返工。

半年零收入

三個月前， Barbie開始在 IT公司任職市務助理，每朝七點起身，由北角出發到科學園返工，全職做 OL，接到賺錢活動或要返內地登台，才會向公司請假。

本週一（七月二十七日），一身套裝打扮的 Barbie在午飯時間抽空接受訪問，坦言生活逼人，焗轉行！

「娛樂圈收入唔穩定，有時好好收入，有時係零，拍《美人魚》因為成日浸喺水，搞到身體好差，醫師話我寒氣重，好多時都瞓唔到，扎醒會成個人濕晒，連床單都濕埋。因為荷爾蒙亂咗，成個人又愈來愈腫，狀態咁差，根本唔想見人。要保住條命，唔可以俾自己太操勞，所以開始去朋友公司返工，過番啲正常生活，亦有穩定收入。」 Barbie說。

講到跟前度分手原因， Barbie忍唔住喊晒。

接受訪問當日， Barbie朝早九點已經返到公司。

因做過心臟手術，左腋有一條長疤痕，她說：「啲人話我隆胸，要做又點會淨係做一邊呢？」

ICU寫遺書

只有三十歲，已經兩度入 ICU徘徊生死邊緣， Barbie更加珍惜健康。

「五年前，我突然暈低，屋企人即刻送我入急症室，發現心臟酵素有問題，原來係突發性心肌炎，喺 ICU第四日，打咗兩次強心劑都冇反應，醫生試過凌晨五點叫晒屋企人嚟見我最後一面，仲要我簽埋遺書。後來轉咗藥先有起色，頭尾住咗 ICU十一日。隔咗幾年，又再復發，心臟積聚咗瘀血，我突然呼吸唔到，嗰次一個人喺屋企，自己打九九九叫白車入院，手術後腋下仲留咗條好長嘅疤痕。」

死過翻生， Barbie不敢再掉以輕心，有真人騷找她到泰國玩危險水上遊戲和沙漠狂奔，統統推掉。冇 job冇收入，連八千蚊租都要開口問朋友借。

「嗰段時間幾乎冇收入，業主又加租，我真係頂唔順，所以問朋友借咗幾萬蚊，而家已經搬返去同屋企人一齊住。生活唔穩定令我好不安，好徬徨；拍戲係體力同精神雙重透支，所以公司鼓勵我休息，等身體好啲先再開工。」 Barbie說。

她在 facebook放了不少開工相，由於打工的是 IT公司，若毋須見客，她會著短褲背心。

日前出席動漫活動， Barbie開始惜肉，在性感長裙下打底。

二月時，本刊拍到她睇中醫，她也在微博透露自己在家煲藥。

拍《美人魚》前，她跟蔚雨芯、松岡李娜等接受游水訓練。

正式拍攝，她連續個幾月都浸在水開工，最後搞到發水腫。

男友介意露肉

做上班族，暫時解決生活問題，對演藝事業的取捨，也令入行以來賣性感的 Barbie十分困擾。

「我覺得自己去到一個樽頸位，不斷重複做呢啲角色會被標籤化，但如果唔再做，又可能冇晒機會。有時我會同自己講，呢啲係角色需要，外界唔會因為咁對我有偏見。坦白講，我都好矛盾。」

父母在 Barbie八歲時離婚，現各有家庭，一家人每年只見面一次，由祖母湊大的她，習慣一個人面對壓力，也練就出樂觀性格，唯有因為工作「行性感」，導致先後跟兩個前度分開， Barbie才無奈到喊。

「同之前兩個男朋友分手，唔多唔少都係為呢樣嘢。頭一年拍拖好甜蜜，大家都聽唔到身邊人講咩，到兩個人有拗撬，就會成為問題。做演員要面對唔穩定生活，拍戲投入角色之後又要識得抽離，好多嘢外間人未必諒解，有時都好無助。不過我都樂觀嘅，相信有日會搵到明白我嘅人。」 Barbie說。