插圖：劉志誠
壹出擊
此「萬靈」不同彼「萬寧」 禮品網玩諧音 sell客
「你好！我哋係『萬靈禮品網』打嚟……」呢個推銷電話，你一定有聽過。但此「萬靈」不同彼「萬寧」，打電話來推銷的，其實只是諧音網店， sell的更是美容服務。若果大家以為是大型連鎖店的推銷而中招落疊，擾人電話，陸續有來。
美容、貸款推銷電話猖狂，不少港人不勝其煩大多「 cut線」了事，但「萬靈禮品網」，就令人聯想到大型連鎖生活用品店「萬寧」，不少市民亦因此中招，成功讓對方爭取時間推銷。
萬寧定「萬靈」？
「萬靈」二字，令人即時聯想到「萬寧」。職員一輪嘴落力推銷，「我哋係『萬靈禮品網』打嚟，想送番部多功能洗面機俾小姐你。」原來是要求客人「自費」到指定美容院做美容服務，事後再任「評分大使」評分。
不過，直到記者追問「萬寧」門市何時開始提供美容服務？她才作出解釋：「我哋唔係嗰個『萬寧』，係『靈』魂個『靈』，我哋係東南亞禮品美容服務試用平台，專門監測美容中心服務質素，同品牌『萬寧』無關㗎。」
她游說記者以優惠價到詩琳、水磨坊、水瓶座、 DR REBORN及研美等美容中心試做面部護理，又指完成服務後，只要協助評分，便可再獲贈洗面機一部。
蛤蟆隨街跳？
記者於是預約到「水瓶座美容健康纖體中心」尖沙咀店試做面部護理，全程 1.5小時，該店環境、美容師手勢及服務皆為一般；但完成服務後，以$99埋單，而美容院職員亦沒有再硬銷美容套票。
約一星期後，記者再收到短訊，簡單為今次服務評分，之後便獲通知，可到旺角柏裕商業中心另一間叫「研美」的美容院領取洗面機及面膜。
拎贈品的過程順利，並沒有被硬銷；不過，獲贈的洗面機包裝極為簡陋，零件及設計亦甚是兒戲，說明書上的英文更是錯漏百出，與日、韓品牌洗面機相距甚遠，消費者會否放心使用，確實見仁見智。
拆局： Junk call吸客
記者多次向「萬靈網」職員索取公司及網站資料，但對方拒絕提供。職員又聲稱，「萬靈網」會不定期與不同美容院合作，根據公司註冊處資料，其中位於旺角、負責派發禮品以及提供美容服務的「研美」，前股東正是今屆書展大熱的「美魔女」羅霖，她在去年五月將所有股份轉至另一股東何淑雲名下。
HK Junk Call創辦人胡文翰指出，「萬靈網」的推銷電話早於二○一二年年底出現，根據 HK Junk Call的統計，系統累積至今已有近七萬人次舉報。他又指，此類電話由專做「 cold call」的電話推銷公司發出，愛用似是而非的公司名，例如「萬靈」、「平果」等等，務求令客人減低戒心打開話題。「（ Cold call的電話公司）估計跟美容院係兩個獨立個體，但至於母公司、最上層嘅公司有無關連，就不得而知。」
壹仔報告：中伏了！
雖然「萬靈禮品網」確實安排了$99的美容護理服務兼有禮品贈送，但記者其後卻一直收到同類推銷電話，每週數量多達十次以上，甚是滋擾。胡文翰亦估計，同類型的電話推銷公司會在過程中收集客人資料，在整理後出售，若果大家貪小便宜攞着數，分分鐘自找麻煩兼變搵自己笨。
|
鍾意就快D Share啦！
|
|
|