2015年8月12日 星期三

年尾再開分店 前歌手 Oscar賣生煎包:做普通人最舒服 [FACE - 429] Oscar,蕭潤邦,MF,



Oscar曾經係 Bliss成員,未紅齋黑,轉行賣生煎包反而多人識, Oscar話好滿足:「可能我到 60、 70歲嗰陣好想唱歌,咪捐啲錢去《歡樂滿東華》唱歌囉!」

爆 Like王

年尾再開分店 前歌手 Oscar賣生煎包:做普通人最舒服

蕭潤邦( Oscar)?乜水嚟㗎?唱過歌?係咪 EO2嗰個呀?如果我話旺角生煎包嗰個呢!係咪有啲印象?

Oscar的確做過歌手,係 2人組合 Bliss成員,紅唔起, 5年前的起心肝去上海學師整生煎包,返港同朋友夾份喺旺角開咗正式上海生煎皇,最初只得立食,後來口碑好開新店,上星期喺深水埗又開多間。你以為娛樂圈冇人理佢?開幕當日女神謝安琪同張繼聰都帶埋囝囝張瞻去幫手,男神王宗堯都去剪綵!做唔成歌手, Oscar反而更滿足。

採訪當日,深水埗新鋪座無虛席,不停有圈中幕後、電台 DJ等一家大細嚟幫襯。打個招呼,食完畀錢,唔攞折頭,你話點解呢?

F:賣生煎包係咪開心過做歌手?

O:其實係,做歌手好多嘢唔係你去控制, 100樣嘢得一樣嘢係你控制,你好努力去做一隻音樂,但係冇人聽,冇人用正常方式去聽;而好多人好似唔需要音樂咁。香港音樂好似香港足球咁,你覺得好差,冇人入去睇波,係惡性循環,如果你覺得樂壇就死,唔聽歌就真係死。我仍然愛音樂,有時聽到好歌會 WhatsApp啲 DJ朋友問係邊個,有時愛嗰樣嘢唔一定要做嘅。

Oscar喺福榮街開分店之餘,喺同一條街又開咗間 café,因為見同區冇呢類食肆喎,真係有生意頭腦。

F:由歌手轉型有冇着數同壓力?

O:啱啱開嘅時候真係好似籌款節目,由開鋪至收工,係無間斷有 artist落嚟同我打氣,可能我嗰陣廿歲尾,佢哋覺得後生仔係應該咁,做唔到(歌手)都唔好死,搵到另一條出路;佢哋喺微博度 share,個個落嚟叫我努力!啲客都係咁,第 1日開鋪有幾百人圍住我間 100呎鋪,嘩!我諗點解會咁,我唱歌嗰陣時,下面得幾個人咋嘛,我冇知名度所以冇乜壓力,有啲人指住我講極講唔出我係邊個,或者講錯係第二隊 band,冇所謂!我可能以前做得唔夠好。我開鋪就同自己講,今日你唔記得我唔緊要,希望你食完我啲嘢之後,會記得呢度有間上海生煎皇,其實我做普通人最舒服。

謝安琪、張繼聰帶埋囝囝張瞻,仲有連詩雅、陳柏宇等為 Oscar深水埗分店煎綵, Oscar同 Kay係多年老友:「我哋都經歷過好多嘢,我係睇住佢囝囝出世嘛,唔好話畀唔畀面,我哋唔計呢啲!」

男神王宗堯都有嚟撐場,仲不停讚啲生煎包好食。

Oscar話喺旺角開第一間鋪時,最感動係見到鄭裕玲嚟捧場,佢哋有乜淵源?下載 FACE Pop睇片話你知!網上圖片

F:開食肆最困難係乜嘢?

O:食肆競爭好大,啲條例令門檻好高,例如開時裝店 50萬搞得掂,但食肆可能要 150萬,唔係因為要靚,而係好多條例加重裝修負擔,安全要緊,但有啲條例過火咗啲,如灑水系統要睇有冇後門,條例又年年改;所以趁𠵱家仲有咁多人俾機會自己,發展步伐要急少少開分店,譬如旺角如果租約完咗,傾唔成要關門,得一間就冇得做,要令生意生生不息。喺深水埗店同一條街我仲開咗間 café,年尾會喺港島區開多間生煎皇。

Bliss同過好多歌手合作,好似吳雨霏啦;另一成員古馳(左一)現已轉職教琴。《蘋果日報》圖片

F:做過吓歌手有助創業?

O:一開始時已每樣嘢都落手落腳做,麵粉師傅呀、扒爐師傅呀、倒垃圾、送外賣全部做過晒,所以𠵱家都抽唔番身出嚟做個投資者身份,見到塊布污糟要即刻洗,伙計唔覺得我係巡鋪嗰啲高層。我亦好感激啲食客,𠵱家又熱又濕,佢哋都喺門口排隊,以前立食間鋪,啲客同個爐好近,食生煎包食到流晒汗,所以我叫啲伙計要對客人好啲;做過歌手係幫到一部份,但食物質素同待客之道更加重要。

F:《 FACE》

O: Oscar

攝影:周倪瑩、楊學

鍾意就快D Share啦!
Related Posts Plugin for WordPress, Blogger...