2015年8月12日 星期三

麥明詩寸龐卓欣有拖拍晒命 麥明詩,龐卓欣,



12位候選港姐佳麗昨日出席活動,「宿敵」(1)麥明詩與(4)龐卓欣一直鬥得難分難解,被大會安排同組玩遊戲,表面雖然和平,但原來背後鬥寸鬥餐飽!「金句王」麥明詩受訪時被問到感情生活,表明單身的她坦言感情事不需曝光,暗示龐卓欣擺男友上枱晒命,而龐卓欣聞言即反擊只是維持正常關係。

承認單身的麥明詩(右)對高調拍拖的龐卓欣(左)有微言,暗寸她擺男友上枱晒命!

龐卓欣反擊指只是普通情侶般行街拍拖……咦……一陣港女味喎!

龐卓欣初入選時已被爆愛在社交網上載親密照,更被拍到街頭公然攬仔。

麥明詩(右一)與龐卓欣(左二)同組合作「默契」十足,更贏得獎項。左一為馬詩晴、右二為羅丹虹。

各佳麗花盡心思美化面膜,但好似有啲Hea喎……

今屆港姐競選的焦點一直落在兩大宿敵「10優狀元」麥明詩(Lousia)與「寸嘴Ada」龐卓欣身上,這對由小學鬥到選美的宿敵,曾坦言選港姐後才開始稔熟。昨日一班候選佳麗齊齊出席活動時,被編為同組的兩人表面看似和平,但原來背後「出口術」互放暗箭!

承認單身:唔想成為焦點!

12位候選佳麗昨日出席莎莎化妝品活動,各人穿上鮮艷上衣配白色短褲!大會安排12位佳麗分成三組,宿敵麥明詩與龐卓欣夥拍(2)馬詩晴與(3)羅丹虹為一組,即場在面膜上畫圖案作美化。麥明詩與龐卓欣全程有講有笑,甚有默契,最後更成為冠軍獲頒發「莎莎美麗皇者」,影大合照時更笑到四萬咁口,十分老友!

事後,麥明詩受訪時坦言年少時十分懶惰,讀中學時仍以素顏示人,直至讀大學才醒覺要扮靚:「以前掛住讀書,讀大學放暑假去律師行實習嗰陣先諗吓,係咪我要化啲妝感覺莊重啲呢?」提到感情生活,她則支吾以對表示曾拍拖:「依家冇散咗喇!係香港人。(拍過幾多次?)唔講感情事,唔想感情事成為焦點。」不過,提及宿敵龐卓欣早前被本報獨家拍到以「箍仔三式」拖手、翹臂及攬頭與男友拍拖,戀情公開於人前,暫時於《東網巨星》Facebook推出民選投票《港姐任你Like》第二階段「腦筋急轉彎」領先的「金句王」麥明詩即發揮本色,聞言即話裏有骨:「大家路線唔同,我覺得呢啲嘢雖然係見得光,都唔一定要擺出嚟曝光。(咁龐卓欣高調?)呢個係佢個人選擇。」

反擊高調:都要維持關係!

面對麥明詩的「指控」,龐卓欣隨即反擊否認高調,只是正常拍拖生活:「我唔高調!普通情侶行街睇戲,我都要維持關係,被傳媒影到都冇辦法。」問到與麥明詩玩遊戲時甚有默契,她承認參選後「Close咗」,又指並不介意被外界比較,但問到較睇好誰人奪冠即說:「真係唔知。(你想呢?)咁我想係我囉!」

採:影視組

文:專案組

承認單身的麥明詩(右)對高調拍拖的龐卓欣(左)有微言,暗寸她擺男友上枱晒命!

龐卓欣反擊指只是普通情侶般行街拍拖……咦……一陣港女味喎!

龐卓欣初入選時已被爆愛在社交網上載親密照,更被拍到街頭公然攬仔。

麥明詩(右一)與龐卓欣(左二)同組合作「默契」十足,更贏得獎項。左一為馬詩晴、右二為羅丹虹。

各佳麗花盡心思美化面膜,但好似有啲Hea喎……

鍾意就快D Share啦!
Related Posts Plugin for WordPress, Blogger...