掃呢頁CODE去手機

2015年8月12日 星期三

唔認女尊男卑 林文龍:如果係真,郭可盈走咗十世啦! [FACE - 429 - 專訪] 林文龍,郭可盈,MF,



真人騷

唔認女尊男卑 林文龍:如果係真,郭可盈走咗十世

一見林文龍,我同攝影師異口同聲:「真係由細睇到你大!」

絕對唔係誇,原來今年 48歲,林文龍未夠 18歲去選《超級新星》,離開訓練班兩年就開始擔正,簡單嚟講,即係入行 30年,有 28年都做緊男主角。

林文龍啲電視汁雖然撈大幾代港人,不過他也承認,自己一直爭咁啲嘢。

未做過閒角,不過從來未去過所謂事業高峰;做戲係男一,做人嘅光芒卻總被老婆成就和家底蓋過。

直到五年前女兒出世、郭可盈收山,這個維持二十年的女尊男卑局面才總算扭轉,尤其呢個月,港視兩大壓軸劇《三面形醫》和《 Night Shift》接連成為話題,主演獨立電影連奪三個影帝,最威威係,林文龍正係攞咗 27個電影獎、《我們停戰吧!》的幕後老闆。一套戲話俾你知,林文龍有演技、有眼光、其實仲有私己錢開戲開公司。

「女尊男卑?有人咁講過我哋咩?呢個世界除咗我阿媽,冇人比老婆更了解我,如果我真係不務正業、唔可以依靠終身,講真,郭可盈走咗十世」

話說拍攝這天,剛好遇着廿年《忽週》終結號,林文龍話嗰頭至喺隔籬安慰完啲記者行家:「唔係拍港視我唔會識 Rachel(《我們停戰吧!》編劇兼女主),唔係港視攞唔到牌,佢唔會自己寫劇本、唔會攞嚟搵我投資,我哋就唔會拍成呢套戲……當初港視攞唔到牌,我哋都好徬徨,但係你永遠唔知,下一步可能更加好呢?」

我都知柳暗花明又一村,不過前提係你要有錢投資自己做老闆先囉……於是,我們這天的對話就從「你點同呢?」四個字開始。

由恒生櫃員,到大台小生

你點同呢, HKTV好多藝員等開飯,但係你一直唔憂做咁款?

吓……我唔擔心開飯?但入行到𠵱家,我條路唔可以話好辛苦,但亦都唔係一帆風順。我冇去過所謂嘅好高峰,但又冇跌過落谷底,老土啲講句,比上不足比下有餘。

咁咪即係唔憂做囉!入行三十年枕住係男主角,你仲覺得比起人唔夠?

冇㗎,我冇㗎,都冇得比,佢就係佢,我就係我,佢做到我嘅嘢,我仲使生存嘅?反之亦然。我好記得訓練班王天林、天林叔,入嚟課室第一句說話就係講:「小朋友,我唔理你哋有幾靚仔幾靚女,演戲幾叻,我哋呢一行呢,係絕對需要運嘅!」

87年同屆訓練班仲有邊個同學?

我嗰期好雜,邵仲衡、麥長青同我一齊參加《超級新星》,郭富城係 dancer轉過嚟,梅小惠係健美小姐,鍾淑慧係環球小姐。

點解你又會走咗去參加《超級新星》?

我中學之後入咗銀行做櫃員,嗰陣時都未夠十八歲。香港仔嗰間恒生,啲客好多係漁民,啲錢永遠濕嘅,黐住魚麟同魚血。我家姐幫我報名㗎,佢覺得我有條件應該要試,點知又俾我入咗 interview,再入埋最後二十強。一入圍就要三個月 full time受訓,我入去搵銀行經理,你又估唔到,佢幫我打埋辭職信!唔係我做得唔好吖,佢同我講:「你睇下我,做到六十幾歲都係踎喺間分行做經理仔,後生仔要出去闖,唔好喺度嘥時間喇!」

而你,一個唔夠十八歲嘅少年,本來諗住就咁坐櫃檯後面坐一世?

其實冇諗過,讀完書搵到份工就做住先,冇諗過咁長遠。

入去大台,跑咗幾耐龍套有得做主角?

兩年,第一個機會係一個鐘嘅單元劇,個導演做過訓練班導師,可能對我印象幾好啩……真係為人所熟悉,就係《人在邊緣》大反派,監製之前都冇用過我,我都唔知點解。一個訓練班出嚟小伙子做大反派,未出街喺內部已經好大迴響,打後就一套接一套冇停過。

覺唔覺得天林叔口中嘅運,話嚟就嚟,好似好易咁?

我個人好簡單,冇乜機心,冇諗咁多嘢。機會一個接一個,套套係男主角,未來幾個月我都知要拍乜,你唔需要擔心,亦都唔需要諗太多。我哋成班人,伊健、錫明都係一樣,當係玩一樣好開心,理得你係導演定 PA,唔會擦鞋唔會蝦人。

‘ 87《超級新星大賽》

‘ 90《人在邊緣》

捱夜最高紀錄,炒車收場

最辛苦嘅時候,幾多日冇得瞓?

TVB一貫做事方針,人太多,每個人都需要機會。當機會嚟,你覺得辛苦,唔緊要,我咪俾第二個囉!你想要個機會?就要食得鹹魚抵得渴。你問下是但邊個,凡喺 TVB捱出嚟,有邊個未試過?我記得成日唔夠瞓,試過同萬梓良喺《萬里長情》對戲,五日五夜冇瞓過,場戲我要同佢對恃,但我眼皮根本唔受自己控制,自己跌落嚟……終於收工喇,我凌晨喺電視城揸車返香港仔……

五日冇瞓仲自己揸?

未炒過一鑊大,你永遠唔知教訓……嗰晚我一出香港仔隧道已經瞓着咗,架車由最右收費亭打橫片去最左,俾後面架車狂砵、砵醒咗!嗱嗱聲開晒所有車窗、天窗、開大音響再打自己幾巴,點知就嚟返到屋企喺鴨脷洲大橋又瞓着,嗰條路仲要係對頭行車,架車鏟埋對面線架小巴度 total lost。我成個人乜都睇唔到,但係就仲識自己打電話……我仲記得俾人抬上架白車時,個小巴司機同我講:「琴晚睇你做《命運快車》至見你炒車,今日你就撞落我架車喇,林生!」。

開工過勞炒車, TVB包唔包賠償?

我當時吖,腳骨裂咗喺屋企抖唔夠三日咋,公司已經派車去我屋企接我去開工!跟住導演仲要求我放低拐杖行兩步……話咗腳骨裂,佢仲話:「兩步啫,後生仔,試下!」嗰陣時後生仔唔識 say no,結果行一行就跌,又送去醫院,咁至休息得兩、三個禮拜!

‘ 95《萬里長情》

‘ 05《等著你回來》(亞視)

‘ 08《法證先鋒 2》

隔咗廿年,講番啲辛酸事,好似好有趣咁?

我覺得後生就應該要捱。仲有,機會真係唔係人人有,以前喺化妝間、喺木人巷,個個都係咁瞓個零鐘然後開工㗎後生唔捱,唔通五、六十歲先走嚟捱咩?一帆風順,人生又邊度好玩呢?

有得捱都幸福過好多人,等極都等唔到嗰個電話,叫佢開工?

真係,有啲人等咗幾十年都等唔到個機會。所以我好睇身邊班同學,我做男主角,都會向監製推薦啲同學,我去登台,又會叫人試下搵佢哋做 MC,我都幾睇自己同輩……。

呢幾年呢?自己開公司自己投資電影公司簽藝人,終於知道自己想點?

人生有好多階段,誤打誤闖入咗行,劇接劇好似理所當然咁,其實我都試過人際關係處理得唔好,出過事……

你有咩?除咗俾人寫差過太太?

我都試過俾 TVB雪藏,拍緊 A劇,接到 B劇劇本,一路讀一路將啲有問題嘅地方圈晒出嚟,然後趁住放飯走去搵編審。編審話過晒堂喎、冇得改喎……我唔知係咪自己太直呢,人哋聽完態度麻麻。亦都係因為佢態度唔好,我心火盛,掉低個劇本話:「你冇心講,咁唔好講」轉身就走……一走不得了,全層七樓(大台監製編審創作重地)謠言滿天飛,話我好寸,話我掉劇本……

郭可盈變咗另一個人

事實上你有掉劇本,聽落事實上又真係好惡劣……

我唔否認,我真係有錯,每個人都做錯過,趁後生錯過都仲有機會改。總之,雪咗我幾個月,可能公司冇乜人,雪又唔係雪咗好耐。

今時今日睇番當年,同樣件事可以點處理?

爭太遠……每件事都冇絕對啱同錯,每個人觀點同角度都唔同,問題並唔係我一個黃毛小子、做咗冇耐男主角就咁大膽改劇本,件事唔係用年資同年紀去睇,應該由態度出發。如果態度友善,修飾過言辭,成件事結果都會唔同。

做人咁多道理,點教個女呢?

呢個世界最難讀嗰科,喺社會大學,要等社會大學去教識佢。我同我老婆講,俾佢快快樂樂、健健康康成長,個女唔需要好叻,但必需要係一個心地善良嘅人,幫人自己會好幸福好快樂。阿女好好心地,我冇教過佢,但係佢試過返屋企為撞到嘅乞兒婆婆祈禱。呢個女唔係我唔捨得鬧,係佢真係聽教聽話,唔需要鬧。

個女咁乖,都係太太郭可盈功勞?

真係太太功勞。太太直情做媽媽以後變咗另一個人,女出世以後,佢少咗急躁,多咗耐性,同埋以佢事業心咁強,為個女完全放低咗事業。

‘ 09為老婆開記招《蘋果日報》圖片

‘ 14《三面形醫》(港視)

‘ 14《 Night Shift》(港視)

你之前訪問話過,就算囡囡入到名校,如果要做功課做到十二點,都會二話不說幫佢轉校去國際學校。不過教養係太太話事,佢會俾你插手咩?

唔係喎,呢個係共識。我哋唔可以冇家庭時間,我哋都覺得童年唔應該咁過。

咁你又俾佢讀兩間幼稚園?

其實你聽我解釋,就知完全唔係大家咁諗……其實係兩間幼稚園都好難考,但係兩間都收咗我個女,既然唔知點揀好,就俾佢上午校同下午校分別返住兩間先。如是者兩三個月,個女話唔鍾意少咗時間見媽咪,於是我哋交俾佢揀,喺兩間幼稚園之中揀咗佢最鍾意嗰間。

外界形容你老婆係怪獸家長同虎媽,咁樣聽你解釋落,原來又唔係嗰樣嘢!

佢哋唔咁寫,又邊賣到書?我睇得好化,大家都玩緊呢個遊戲,必須要知道個遊戲規則點玩。一件事平鋪直敘邊得好睇?

婚外情記招,係滿足老婆

‘ 15《我們停戰吧!》(電影)

所以你最近套《我們停戰吧!》攞獎,出面都係寫到你終於扭轉一貫嘅女尊男卑?

有寫我女尊男卑咩?我又冇睇過喎……我從來同太太唔提呢啲嘢,呢個世界冇人比可盈更了解我。如果我係不務正業、唔可以依靠終生,以佢性格,如果你識郭可盈呢個人,佢一早走咗十世啦……

仲記唔記得你哋兩個點撻着?

係第一次合作,拍《萬里長情》。我仲記得開拍前家豪哥劉家豪俾咗疊相我,叫我幫手揀對手戲女主角,可盈張相都喺入邊。我唔肯揀,又唔上心,仲同家豪哥揀:「做咩叫我揀……你話事啦,又唔係揀老婆!」係拍呢套戲開始有 feel,因為我哋太似喇,我哋兩個都黐家,日日放飯都返屋企食嗰種人。

又講番轉頭,點解會自己開公司?自己投資電影?仲簽埋藝人?

我拍 HKTV《三面形醫》,林熹曈做我私人護士。離開 HKTV,佢打俾我話寫咗個劇本想請我演,之後又再話有冇興趣投資……個數目唔係一萬幾千,正常人哋叫我投資都要諗下、度下先,不過我真係好鍾意個劇本,諗都冇諗就話好。

‘ 15我們這一家《蘋果日報》圖片

投資咗幾多錢?

七位數字,黃玉郎至係大股東,拍完呢套,大家度度,不如開間公司繼續 run落去。

大家都話郭可盈紅啲、屋企有米啲,其實聽聞你好識投資,搵多過佢好多?

其實多唔多有乜所謂啫?我不嬲都唔會將錢放得好大。再辛苦嘅日子我都捱過,我喺屋邨大,玩具一個都冇,返學日日行半個鐘,出嚟社會入 TVB,都係住阿哥度、同阿哥一間房。讀訓練班,三千蚊人工俾咗一半媽咪做家用,你諗下淨番千五蚊使,日日轉幾程車返電視城,仲邊有錢淨?以

以前食唔飽又冇錢買多個餐,都係同 TVB飯堂馬老闆拍膊頭,請佢側側膊扣多碗飯俾我咋……從來冇諗過要買車買樓,一心淨係諗住做,啲嘢全部係一路打拼一路捱出嚟……我覺得𠵱家啲後生諗嘢好有問題,一讀完書就話買唔起樓,你都未努力過就想得到,可以得到啲咩呢?

所以啲報導真係係對你唔多公平。

何只唔公平,直情不利添啦……不過我份人唔鍾意解釋,之前就算開過記者會( 07年疑似與內地女星董維嘉傳婚外情),都唔係我需要交待,係我要俾我太太一個交待。

首先,你屋企要有樓梯

聽完林文龍的故事,「你點同呢?」四個字我決定收番,其實林文龍都唔係一出世就識郭可盈,都同每個人一樣窮過亦捱過。

不過聽完林文龍教女的故事:

「屋企有兩個工人,我都會叫個女自己執完玩具先可以瞓。」

「你𠵱家大個女,兩、三歲玩嘅玩具唔要就應該捐俾啲有需要嘅小朋友。」

「我哋屋企住 house,我叫佢永遠上落樓梯都要扶住嫲嫲同婆婆。」

我想話,首先,你屋企要有多餘嘅工人、玩具,同埋條樓梯。

同太太咁多年,從來冇起過異心?

你話兩個人有冇嗌過交,我話冇,就算你信我都忍唔到笑啦……我哋兩個開頭一齊仲勁,三日一小嗌五日一大嗌,兩個都後生、都做主角、都喺片場俾人奉承慣,兩個個性都咁強,有乜可能唔嗌?炒得多其實都攰,兩個人撞撞下,一係散一係就學識咩叫相處……咁多年,我都要多謝我老婆,唔係佢,我唔會改變成為𠵱家嘅我。

我唔明,交待點解唔係返屋企同老婆交待?

要開記者會?

我同我老婆根本就唔需要交待,係我老婆性格覺得:「你同我講冇做都冇用,𠵱家係全世界都覺得你有做!」我同出面啲人講,係滿足佢需求。

撰文:朱小博

攝影:范仲良

形象: Bryan@the Flaming

服裝: J.Lindeberg

鞋: Cole Hann

鍾意就快D Share啦!