熱爆娛樂: 大製作　土炮真人騷　畏高柏豪過山車玩命 [FACE

2015年8月12日星期三

大製作　土炮真人騷　畏高柏豪過山車玩命 [FACE - 429] 柏豪,周柏豪,MF,

真面目

大製作　土炮真人騷　畏高柏豪過山車玩命

潮流興真人騷，網民鍾意睇，收視又有保證，梗係長做長有！最近華納唱片就同內地數碼平台合作推出真人騷《華納星聲鬥》，全公司台前幕後 35人總動員出動到 LA拍攝，成個製作連幾位歌手拍 MV使咗成四百幾萬。

今次真人騷主打音樂競技賽，周柏豪會同連詩雅 Shiga分別領軍進行歌技 PK，林一峰就身兼主持兼評分，贏咗有獎品，輸咗當然有懲罰！第一集比賽輸咗嘅柏豪，雖然畏高但都要頂硬上，挑戰亡命過山車，仲要揸住部 cam負責拍攝，難怪玩完塊面都「乸」埋一嚿

華納唱片同內地 QQ Music數碼平台合作推出真人騷《華納星聲鬥》，出動 6個歌手單位演出，由周柏豪同 Shiga兩個隊伍互相競技，樂隊 Dear Jane主音 Tim同鼓手 Nice、 A2A嘅吳燕珊（ Annelle）同新人 Jude為柏豪隊；而 Dear Jane低音結他手 Jackal、結他手 Howie、 A2A嘅吳燕菁（ Annice）同陳詠謙歸 Shiga隊，兩隊合共進行 5次 PK賽，每次比試主題均不同，勝出隊伍有獎勵，輸咗隊伍仲會有懲罰，而負責主持工作的林一峰就會做埋評審，手揸各隊生死大旗。

輸咗比賽，柏豪要接受過山車懲罰，本身畏高嘅佢仲要揸住 cam拍攝，塊面嚇到「乸」埋一嚿。

位於拉斯維加斯嘅曼哈頓快車，全程穿越酒店裏外，最高 203公尺，時速仲達 108公里，少啲心血都唔掂！

唔知柏豪呢個表情係笑緊定喊緊呢？

華納總動員合共 35人出動到 LA拍攝，單係歌手已經有 6個單位，公司豪擲 400萬大搞，陣容鼎盛，過往喺香港未有唱片公司咁做過。

黑妹胸壓

頭炮比賽鬥 Acapella，柏豪隊揀咗曲婉婷〈我的歌聲裡〉，而 Shiga就揀咗陳奕迅〈謝謝儂〉出戰，最後 Shiga隊勝利仲可以坐高級房車，超疏乎！至於輸咗嘅柏豪隊就要接受過山車懲罰，本身畏高嘅柏豪仲要做埋攝影師手揸 cam拍攝，同玩命並無分別！

輸咗要接受懲罰，不過都未必好慘㗎！其中一個懲罰，柏豪隊各自手揸「錫我」同「摑我」兩個牌畀途人選擇，柏豪期間遇到 3個女仔，對方除咗揀「錫我」之外，仲話唔捨得打佢喎！拍攝第一集時，柏豪仲遇到性感黑妹衝前集郵，大讚「 You are so handsome」，合照時仲胸壓柏豪，認真艷福不淺！