全知言
手信唔只得三文治 最強伴手禮逐樣數
近排仲有冇朋友喺台灣買三文治俾你做手信呢？講真食物呢家嘢唔做好保鮮就咁飄洋過海梗係有風險查實除咗三文治，大把手信有人 like啦，好似男神王宗堯同 C君都收過好窩心嘅手信，張建聲仲送過超浪漫手信畀女朋友添！最強手信又點只得三文治吖！
王宗堯：口罩防病
最強手信絕對係我貼身化妝師送俾我嘅口罩，因為前排好多傳染病啦、新沙士大家都要注意，否則影響工作；佢送咗好多形形式式嘅口罩俾我，都係喺日本買，有黑色、有白色、又有花紋、 3D形象，每次出去公眾地方都可以換一個，真係好夠用！而我送過最強嘅手信，係啱啱年頭去泰國旅行，買唔到禮物，喺機場原來有芒果糯米飯賣嘅，係最新鮮最有誠意，同埋最好食嘅芒果糯米飯。
陸駿光： 3D人頭 tee
收過最好嘅手信係阿哥喺新西蘭買嘅 tee，有個立體圖案係個 3D人頭凸咗出嚟，喺香港未見過，着出街又嚇親人，當時小學生仲細個，覺得好特別，好標奇立異嘛！所以係我收過最開心嘅手信。
張建聲：浪漫石頭
曾經喺台灣平溪執過一嚿石頭送畀女朋友，因為我覺得嗰度好特別。嚿石頭仲喺我屋企，都俾佢鬧咗成個月，但腦海仲會成日記住嚿石頭，我覺得好有 meaning，因為嗰度係好浪漫，甚至應該係見證愛情嘅地方，所以千祈唔好睇少呢嚿石頭。
糖妹：美味蛋糕
我去台北做本旅遊書時，食到一間芝士蛋糕太好食喇！而我細佬係好鍾意食芝士蛋糕，當然拍攝嗰日買唔到咁我就第二日去買咗一整個，又專登買咗個冰袋 hand carry返香港，點知拎到返嚟細佬冇留俾我，一個人食晒囉！
C君：窩心良藥
有段時間我發燒，就懶係感性咁喺社交平台講咗我病得好緊要，然後第二日就有人喺日本買咗啲藥返嚟，擺咗喺我架車度，佢知我住邊區但唔知我屋企喺邊，就咁擺咗喺我架車頂度，就 send個 message嚟話你食咗佢就會好㗎喇！嘩，有冇咁貼心呀？所以我好多謝呢個朋友嘅最強手信。
旅行買乜好？街坊：最好食得啦
其他街坊又覺得邊啲手信最煞食呢？原來後生仔女最鍾意都係食！但記住留意包裝同埋食用期限呀！
最好係食得㗎啦，例如澳門杏仁餅啦，即係獨特啲當地至有就最好
去過澳洲買啲回力鏢同袋鼠公仔畀朋友，有代表性啲；又譬如台灣鳳梨酥啦，我自己都鍾意食，邊隻牌子冇乜留意，總之好食就得。
日本嘢食啲嘢都好好食，香蕉蛋糕啦，總之零食都好食。
通常我會買啲實用啲嘅嘢畀朋友，但收手信就鍾意係食物，例如台灣嘅太陽餅，日本嘅和菓子。
即時報料
有料、有相、有片即刻 send?
熱線： 9222 0828
電郵：mailto:facenews@nextmedia.com
facebook： facemagazine inbox
line、 we chat id： facemagazine
|
鍾意就快D Share啦！
|
|
|
