掃呢頁CODE去手機

2015年9月22日 星期二

華仔帶3歲囡囡見粉絲 Hanna怕醜摸爹哋下巴 華仔,劉向蕙,Hanna,劉德華,



Hanna早前被週刊影到,樣子跟華仔餅印一樣。 (圖片)
華仔好小心保護妻女,所以極少一家喺公眾場合見人。(資料圖片)

劉德華雖然請晒保鑣,兼千方百計保護囡囡劉向蕙(Hanna)個樣唔好曝光,不過身為名人之後,加上互聯網咁發達,仲要人人一部手機,要杜絕真係好難。

嚟緊星期日係中秋節,亦係華仔54歲生日,呢排忙緊宣傳新戲《解救吾先生》嘅佢,提早喺上個禮拜六同「華仔天地」歌迷會一班fans慶祝,因為上年開fans club party時,華仔應承咗fans話等囡囡3歲時就帶畀大家見,所以今次佢就兌現承諾喇!趁住生日party帶埋已經3歲幾嘅Hanna出嚟,而且仲係全家總動員現身,包括佢嘅父母同老婆朱麗倩。

有周刊影到華仔當晚同粉絲慶祝嘅情況,華仔抱住着住白色裙仔嘅Hanna,一家人一齊切蛋糕,而唔知係咪好少見唔咁多人,Hanna有啲驚又有啲怕醜,全程伏喺爸爸膊頭度,仲要好嗲咁摸住爸爸個下巴,華仔即刻冧晒同囡囡面貼面,其間見到囡囡有啲鼻水,即刻用紙巾幫佢抹鼻,真係一副慈父樣。

華仔一家未上台切蛋糕前,老婆朱麗倩抱住囡囡坐喺台下聽華仔唱歌,個樣十足小fans咁,而Hanna個樣就好似有啲攰。華仔唱唱吓歌,突然走落台搵女,之後又親自抱女上台,一手抱住囡囡嘅佢,另一隻手就扶住老婆隻手上樓梯,sweet到呢!

另外,劉德華同劉燁聯噚晚喺北京出席《解救吾先生》首映禮,劉華同劉燁個名睇落好似,估唔到佢哋嘅打扮都好襯,都係着黑色西裝,佢兩個去到現場見到大家同look,都忍唔住笑住話:「我們撞衫,這是情侶裝吧!」跟住劉燁即興清唱劉華名曲《男人哭吧不是罪》,而劉華就唱《小丑》回敬劉燁。而首映之後,劉燁將佢同劉華嘅合照發微博,寫話:「我倆撞衫了,穿的一毛(模)一樣,誰帥?說我帥就加你。」擺明車馬同劉華爭寵喎!

鍾意就快D Share啦!