筆華棋
新書講一個有錢仔去做 7仔嘅故事，為咗真實感，阿 Matt真係以波士頓大學畢業生身份，去中環昭隆街 7仔做咗一個月體驗，都算幾認真。
爆 Like王
出書拍 MV講富二代 《賺錢買維他奶》作者：有錢都溝唔到女
《那 夜凌晨…》《一路向西》都係高登講古台捧紅嘅故事，最近又有新書出爐，《賺錢買維他奶》內容講富二代去做 7仔嘅故事，仲拍埋 MV有法拉利又有豪宅。
作者筆華棋 Matt，只肯透露爸爸係退休傳媒人。能夠廣結富二代朋友，筆華棋話自己喺有錢嘅人之中非常冇錢，只不過屋企唔使靠佢供養。他在波士頓大學經濟系畢業，做過男潮記者，現職演唱會搞手，同過星級 Stylist馬天佑出書《七宗罪》，之前又搞過隊樂隊「緬甸晶宮」。一心想做作家，決定將身邊香港富二代朋友生活寫出嚟，他說有啲 19歲仔都未見過停車場，間房大到有廚房、升降機。不過最開心原來有好多富二代都溝唔到女，我哋呢啲窮 L聽到最開心。
F：《 FACE》 M： Matt
F：點解會寫《賺錢買維他奶》呢本書？
M：有日馬天佑搵我，佢話唔想成日只係幫人襯衫，影 CD封面呀，海報等，咁佢就問我有咩搞呀？我當時就亂講嘅，你咁想做相展，不如將啲相加啲文字整成一本書啦，佢就話好呀，咁文字方面就你搞喎，就係呢次 5分鐘對話，咁跟住就出咗《七宗罪》喇。
諗番自己唔係寫得太好，屋企人當時睇過都話唔明我寫咩！我就好想做到作家，我就開始研究下高登𠵱家有咩故仔，買好多呢啲書返嚟睇，當中有啲書講過下富二代，我身邊又有一啲好誇張嘅有錢人，我又覺得佢哋嘅生活有好多好睇嘅嘢，呢方面係我優勢，而我睇過其他人寫嘅富二代，其實好表面，就係司機接送，福臨門食飯。我想話畀大家知，真正富二代嘅生活係點？而如果我要寫富二代為題材作一個賣點，那一定要有一個衝突在入面，就係有錢人其實好多都搵唔到工做，就好以我書中主角一樣，要証明自己唔係癈，咪去做 7仔囉。
F：真正富二代生活係點？
M：有啲揸架法拉利去踢波，其實球場隔籬已經有停車場㗎喇，佢就冇泊到，直接泊在球場門口，踢完就發現抄牌，罰咗$320蚊，佢就話平喎，但朋友就問佢點解唔泊喺停車場？佢話因為唔想行；亦有啲富二代原來 18、 9歲人都從來未見過停車場，因為佢由細到大都係司機車，有保鑣跟身，屋企亦唔准佢坐人哋車，但有次終於由朋友車佢，就落咗去時代廣場嘅停車場，佢落到去就問我朋友，呢度咩嚟㗎？點解咁樣？初時朋友都唔明佢問咩？後尾先知原來佢從未見過一層層落地庫嘅停車場，因為屋企啲車全部都係擺喺花園。
F：做作家又點解唱埋歌？
為咗本新書， Matt專登拍咗 MV〈有一種無奈叫富二代〉，有法拉利，又畀錢去 7仔實地拍，又有大屋同性感 YouTuber做女角，不過阿 Matt話：「除咗 7仔外，其他係朋友幫手唔使錢。」 YouTube畫面
M：因為為咗宣傳本書《賺錢買維他奶》，就攞咗本書入面嘅精髓製作 MV，就叫〈有一種無奈叫富二代〉。其實（拍 MV）最貴係租 7-11嚟拍攝啫，用咗 8000蚊拍咗 4個鐘啦，其他好多都係兄弟班冇收錢，法拉利， MV中嘅靚屋都係我啲朋友借出嚟，係我眼中真正嘅富二代借出嚟。我自己冇跑車冇靚屋先啦， MV入面嘅 YouTuber譚淇淇等，都好幫忙冇收錢。
F：富二代都溝唔到女？
M：我認識嘅富二代，都試過用銀彈戰術都失敗，有一個試過約一個女仔出嚟，跟住一叠銀紙擺喺枱，但佢最後都追唔到，因為佢侮辱緊個女仔，啲人覺得你有錢就好容易溝女其實一個有錢人溝得嘅女仔，呢個女仔本身條件都唔會差啦，咁追佢嘅人都一定係有錢人，你有錢但成個儍仔咁都唔會追到啦，有錢只不過其中一個因素着數啲。
F：富二代有咩煩惱？
M：除咗錢之外，佢哋都有其他煩惱，可能阿爸突然間去咗嘅，佢要接管間公司，但佢完全唔識點運作。佢哋最大煩惱應該係點證明佢自己有能力，接管阿爸啲生意囉。
攝影：鄭明川
|
鍾意就快D Share啦！
|
|
|