方東昇 06年與任職中學教師的吳先玲結婚，郎才女貌。網上圖片
封面
阿媽係才女 26歲初戀 方東昇：老婆靚得好舒服
大台節目近年甚少佳作，無論劇集定綜藝節目都係負評居多，即使早前出動四個小生、愛將洪永城拍旅遊節目，都係雷聲大雨點小。
明星效應唔掂，估唔到由新聞部方東昇孭飛的《世界零距離 II》竟然爆出！外表正經的昇爺，在節目中大玩食字 gag，手法輕鬆幽默，採訪專業角度獨特，成功訪問各國政要，為求真問埋李嘉誠，比起大台一班淨係識尖叫的所謂主持明顯高好多班。
口才好有料到又係中大才子，但 39歲昇爺一直守身如玉， 26歲先同現任老婆初戀， 06年結婚時自爆當年對老婆一見鍾情，追女追到去教會，更當眾激讚：「老婆靚得好舒服！」搵到好歸宿的除了隻開曼海龜，原來仲有方太呀！
呢期紅過大台所有小生的方東昇，主持《世界零距離 II》有強烈個人風格，內容豐富唔會得啖笑，上週平均收視 21點、最高 25點，節目更被網友甚至高登巴打高度追捧。
返教會追老婆
寫稿揸咪冇難度，其實花名東昇班的昇爺追女仔都有一手。方東昇 06年與拍拖 4年的女友、主播吳先瑩細妹吳先玲結婚，雖然當時因酒席問題搞到要上法庭，但最後兩人亦順利擺了三十多圍酒，大學同學兼同事方健儀都有出席。
中大英文系畢業的方太，與 99年新聞及傳播系一級榮譽畢業的昇爺同是中大校友，兩人 02年在吳先瑩婚禮上初次見面，當時昇爺做主持，方太做伴娘。昇爺自爆對老婆一見鍾情，為了追女仔，昇爺竟然參加對方的教會聚會，後來更成為基督徒，似足許志安同 Sammi。昇爺仲讚曾是乒乓球港隊的太太性格善良，而且靚得好舒服，即係有樣又有內涵
阿媽聯名買樓
對老婆一條心，國內出生、小學來港讀書的昇爺仲係孝順仔一名。做主播收入穩定，昇爺 00年與母親陳佩瑛聯名買樓，以 268萬買入青衣海欣花園一個單位，婚後仍與母親一齊住。
而小學才由內地移居香港的方東昇，英文不佳，以兩年時間苦讀，竟在四、五、六年級考獲全級第一，由細叻到大。
昇爺經常要周圍飛採訪，幸好婆媳之間冇乜拗撬，反而相處非常融洽。洋名 Selina的方媽媽都係才女，同囝囝一樣文筆極好，曾在公開徵文比賽贏得冠軍。方媽媽在該篇名為「方老太寫給方太的信」中透露，兩婆媳有共同興趣，鍾意一齊捉棋打乒乓波，亦有共同敵人——方東昇。方媽媽話昇爺掛住做唔肯休息，兩婆媳就會夾計迫佢唞，好有默契！
自認病態記者
98年加入大台新聞部任職實習記者、效力了 17年的方東昇 39歲娃娃臉，佢唔只識揸咪咁簡單。被喻為「中大才子」，昇爺讀男拔時已與前大台主播呂秉權、商業一台前台長黃永係辯論隊成員；讀中大時，昇爺在學院刊物《大學線》做實習記者，出晒名夠搏。
當年《蘋果日報》剛出版，大學教授提議專訪黎智英，曾經形容自己係「病態記者」的昇爺，第一時間舉手做，仲去對方公司樓下等，一見黎智英出車即衝上去拍窗，最後成功約到訪問！昇爺仲話當年忙到大部分家庭聚會都去唔到，連親戚都以為佢移咗民。
肯搏肯做又食腦，強烈建議大台開多幾個節目俾昇爺做！
前同事黃婉曼 佢係真風趣
「東昇私底下的確係一個風趣嘅人，而且係真風趣，好幽默，同埋佢做每一單新聞都好用力。佢個背囊入面有好多資料，出晒名認真同勤力！平時相處都知佢對老婆好好，因為佢好細心好 gentleman。」
老死柳俊江 佢呢個 style好耐
「係人都知佢係才子，不過唔會無端端搞 gag，份人好沉實，不過度稿時好細心，會諗方法令件事有趣啲、俾觀眾睇得開心啲！佢呢個 style其實好耐喇，之前神州穿梭機，佢着件太空衫做直播已經行緊呢條路線，可能呢幾年電視台沉寂少少，有個突出啲嘅節目，大家先留意到！大家都好欣賞佢有才華有內涵，同埋佢份人好低調，好少帶老婆出嚟食飯，連結婚都好低調！」
師妹黃紫盈 叫我做「大姐」
「東昇係我中大師兄，好 nice，有諗頭又有學識，做事認真，搵資料好快，所以寫故仔會好快手又有個人風格！佢平時都好幽默，例如我哋 WhatsApp時，佢會叫我做『大姐』，但明明我細佢好多；同埋佢好肯教後輩，有次我要報體育新聞，而我又唔熟啲球隊同術語，東昇就會暗啞底整份 note放我櫃桶，教我點樣記會最快！」
拔萃同學黃永 中學戴金絲眼鏡
「我第一輯已經睇佢（方東昇）一向係冷面笑匠，講完啲 gag我哋要兩秒先識笑！有深度㗎！佢𠵱家都似似哋以前嗰陣，唔係笑住搞 gag，係一臉認真地講。中學時佢再文質彬彬啲，戴金絲眼鏡，喺辯論隊做第一副辯，係我哋當中比較有感情嗰個，係溫柔型！」
採訪、撰文：娛樂組
|
鍾意就快D Share啦！
|
|
|
