掃呢頁CODE去手機

2015年10月14日 星期三

等足 3粒鐘 城大女搵方健儀幫拖 [FACE - 438 - 大專校園] 方健儀,MF,



方健儀喺音樂劇中飾演盲人中心導師,輔助患有黃斑點病變變盲嘅男主角阿藍適應生活。 YouTube畫面

U Spy

等足 3粒鐘 城大女搵方健儀幫拖

一個系有成過百學生,老師學期尾要改咁多同學 project辛苦兼悶爆,要在同學中突圍真係要諗吓計!

城大創意媒體系 Yr.4 Twinkle(黎安恩),就邀請到方健儀演佢個 FYP短片《 21》,而且方健儀仲唱埋主題曲,好難得!

個短片關於一個 21歲男仔,患上黃斑點病盲咗,但佢衝破障礙,成為記者,勉勵喺街撞到咁啱煩緊前途問題嘅 21歲女主角。聽落個故事好老土,不過 Twinkle堅有 heart製作,由故事構思到寫劇本及主題曲都一手包辦,佢同 Spy講:「我哋好彩搵到啲識音樂嘅同學幫手,以音樂劇形式交 FYP,係城大學生第一次。」

Twinkle(紅圈)為咗 FYP搏到盡,仲試過臨交之前唔滿意而重拍,「有個位我覺得自己拍爛咗,我就再重整劇本,不停改,《 21》呢個作品我真係盡晒力!」

上年開始喺城大教書嘅方健儀對學生幾乎有求必應仲大展歌喉,方健儀回應話:「都係幫學生做功課,無乜特別!」

不過最令 Twinkle開心係搵到自己偶像方健儀客串,方健儀做主播見得多,之前喺何韻詩演唱會開金口唱歌先知原來佢唱歌咁好聽! 21歲嘅 Twinkle就話:「其實我一直想做記者,而方健儀係我偶像,我知佢喺城大教書,我就膽粗粗去課室諗住 seat堂順便邀請佢,點知佢話有 quiz唔可以 seat堂,我惟有喺門口等足三粒鐘,佢好爽快應承咗幫我哋拍片同唱主題曲〈一點一點〉,去錄音室錄嗰日都好順利,佢一啲架子都冇,𠵱家諗起都仲好興奮!」

片長 30分鐘, Twinkle用了 10日時間拍攝,「好彩城大借咗好多專業嘅器材,所以完全唔使煩工具上嘅問題,可以專心諗劇本!」

Twinkle嘅 FYP由拍攝、後期、混音、編曲都親力親為,忙足一年,咁認真嘅製作真係激罕!

離開大台後嘅方健儀接 job接唔停,仲樂意為學生作品去錄音室錄音,呢個老師真係唔話得!

撰文: U Spy

鍾意就快D Share啦!