阿倫認有成員萌退意：唱到80歲！
本地樂壇「神枱級」樂隊溫拿成軍42年，陪伴無數港人成長，昨日本報獨家披露溫拿有機會完成明年2月的紅館演唱會後，就會正式解散，消息一出引起極大回響，雖然眾成員受訪時均一致表示未有定案，但不少人都表示不捨，包括主音之一的譚詠麟，他更直言溫拿陪住好多港人成長：「我想唱到80歲都仲唱。」
由譚詠麟、鍾鎮濤（阿B）、彭健新、陳友及葉智強組成的溫拿樂隊，早於1973年組隊，經典歌曲如《L-O-V-E Love》、《Sha La La La》、《陪著她》及《千載不變》等多不勝數。本來樂隊早定於明年2月合體舉行紅館演唱會，然而，本報昨日獨家報道溫拿五虎中有成員覺得自己年事已高，故有機會在演唱會後宣布解散，消息一出立即引起廣泛回響，五虎昨先後受訪回應傳聞。
獻曲鼓勵隊友
對於有傳溫拿解散，主音之一的阿倫受訪時謂：「梗係唔想，由頭到尾都咁鍾意，喺演唱會開會時有人提出過，亦有成員認同，但我想唱到80歲都仲唱。某程度上溫拿唔只係樂隊，仲陪住好多港人成長，唔可以話散就散。」阿倫不肯透露誰萌起解散念頭，但強調無論結果如何五人的感情不變：「意見經常會有唔一致嘅時候，唔會逼大家，只要有其中一個唔想都無謂。」
阿倫又表示一早為溫拿寫了一首歌，樂隊Mr.有份參與編曲及作詞，最近阿倫將原本的歌詞作改動，將該曲作為溫拿演唱會的新歌：「依家改動後希望可以激勵到其他成員。今次之後幾時再開都好難講，始終解散會傷咗好多人嘅心。」阿倫又指很多人向他表達關心，問會否有最後定案？他沒有正面回答：「我能態度係希望唱到就唱，唔會逼大家。」
阿B亦承認開會曾有談論過解散這話題：「我冇所謂，唱到咪唱，唔唱都可以，最緊要係團隊精神。」對於傳聞今次是最後一個演出，他謂：「所以幫演唱會度嘢時都好難過，但我會尊重大家決定。」其後阿B又在微博寫文，並引述經常和溫拿合作的填詞人盧永強的說話：「惜緣惜福，個人覺得今天你們幾位已經無須要介懷娛樂圈的所謂進進退退，何不把你們的友情、經歷緣分延續成傳奇，42年都過了走多廿年又如何呢？愚見。」
陳友：做到咪做
然而，溫拿結他手彭健新則說：「有好多原因好難講，始終年紀太成熟，無可厚非會有諗呢樣嘢。」至於陳友和阿強都分別稱只是有人提出過解散，大有商量餘地，陳友稱：「只係討論吓，講過吓，我哋圍內好多人，唔只得隊友。做到咪做，又唔係郁唔到。」阿強也表示：「我唔希望，講告別咁核突。」他補充說：「同樣我無所謂，都半退休，最緊要一齊開開心心。」另外，阿倫、陳友、健仔與阿強昨早才與倫媽飲茶，可見眾人感情未受傳言影響。
文：音樂組
|
鍾意就快D Share啦！
|
|
|
