2015年10月19日星期一

楊思琦同已婚富商冇再聯絡思琦,楊思琦,

【換車買兩伙】楊思琦同已婚富商冇再聯絡

2015-10-18 18:45:00

(攝影：沈建程)

楊思琦今日帶埋囡囡一齊去到九龍灣出席電影《最後一枝蠟筆》嘅優先場，出席嘉賓仲有蔡瀚億BabyJohn、鄭國江同李力持等，思琦早前被指搭上有家室富商後，即換七人車同購入兩個單位。

思琦今日再次澄清事件，叫大家唔使為佢擔心，佢話：「換車係因為之前架車用咗好耐，上年成績好啲，想獎勵自己，而且小朋友出入，架車闊落啲，媽咪出入都可以休息吓。」再問係咪請埋司機？思琦話：「唔好講，寫完之後司機都唔做，o依家要搵人，暫時我做埋司機。」佢解釋同富商只是傾合作，不過事後大家都冇再傾：「對方有太太同小朋友，所以根本唔成立（拍拖），絕對無呢件事。」

近期有唔少內地真人騷演出都邀請佢，思琦都傾緊，部份係講媽媽，有啲節目係想佢母女檔參與，思琦表示會睇吓內容再決定。

至於蔡瀚億被指花近百萬買車送畀經理人，佢話買車係方便工作，平日自己都鍾意搭公共交通工具，但每逢整好頭出去開工，就發覺逼完車會整亂髮型，所以決定買車作開工之用，問佢係咪賺咗好多？佢話：「唔係，手停口停，都係電影搵我，唔係我搵電影。」近期都有內地片商洽談，不過佢接拍之餘都會以香港為根基。