娛樂偵訊
黃翠如執二攤 吳若希黐周柏豪失敗
去年大台揼本拍賀歲單元劇《愛情來的時候》，雖然收視、口碑好壞參半，但無阻第二輯開拍。新一輯捨棄用台、韓藝人，搵來隸屬華納唱片的周柏豪，做其中一個單元的男一，順勢修補與四大唱片的關係。
據知大台原本想安排吳若希做女主角，但華納嫌女方同有米 uncle搞緋聞，襯唔起新一代「暖男」周柏豪，寧願請辭唔拍，最後余詠珊惟有安排「每個男人心裡面都有一個」的黃翠如，捱義氣執二攤安撫暖男豪。
見過鬼怕黑
去年無綫首拍賀歲單元《愛情來的時候》，揼本去到東南亞四地取景拍攝，當時台灣和韓國的單元原定搵台劇女王林依晨和池城做男女主角，但無綫「是是但但」的作風，遲遲未交出劇本和期表，兩大偶像相繼劈炮，要臨時臨急搵佘詩曼同人氣跌幾級的韓星延正勛補飛頂上。
見過鬼怕黑，今次開拍《愛 2》，大台決定起用自己人省卻麻煩，順勢用其中一個單元的男一做籌碼，邀請華納唱片的周柏豪演出，修補多年來與四大唱片公司惡劣關係之餘，同時為年尾的頒獎禮鋪定路。
霸王硬上弓
自從榮升「暖男」，周柏豪人氣升、檔期更加密密麻麻，稍後又要到外地開演唱會，但無綫遲遲未落實合作對手，只係不斷強調「一定搵跟柏豪同 grade嘅靚女合作」，用來安撫心急的華納。
一日拖一日，華納覺得事有蹺蹊，於是提出辭演，無綫知道「拖」出火，大台見無彎轉，於是坦認安排吳若希同周柏豪情侶檔演出。
近期吳若希與有米 uncle緋聞鬧得熱哄哄，華納擔心影響「暖男豪」健康形象，要求換人，惜大台同樣企硬拒讓步，雙方合作關係一度陷入膠着。
「都覺得怪㗎嘞！既然搵得我哋拍嘢，就算劇本未寫好，都冇理由連女主角都未有，問極都話女仔個期有啲亂，要遲啲先覆實，係我哋打爛砂盆，無綫先死死地氣話搵咗吳若希做柏豪個單元女主角。」知情者說。
保頒獎禮星光
雖然大台積極捧吳若希成旗下唱片公司一姐，但論資排輩，明顯同周柏豪有段距離。華納企硬保暖男豪，向來恃住一台獨大、絕不退讓的無綫，擺完一輪姿態後，居然主動讓步，願意換人。
「梗係呢幾年無綫《勁歌》頒獎禮，全部益自己友，唔好講其他唱片公司，連英皇都睇唔過眼，無綫自己知自己事，同四大反面咁多年，如果今次氹得掂華納，明年頒獎禮，起碼有番啲星光。」知情者說。
吳若希攝位失敗，大台臨時搵來劇接劇、兼拍完《 Do姐去 Shopping》的黃翠如頂上，周栢豪才 say yes埋位開工。
撰文、攝影、攝錄：娛樂組
|
鍾意就快D Share啦！
|
|
|