| next 1/1 pre | |
 | |
| next 1/1 pre | |
 | |
| next 1/1 pre | |
 | |
| next 1/1 pre | |
 | |
| next 1/1 pre | |
 | |
| next 1/1 pre | |
話就話每個人都有獨特使錢習慣，不過講到「敗家」，幾乎有共通點。你自問冇亂使錢？只不過係唔知點解個個「月光」？算唔算敗家，係好客觀嘅。又睇吓你有冇以下4樣敗家通病。講明，慎入，事關中一樣已經死得，怕你受唔住刺激。
1、常時向Friend借錢
好多人都試過向朋友或屋企人江湖救急撲水，不過，若然每個月逢糧尾嗰幾日你都「江湖救急」，戶口冇錢到連嗰幾日都過唔到，千祈咪覺得好平常，其實已經係一個極危險信號，顯示你根本理財無方、對金錢唔負責任。人人都有需要救急時，但唔係時時。咪充「大頭鬼」，冇錢就唔該節省開支，一係就搵方法賺多啲。
2、鍾意乜都碌卡
唔少千禧代（即是80後、90後、00後）鍾意乜都碌信用卡，貪遲啲先找數，貪啲分換禮物。找卡數時又鍾意還Min Pay（最低還款額），若然仲會用張卡碌Cash（現金透支）嚟用，死得。一班朋友食飯，你碌卡找數先，乘機即袋班朋友夾番嘅錢，即時有Cash周轉，以為自己好醒？未必。呢個其實係壞習慣，同先使未來錢冇分別。除非你有能力卡數月月清，否則剪咗張卡好過。
3、將啲現錢擺喺屋企
咪以為唔碌卡齋用Cash就冇事，都要睇你啲錢放邊，若然放喺屋企，同樣唔係好事，一來有賊就唔好，二來連少少利息都賺唔到，蝕晒。唔該，至少都存入銀行。
4、政府退稅都未到手就已使清
如果你係納稅人士，有時候政府都會退稅「派糖」，唔該你千祈咪因為有退稅，就即刻將筆錢使清，咁同你碌卡碌咗去無分別，反而應將筆錢儲起，留番下次繳稅時用。
睇完。你又中咗幾多樣？上述4個敗家通病，問咗幾位財圈人，佢哋個個都話自己一樣都冇中喎。不過，老老實實.....
---------------
●趙海珠「喺美容院最易出事！」
前輪后珠珠一向都係等啲嘢爛咗、或有需要，先去買，佢仲好目標為本，即是諗住要對銀色高踭鞋，佢就只去睇銀色高踭鞋，見到紫色都唔會吼，任何其他嘢Sell唔到佢。
不過，一對住啲美容院Sales姐姐，佢就冇晒反抗能力，「我好容易甩唔到身，喺嗰啲Moment會使大咗」，幾大先？「最犀利嗰次係買咗Facial Package，六位數字......」（六位數字，即係以十萬蚊計！）「買完出嚟，梗係覺得好大嚿錢，但可以用2年，惟有咁安慰自己。」
-------------
●彭偉新「嗰啲咩唔露面就可以借到錢嘅，簡直係荼毒人！」
京華山一研究部主管彭偉新使錢一向好穩定，唔會突然使大咗。佢鍾意儲鈔票，亦試過一次過攞8萬蚊嚟買，不過都係能力以內。佢亦唔鍾意先使未來錢，卡數必定個個月清，「如果自己Handle唔到，點去做榜樣呢？」一切皆因佢有小朋友。
「嗰啲咩唔露面就可以借到錢嘅，簡直係荼毒年青人，係好恐怖嘅資訊，碌咗卡可以唔還住、壘埋一次過先？冇可能咁樣！」
佢亦冇試過問朋友借錢，「調番轉你問我借，我都唔知借唔借畀你好；借就害死你，明知你（使錢）Pattern係錯嘅，你得唔到任何教訓。」
-------------
●王良享「唔鍾意信用卡，Cash安樂啲。」
星展財資市場部董事總經理王良享係個Keep好少信用卡嘅Banker，「我唔鍾意碌卡，唔鍾意信用卡」，信用卡都係人哋或銀行畀佢。一班人食飯時，佢絕唔會為咗想儲分而碌卡找住數先。佢平時出街會帶多啲現金，「我鍾意用Cash多啲，安全啲。有Cash喺身，安落啲嘛。」
佢唔會向朋友借錢，「我買嘢係有Target先買；Big Items嘅，會諗清楚係咪需要先買」，好少會使大咗。
-------------
●黃德几「由細到大都大使，嗰次教訓之後就量入為出。」
「有冇試過找唔晒卡數？有，啱啱畢業讀完書出嚟做嘢，收入唔多，開支好大」，金利豐證券研究部執行董事黃德几話十零年前試過入不敷支，問Friend借就冇，因為都唔問得幾多，「有乜就梗係搵老竇阿媽幫手」，到佢阿爸阿媽出聲話「喂，你都大喇」，佢至醒醒定定，使少啲，兼做多份Part Time開源，簡單講就係靠「量入為出」自己搞得番掂。
佢依家都仲好鍾意碌卡，但就定實每月自動Full Pay找卡數，「信用卡唔應該用？講嗰個都白癡，不如話唔好用手機？最緊要係用得其所，唔好矯枉過正」，佢話碌完卡Full Pay找數就贏晒，事關商戶畀埋手續費之餘，仲賺埋飛行里數，佢好多機票就係咁儲番嚟。
-------------
●香敏華「鍾意食，一去超級市場，八達通嘟嘟吓變至少幾百蚊」
一個超市、一張自動增值嘅八達通、好多嘢食賣，呢幾樣加埋，就可能係御豐理財研究部投資組合經理香敏華嘅死穴，「張八達通經常嘟，呢個問題比較大啲，貪方便，嘟吓嘟吓嘟多咗。好似去超級市場買嘢咁，嘟吓嘟吓嘟到變咗幾百蚊囉At Least。」
一切皆因香敏華鍾意食好嘢，「係食嘢使得多啲，可以食啲比較貴嘅，鍾意搵啲好好食嘅地方，捨得喺食嗰方面。買嘢就少啲，因為買嘢嘅欲望比較短暫，一陣唔記得咗就會冇買到。」
扮靚呢？「呢方面，比其他人冇咁花錢，就算最近都唔覺意畀人氹咗買Coupon，都唔洗一萬蚊嘅」
─ ─ ─ ─ ─ ─ ─ ─ ─ ─ ─ ─
想領悟更多理財智慧，富足一世？即刻click入「致富智庫」
http://bit.ly/1Q29Vkm
|
鍾意就快D Share啦！
|
|
|