1956-2015
探熱針
說好的度蜜月婚紗照 鄺佐輝未完憾事
鄺佐輝 9月腸癌復發後，數月來不停進出醫院，半個月前開始，他停止接受化療，要打嗎啡止痛。週日（十二月二十日）下午五點，曾經表示每日都是賺回來的鄺佐輝，終於敵不過病魔，在家人及太太陪伴下於明愛醫院病逝，終年 59歲。
結婚半年即發現患上癌症，曾經承諾第二任妻子補度蜜月影婚紗照的鄺佐輝，帶住未達成的心願離開。
做好每一日
去年六月，第一次戰勝癌魔的鄺佐輝，聲稱對死亡已有體會，「生命終有完結一天，不用怕面對死亡，明天生命可能就會結束，我們要努力做好每一日……關心朋友、探屋企人……唔好等，世事變幻無常……」
被癌病折騰近兩年，去年一度康復的他自知對妻子有所虧欠，曾經表示要盡力作出補償，帶對方到美加、澳洲、台灣等地，補度蜜月和影婚紗相。可惜半年時間過去，癌魔再度來襲，過去三個月，大部分時間也要留在醫院。
「我唔知輝哥有咩遺願，佢好少講私人嘢。佢應承太太做嘅嘢，我諗都做唔到，因為嗰幾個月病情好反覆，佢仲邊有閒情補度蜜月，加上冇精神又瘦咗好多，唔靚仔都唔適合影相。」好友鄧英敏說。
遺愛人間
證實患癌後，本來在元朗租住廉價村屋的鄺佐輝，跟太太搬到親戚無條件借出的私人屋苑單位養病，藝進同學會以及廖安麗等好友，又幫忙籌集醫藥及生活費，助他度過難關。去年與港視約滿後，鄺佐輝轉到深圳電視台做主持，直至癌病復發，但今次他並未有提出需要經濟援助。
「佢三個女都出嚟做嘢，明愛醫院醫療費亦唔係好貴，應該冇問題。至於佢太太亦因為輝哥有病，要照顧佢先唔返工；我諗輝哥走咗，佢應該會返深圳住，佢哋本來住喺深圳亦响嗰度認識，據我所知，輝嫂而家仲未申請到單程證，輝哥唔喺度，佢更加冇理由留低。」鄧英敏說。
據了解，樂於助人的鄺佐輝，臨離開前已吩咐女兒，捐贈器官外，亦將身體捐給大學醫院作研究。
「輝哥係好好先生，平日都鍾意幫人，佢唔介意將遺體解剖，俾大學醫院做癌症研究，如果身體啱用，之後火化就要兩年後先可以攞番骨灰，到時再决定葬喺邊。」鄧英敏說。
兩段婚姻
鄺佐輝有兩段婚姻，跟前妻育有三女（下圖），離婚多年，直至前年才跟在深圳認識，細自己十九年的第二任妻子結婚，可惜婚後半年發現患上腸癌第四期，癌細胞更擴散至肝臟，曾先後接受八次化療，今年三月完成療程成功抗癌；但半年後又復發，接受標靶治療的他，因太辛苦決定停藥，後期要靠嗎啡止痛。
入行 37年，主持婦女節目近廿年的鄺佐輝亦參演過不少電視劇集，最後作品，是為正生書院籌款建校的勵志電影《錯過》。
撰文、攝影、攝錄：娛樂組
|
鍾意就快D Share啦！
|
|
|