娛樂偵訊
上床唔想傷害新女周芷儀 周永恒：我自己知自己事！
去年被爆跟劉依靜（ Ruby）搞婚外情、涉打老婆趙頌茹（ Yu）的周永恒，親手將家庭摧毀後，自稱「人渣」的他形象低處未算低，惟有「著草」，到深圳在胞弟開設的瑜伽中心教瑜伽，過冷河！靜極思動，周永恒最近與 Rapper K-CHEK（曲赤）合作新歌《唔諗你》，憑歌寄意，自嘲一番！但提到同 MV女角周芷儀撻着，他大為緊張：我唔想害人！
焗住退股
小三 Ruby與周永恒（ Roy）分手後，悔不當初，亦聲言不再做第三者。
至於搞到身邊女人爭相雞飛狗走的周永恒，亦計劃鋪路復出，早前他在 facebook上載與𡃁模周芷儀（ Abbie）親密合照，隨即爆出新戀情； Abbie正是周永恒新歌《唔諗你》 MV女主角，當中二人不乏床上親熱場面。
「同阿 Yu離婚後， Roy一心諗住同 Ruby離開香港一段時間，又考晒導師牌返內地教瑜伽，點知去到深圳都俾傳媒影到，後來 Ruby又決定分手，佢唔想因為自己，影響到細佬同啲生意，先決定退股返香港。
「 Roy自己都明白，短期內佢無論做啲乜，都未必會有人接受，好在當年因為叔父周啟生關係，咁多年喺做音樂方面都識落唔少人，所以而家都有啲幕後 job做吓，賺吓錢；今次佢出新歌係為興趣，都冇理過其他人會點諗！」周永恒身邊人說。
唔想害人
周永恒和曲赤合作的新歌，內容包含了過去一年，離婚、分手經歷， MV鏡頭亦有齊甜酸苦辣。
對於此舉是否鋪路復出，周永恒在電話回應說：「隻歌係曲赤搵我合作嘅！我諗住玩吓，玩音樂係為興趣多過搵食，所以同鋪路復出冇關，我自己知自己事！（跟住有冇新計劃？）做緊首福音歌，另外傾緊嘅 project都係喺馬來西亞同內地！」
被指和 MV女主角周芷儀撻着，周永恒煞有介事，聲稱唔想害人！「 Abbie都係曲赤搵嘅，佢哋兩個已經識咗好耐，大家當娛樂新聞（戀情）睇就算，唔想因為自己，傷害一個十九歲嘅女仔！（同阿 Yu、 Ruby仲有冇聯絡？）呢啲唔講喇！」周永恒說。
撰文、攝影、攝錄：娛樂組
|
鍾意就快D Share啦！
|
|
|