今年人民幣已累跌超過百分之四，美國加息前後，在岸人民幣兌美元出現十連跌，本週一才略為反彈，報 6.4753兌一美元。
財經專題
息魔通殺 廠佬樓奴
上週美國聯儲局宣布加息四分一釐，正式告別零息年代，亦是十年來首次加息。金管局警告，香港資金將開始流走。息魔重臨，一個「下馬威」，已有人嚇得屁滾尿流。首當其衝的，是一批重鎚買下人民幣合約「睇升」的廠佬。美元走強人仔偏軟，人民幣匯價曾出現十連跌，一班東莞廠佬絕望到寫信至報館，公開呼救，有港商更向本刊大爆合約內幕。另一批受害者，是一班樓奴。尤其過去一年、因發展商按揭優惠買入樓花的業主，幾乎肯定摸頂。星火燎原，戒之在貪。
廠佬絕望叫救命
上週，有班香港廠佬在報章刊登聲明，要求中央政府及特區政府，救救香港廠家。內容指，不少廠家與香港各銀行簽下「睇升」的人民幣遠期外匯合約，因過去數月人仔大幅貶值超過百分之五，而損失慘重，當中有塑膠料行一鋪勁蝕十五億元。這班廠家希望中央出手與銀行協調，以及穩定匯率，否則最少五千間企業將面臨倒閉。數日後，同一封信亦寄到本刊，可見這班廠家已火燒眼眉。
事實上，廠佬炒燶人仔的消息，年中已開始在一眾中小企老闆及銀行佬口中瘋傳，早前 I.T（ 999）便因炒燶人仔要發盈警。有銀行高層指，這些合約的玩法，與○八年金融海嘯時，不少富豪都中招的 Accumulator（累計期權）十分相似。 Accumulator被譏為「 I kill you later」，與廠佬在聲明中形容的「不平等合約」一樣，升幅盈利有上限，跌幅虧損卻無限。最近，有港商向本刊求助，揭開被劏細節。
對沖變對賭 狂蝕七百萬
從事內地成衣出口生意的陳先生，向本刊投訴，指恒生銀行以對沖為名，氹他買下巨額人民幣期權合約。陳先生表示，銀行職員一一年初開始游說他買期權，「佢話人仔不斷升，買期權可以做對沖，控制成本，仲攞晒公司盤數去睇，以免 over-hedge，又強調不是投機。」一一至一三年，陳生先後與恒生簽了兩份分別是五十萬美元及一百萬美元的合約，「逐月計數，每個月定一日，如果當日人仔對美元升超過合約定嘅匯價，就係我贏，有一千五百美元嘅息收。相反如果人仔跌，我就要按合約面額乘以差價賠錢俾銀行。」陳先生指，那段時間人仔升多跌少，因此贏多輸少，直至一四年初開始出事。
當時陳先生手上有份一百萬美元的合約，一五年才到期，但恒生職員主動話賠償幾十萬，終止舊約，游說他簽一份新約，將面額加大至一百二十萬美元，為期兩年。「佢話玩法唔同，如果人仔升，銀行每個月都會賠足差價俾我，若銀行累積賠逾三十萬，合約就會自動取消。」
陳先生指，當日如常將公司盤數交予恒生，並講明生意額已由每月千四萬跌到七百萬元。「一簽約人仔就開始跌，個個月要抬錢俾銀行，合約亦無法取消。」經歷了一年多的噩夢，陳先生今年中忍痛斬纜，一筆過賠償三百多萬予銀行，提早完成合約。「人仔個勢會一直跌落去，唔想晚晚瞓唔着。之前人仔升值賺過錢，但最終前後蝕咗七百幾萬！」
陳先生先後向恒生銀行及金管局投訴，「因為銀行明知我生意跌咗，仲游說我加碼，明明係投資產品，但就話係做對沖。」但合約上清楚寫明銀碼？「係。係我自己踩咗蕉皮，但塊蕉皮係你擺喺我面前，銀行銷售時有誤導，都要負部分責任。」
翻版雷曼 渣打滙豐最勇
中港中小型企業國際交流投資協進會會長趙志雄承認，過去幾年，內地工廠經營艱難，很多廠佬沉迷炒人仔，「做廠要受勞工條例及政府限制，入料責貨又死，因為樣樣原材料都跌價，做廠咁辛苦，點夠佢玩一、兩鋪人仔？依家人仔係咁跌，死㗎啦，今次食詐胡，搞唔掂，已經有幾間廠走佬」趙志雄指自己公司有三、四百萬人仔，最近都「拿拿臨」兌換成港紙。
有知情人士透露，這一波的人仔期權風暴，有如雷曼事件翻版，牽連最深的是渣打及滙豐銀行。「渣打好多廠佬客，佢喺觀塘、九龍灣特別多地鋪。」他表示，銀行每年都有一筆備用貸款予廠佬，用美金計息，「唔用都要俾息，又唔可以 cut。銀行佬就游說啲廠佬，既然有錢，又要蝕息，不如炒人仔啦。」今次廠佬叫救命，他寸道：「呢啲叫輸打贏要，人仔升咗咁耐，佢哋贏嗰時又唔出聲？」
美國加息，市場預期人民幣仍「冇運行」。恒生私人銀行及信託服務主管陸庭龍預測，人仔明年將再貶值百分之三。「美國出年會繼續加息，美金會持續牛皮，中國則會再降息降準，人仔雖不會大跌，但會保持弱勢。」最近人仔定存息口再次升至最高約四釐，陸庭龍指市民要有心理準備賺息蝕價，打個和，「賺息賺價嘅年代已經過去。」
一口價減四十萬
加息最直接的影響，在於樓市。市場上已零星出現喪劈成交，記者週末前往嘉湖山莊及沙田第一城等細價樓災區視察，發現大部分業主仍未因加息劈價，但急放要做到成交，唯一法則就是：減！一名第一城經紀說：「加息之前，個市一路都跌緊，而家細房做緊三百六十萬，比喺今年初四百四十萬已經減咗兩成。」而天水圍嘉湖山莊、早前有美聯經紀做出二百六十五萬元破底價成交，現時業主普遍驚魂甫定。記者以業主身份試放一個同類細單位，經紀說市價約三百六十萬，並叫記者幫手「炮製」市場氣氛，「如果你急就放三百二十萬啦。當然你可以照放三百六十萬，等客人劈到三百二十啦。」這種陰乾式下跌將是樓市新常態。經紀坦言整個嘉湖放盤約三百多個，但過去一個月成交不足十宗，買家繼續等。
一二年以七百二十萬買入沙田第一城的鄭先生透露，當時付四成首期，分三十年攤還，現月供約萬六。即使來年香港加息四分一釐，他每月只需供多幾百元。假設進入加息周期，每次加息四分一釐，加息十二次，每月供款亦只是兩萬三，「我哋買樓時有做壓力測試，唔怕，而且自住，跌市都唔關我哋事。」不過鄭先生要留意，壓力測試中的最低入息要求，會隨加息而增加，屆時不足便有機會被銀行要求搵人擔保。另外，近一年大量新樓推出九成甚至九成半按揭，引人在樓價高企時上車。未來樓價只要跌半成至一成，便慘成負資產。
等「墊屍底」租金
科達地產主席湯君明展望樓價，認為現時下跌都是「唱出來」的效果，「市場人士唱、地產經紀唱，個個都唱樓市跌，羊群心理，當十個有九個都觀望，咁個市一定會跌」他認為樓市將陰乾式下跌，而戰況尚未正式開始，「而家嗰啲唔叫劈價，真係嘅劈價幾時嚟？都係睇兩樣嘢，第一係供過於求之時。發展商仲有大把貨，佢哋唔會儲貨，只會平賣。第二係好貴息之時。」他指當樓價下跌一成，造了九成按揭的新樓業主頓變負資產，而他們的供款數目亦因加息而上升，「到時銀行要 call你 loan，你都要劈價賣樓㗎喇，呢班人幫樓市『墊屍底』。」
不過，他自己則不會放貨，並決定「坐到最後」，「我屁股大把肉，最差嗰兩次我都經歷過，沙士、禽流感，最後都捱過咗樓市股市唔同，你坐得過，無問題㗎。」對於應否現階段入市，他指未能下定論，但就叫想上車的人不妨等等，未來將可以平租享受住新樓，「未來兩、三年，新樓將陸續入伙，到時競爭大，將有很多單位要以平租推出市場爭客，好多『墊屍底』價租金，住佢兩、三年先」
撰文：黃菲菲、梁佩均
攝影：財經組
攝錄：財經組
插圖：劉志誠
ed_bn@nextdigital.com.hk
|
鍾意就快D Share啦！
|
|
|