豪語錄
約會情人 袁詠儀
一坐低，袁詠儀即說：「今晚約咗張智霖六點半。」你沒睇錯，並非張生忙到老婆見都要預約，而是張太仍然 enjoy約會的感覺。
根據統計，人口中位數正好落在此年紀——四十初度，孩子十歲八歲。早前張智霖訪問，點擊近百萬，講來講去，不外想聽到 Chilam自嘲吓家有惡妻，然後感激吓賢內助相夫教子，大家便窩心，像找到代言人……
現實冇咁簡單，你估粵劇戲寶《河東獅吼》咩？袁詠儀說：「要經營的。」
她趕時間我也趕，事關這天犬兒生日。「係喎，記得你個仔細魔童半個月。」大情大性的靚靚粗中有細：「嗱送紮花俾老婆，係老婆生你個仔㗎。」
諗落啱數，但麻甩佬會嗎？
袁詠儀說：「張智霖都唔會買花，佢話寧願買包，食得落肚唔嘥錢。」
美丈夫原來並不浪漫，令張太灰心又放心。
親與愛
Chilam大條道理談情說愛，作為火線上的萬人迷，尤其拍了套《十月初五的月光》，有形象需要的；袁詠儀呢？「要我作出愛的回憶，咁肉麻。我都仲講，但唔抽象，例如每次教仔意見不合，我會問：『你有幾愛我？你唔愛我嘞？』」老公脾氣好，她不諱言有時恃住咁逼到張智霖埋牆角。
「怎說呢，我總相信愛。阿仔阿媽甚至姑姐阿姨都有血緣，夫妻沒血緣，我很難當他是親人，相反，要有愛才會成日掛住——昨晚我又『約』咗老公去睇戲。不能擔保一定到老，是要珍惜到老。」
那就好了。
「我 OK，不太惡，係唔易 say yes啫。佢話要出去玩，之前已連出兩晚，仲加多句：『今晚想玩到盡。』我嬲：『好囉喎，你新戲宣傳咗十幾廿日，話自己聲都冇，返到屋企我唔敢撩你傾偈；難得宣傳完，又去玩？』佢就乖，沖涼，陪我睇電視，瞓覺。」
筆者有點失望，理想世界應該是，好男人想陪陪兄弟，賢妻象徵式發發嬌嗔，最終放老公一馬，豈非兩全其美？
「不是。」袁詠儀倒老實：「佢話：『有個 friend要走嘛。』我話：『再係咁我走！』」
相敬如賓太遠古太矯飾了，原該有鬧交、有磨合，我想起張智霖名曲，這才叫《現實愛情嘅事》。
跳傘與飛天
袁詠儀續道：「前排上內地真人 show《一路上有你》，睇見一對新婚的，我和 Chilam暗笑人家寃氣；諗深一層，只因我們已經缺乏那種熱戀，正如笑小朋友天真，其實應該可惜大人失去了天真，所以要提醒自己——唔係返屋企食飯，係約會食飯。」
那個節目，張生張太化埋老妝粉墨登場，老夫老妻反而易搞，怎會不相依為命呢？我輩（年齡中位數嘛）尷尬在，去日苦多（計埋拍拖廿幾年），來日方長（如無意外仲有幾十年）。
少年夫妻老來伴，中年夫妻怎麼辦？
——張系國《橡皮靈魂》
袁詠儀說：「我不准他去玩，其實自己都未定性，例如我試跳降傘——這個並非比喻，但知道不能罔顧安全，我有家庭。」
張智霖便可以衝上雲霄幾多次都得？「這方面我很傳統，男人趁有氣有力去衝，女人畢生事業就是個家——我廿幾歲已咁諗，所以拖後去做，卅幾歲才生育。」
捨與得
年輕網民可能只識袁詠儀是星太，殊不知她比你們更年輕時已破紀錄兩封影后。若說為生育暫別影壇，林嘉欣算任務完成還復出奪金馬獎，旁觀百感交集的是袁詠儀吧？
「我戥嘉欣開心，近年我都有接大陸劇，揀些日數短、錢又多嘅。」
影后，就不追求愈演愈深嗎？
「藝術嘅嘢，冇人知㗎，我睇劇本時以為係，臨場另一回事，仲演得唔愉快。所以但求導演不差、對手 OK，享受過程便好，我不再多管閒事。
「算一個小小秘密，每次我出埠，魔童會情緒唔穩定，老公打來呻搞唔掂，我便在電話哭。爭取時間陪孩子，人要有捨——捨棄的捨，才會有得。如果大家羨慕我得到幸福，因為我捨棄了不少機會。」
與林嘉欣相似是失驚無神來次極性感。「係囉，有時為吓自己，咩都試試。」
助手與學生
真一句相夫教子了得？
「相夫是，要澄清，並非人家以為我安排晒工作，張智霖未至咁冇主見。而是我退下來，作為助手、二打六，我睇得清楚周圍面口的微妙變化；明星被哄着，有時唔清醒。
「我更在意提供溫暖的家給他，講緊真係注意調節室溫，凍要有衫俾佢著，有飲有食。我懂營造氣氛，兩公婆嗌吓交，老公話頭痛，跟住我氹番，咁又一日。」
教子更任重道遠。
「魔童讀國際學校，沒什麼考試成績比較，我最大成就係個仔快樂。朋友讚他將來可以入行，我話：『係，都係走搞笑路線。』他很幽默。
「你說你兒子忙於做功課，而你已不懂所以無從着手？我會問魔童：『呢條數點計，不如教吓媽咪啦。』小朋友很樂意反過來教父母。一定找到溝通方法的。」
佛與人
對，筆者與魔童同齡的犬兒今天生日。昨天我提議九歲前夕來次父子一齊沖涼，被拒絕；無癮在，這次唔得，將來更難。
袁詠儀說：「有段時期我和兒子水火不容，他甚至話要換媽咪；反叛年齡，將來必然還有第二波。魔童現在什麼都要我隨傳隨到；但好快，他會嫌媽媽嘮叨問長問短。係唔公平㗎，記住開心片段便好。」
惟有記憶永恒。
「無常呀，夫妻如是。我冇張智霖講得咁玄妙，他是佛，我是人。勝在我們都怕麻煩，會彼此提醒：『可否擔保下一個好得過眼前？』何況我係外貌主義者，太容易睇穿人性格缺點，倒不如信外表——我覺得我老公夠靚仔。」
花開花落
港姐影后果然退下火線了，像師奶般追八卦新聞，即使當事人明明是她和丈夫的老死。「真係爆！郭富城好愛好愛囉，唔好笑阿城，所以我話，係我哋缺少咗啫。」
我補充，年度最爆新聞，還數司馬燕。
袁詠儀嘆道：「係，如果司馬燕生前已知情，她一定也好愛好愛，才會這樣。」
於是我開始明，為何張氏夫婦不約而同「現代說永遠已經很傻」？是蓋了棺，亦難定論。
今晚買花嗎？
撰文：余家強
攝影：胡春輝
攝錄：梁炳權
髮型： Jacky Ma@Headquarters
化妝： Kerry@Zing make up School
|
鍾意就快D Share啦！
|
|
|