眾人諸事
阿叻飲歌助民建聯洗腦
藝人陳百祥（阿叻）上週六晚喺港台節目《我係乜乜乜》自以為是大發膠論，先踩黃之鋒八大都考唔到，再指網民「憎人富貴厭人窮」，然後豪言自己「後生啲」可能係 facebook創辦人、有機會做特首。網民不屑其言論翻佢舊賬，恥笑阿叻曾兩次破產，搞過嘅上市公司「東方魅力」更早已冇影，唔知佢有幾叻喎。
講到阿叻嘅「叻史」，不得不提佢九十年代曾經唱過首街知巷聞嘅《我至叻》，大家以為呢首歌係遊戲節目《運財智叻星》嘅產品，但其實多得首歌先催生個節目。阿叻近年曾自爆，當年係程介南用民建聯資源搵佢唱首歌，皆因九七臨近，好多香港人想移民，所以想唱好香港。
睇番資料，呢首歌同埋譚詠麟唱嘅《人生基本法》，夾埋整咗隻叫《 50年友情不變》嘅 EP，屬非賣品，九四年聖誕推出，限量三千隻派俾民建聯會員，本來派完就算，但著名製作人蕭潮順眼見有得搞，於是添食拍埋電視遊戲節目，至於《人生基本法》，後來更被港台用來宣傳《基本法》。
又有「基本法」又有「五十年不變」，呢隻碟的政治味恐怕已經不言而喻，難為阿叻仲話自己唔掂政治，實情佢早已行先一步，民建聯甚至係佢紅得起嘅恩人，咁阿叻今日言論親建制，又有幾出奇？
張超雄再議網絡 23條：一嘢轟落去﹗
立法會上星期開始為「網絡 23條」進行二讀，泛民會議召集人何秀蘭提出中止待續議案，工黨張超雄（阿 Fer）甫發言就學網絡紅人「達哥」講咗兩次「聲音畫面有冇問題？」提醒在場議員直播打機呢類免費娛樂，係時下年輕人嘅生活方式。五十八歲嘅阿 Fer即時紅爆高登。
有工黨中人話，阿 Fer形象嚴肅，其實佢有時都幾搞鬼，例如佢近年多咗用手機影相兼自拍，又會學砌相親自放上 facebook。之前無綫劇集《創世紀》中許文彪講炒樓賺大錢，「咁叫公平咩？」「公平咩？」成為網絡潮語，阿 Fer話下月立會恢復審議網絡 23條，佢嘅發言同抗爭一定會「一嘢轟落去」，問吓在座官員同支持草案嘅議員，「因為版權法而令年輕人生活方式受到衝擊，公平咩？」皆因法例唔應該只係保障有權有勢嘅人，作為社工，佢覺得要多啲對年輕人有同理心。
689搏大霧聖誕前委任李國章
梁智鴻上月初卸任香港大學校務委員會主席一職後，位置一直懸空，最初有傳 689諗住過埋區議會選舉，先至委任史上最唔受港大師生校友歡迎嘅李國章接任主席，但拖到依家都未有聲氣。
臨近聖誕，公眾對時事敏感度比較鬆懈，有傳 689想趁聖誕前夕公布委任李國章，搏大家出咗埠唔得閒抗爭。港大校友關注組發言人葉建源話， 689本週二至四上京述職，可能想借呢個機會順手委任李國章，扮係得到阿爺首肯，呢份送俾港大嘅聖誕禮物都算係最無恥喇。
西區 CID小學雞
警隊民望持續低企，港大最新民調顯示滿意度淨值只得兩成九，喺九個紀律部隊包尾。但原來警隊當中都有「優良」隊伍。咁值得表揚嘅，就係西區刑事調查隊（俗稱 CID）第五隊。一份相信係該隊警長今個月初發出嘅工作指示，充分顯示出佢哋幾咁「紀律嚴明」。
當中有九項指令，包括提醒隊員留意 OT時間同年假數字、離境要通知警長一聲，聽落都算合理嘅。但警長又提醒隊員準時開工，出去做乜都要通知佢，撞正佢放假就要 WhatsApp佢。仲有，收到警長或者案件主管嘅電話，一定要聽等等，管得好嚴咁款。
其實當得差都咁大個人，係咪要準時開工，都需要咁「溫馨」嘅提示呢？有警隊中人不敢苟同，批評呢份指示「好似小學生讀書咁款」。講真，警員要自律，應該係基本嘢，咁都要提醒，真係幾小學雞。
撰文：巫不言
插圖：詹震寰
news@nextdigital.com.hk
|
鍾意就快D Share啦！
|
|
|