2015年12月24日 星期四

日日湊 B 黃德斌離奇多個仔 [壹週刊 - 1346]黃德斌,M1,

週日,黃德斌做familyman,一家三口家庭樂。探熱針日日湊B 黃德斌離奇多個仔97年重返無綫後,等足18年,52歲的黃德斌終於有機會在新劇《刀下留人》擔正做大台男一;打工夠長情,同女友黃美恩(Joyce)拍拖十幾年,更加打風都打唔甩,但講到娶老婆,黃德斌就一直毫無表示,更講到明唔生小朋友。但近日黃德斌同女友出動,總是用BB車推住個約一歲大、面圓圓的B仔同行,夜晚同朋友佐敦街頭食糖水,週末尖沙咀 ...


週日,黃德斌做 family man,一家三口家庭樂。

探熱針

日日湊 B 黃德斌離奇多個仔

97年重返無綫後,等足 18年, 52歲的黃德斌終於有機會在新劇《刀下留人》擔正做大台男一;打工夠長情,同女友黃美恩( Joyce)拍拖十幾年,更加打風都打唔甩,但講到娶老婆,黃德斌就一直毫無表示,更講到明唔生小朋友。

但近日黃德斌同女友出動,總是用 BB車推住個約一歲大、面圓圓的 B仔同行,夜晚同朋友佐敦街頭食糖水,週末尖沙咀圓方購物, BB都在場。忽然有個仔,黃德斌女友在 fb透露 BB是契仔:稀稀。契仔任由契爺契媽日日湊,離奇!

坐街食糖水

黃德斌同女友黃美恩 Joyce忽然變成三人行,知情者不多,但女友在朋友圈則有透露 BB叫稀稀,是她的契仔。

有晚黃德斌帶住稀稀,同兩名友人在佐敦廟街坐街邊食糖水吹水,女友 Joyce則與其中一人忙住同 BB影相。

面圓圓的稀稀眼仔碌碌四圍望,又不時用手仔搭住契媽,冧到 Joyce現晒心形眼。夜晚十點幾,稀稀冇扭眼瞓,對於人來人往的街頭,更加沒有半點不安。

稀稀冇電會自己瞓,全程冇扭計,超乖巧。

拍拖十多年,黃德斌同女友依然恩愛,行街一齊聽語音短訊。

滿載而歸,買完嘢,女友將銀包交俾黃德斌,邊個係老闆俾錢,好明顯!

見稀稀瞓醒,黃德斌女友即時揮手撩 B仔玩。

冧笑湊 B

以往鍾意踎茶記、踩單車的硬漢黃德斌,如今變成愛上 BB的湊仔公。

本週日(十二月二十日)晚上九時,被女友繑實的黃德斌,推住 BB車「一家三口」現身尖沙咀圓方, Joyce行入 L'Occitane買護膚品,孭住相機出動的黃德斌推住 BB車在外等,只見他不時望住眼仔瞓的稀稀,露出滿足神情。 Joyce揸唔定主意,走出門外問男友意見,但一見到稀稀, Joyce又忍唔住走埋 BB車撩他玩,逗得稀稀哈哈笑,站在旁邊的黃德斌亦加入陪玩,更罕有展現冧笑。

B仔精靈可愛,黃德斌女友不停為他拍照留念。

本月初黃德斌同女友湊住稀稀,與友人坐街邊食糖水。

愛運動的黃德斌,昔日放假習慣與 Joyce到郊外踩單車,如今則湊仔為樂。

想過領養

黃德斌同女友拍拖十多年一條心,但講到結婚,一直採取拖字訣,年前接受訪問時被催婚,他說:「未定(結婚)!生小朋友更加唔會諗,我細個環境太差,唔想下一代重蹈我嘅困境。」

唔願娶唔想生,但黃德斌卻有領養的想法。「女友和我想法一致,生兒育女是很大責任,不是養狗仔玩完就算……真係生到就生,生唔到就領養。 DNA,嘥氣小朋友是白紙一張,一樣叫你『老豆』,何必執着?」

黃德斌抱埋稀稀出席徐榮細女滿月。

黃德斌女友不時在 fb上載稀稀生活照,直指 BB是契仔。

此子何來

近幾個月, Joyce不時在 fb上載同稀稀的合照,而黃德斌亦經常帶埋 B仔去朋友聚會,例如徐榮 B女滿月,礙於稀稀的身份,兩人口徑一致,聲稱是契仔。

「一歲人仔,最需要媽咪照顧,點會有父母肯將自己個 BB,交俾無湊仔經驗嘅契媽契爺日日照顧呀!不過我哋都唔敢追問太多!」黃德斌身邊人說。

契仔又好,領養又好,稀稀的出現已令黃德斌起了變化,最起碼,笑多咗!

早前黃德斌同女友為稀稀慶祝一歲生日。

明年一月中,黃德斌第二部擔正的《當鐵馬遇上戰車》接住出街,稀稀又幾旺契爺喎!

黃德斌首部擔正的《刀下留人》,一度被無綫嫌太血腥,差點變成倉底貨。

視如己出

藝人為事業拚搏,到發現想生兒育女時,可能已為時已晚,領養當親生,愛心無限。

溫碧霞

00年同金融才俊何祖光結婚後,溫碧霞享受二人世界又寄情工作,到發現想生 B已屆 44歲。 10年與老公決定領養一名在江蘇被遺棄於火車站的男嬰,為他治好皮膚病及咳嗽,之後申請養子成為美國公民,取名何國倫,英文名 Xavier。

張慧儀

03年被未婚夫霍紹裘打傷後,情緒出現問題的張慧儀退出娛樂圈,離開香港轉往大陸做健康食品生意,在北京福利院做義工期間遇上患有嚴重先天性心臟病的 Hanson(張昊維),未嫁的她安排手術並正式收養他,現時養子已經 10歲,在香港接受教育。

陳美琪

與前夫馬清偉一起時曾試過小產的陳美琪, 99年與現任丈夫、美籍華人忻尚永婚後定居上海,並照顧丈夫與前妻的一子一女, 08年,正式收養在山西被人遺棄於垃圾站、患有脊椎爆裂的初生 BB女,取名為 Lucia。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...