唱得的慧嫻同學友主攻發燒碟市場，成功開拓一條財路。
探熱針
慧嫻、學友 Hi-Fi碟勇救環球
無綫搵汪阿姐同秋官主持的《 Sunday靚聲王》，成功挽回一輪面子，事實證明老一輩 uncle、 auntie歌手，有不容忽視的吸睛能力。情況好似環球唱片，過去幾年唱片業績差強人意，偏偏有盧冠廷、陳慧嫻同歌神張學友出 Hi-Fi靚聲碟救亡，加上陳慧嫻回歸樂壇後登台騷密密做，令公司起死回生，轉虧為盈。幾時都話，薑愈老愈辣！
唔靠得 Eason
本月初，商台《叱咤》樂壇流行榜公布「叱咤我最喜愛男歌手」五強，最後一位竟然是「巨聲幫」的坤哥（吳業坤），樂壇有幾鼎盛，可想而知。生意難做，唱片公司規模大如環球，又有個唱片銷量穩定的陳奕迅坐鎮，業績一樣危危乎。
「 Eason同公司（環球）只係唱片代理，無經理人約，加上一線歌手 budget條數唔細， Eason係賣得好，但公司無乜着數。」一名環球職員透露。
Eason忙住做「陳永安」，逢週末就要巡唱；李克勤寧願同容祖兒開騷唔出碟，經理人合約屬於環球的歌手，如 Kary（吳雨霏）、關楚耀，唱片量賣有限數唔在講，想靠出席活動幫補「家計」，亦受到無綫旗下的「星夢娛樂」平價頂爛市衝擊，唱片公司業績一直見紅。
最大金主
新一輩歌手吸金乏力，求一線生機，只好向班唱得的老餅埋手。環球主攻回報率不錯的發燒碟市場，先有歌神張學友，推出個人第三張發燒碟《醒着做夢》，英國倫敦 Abbey Road Studios錄音，美國紐約混音，揼本製作；即使派台力 plug的《用餘生去愛》未算唱到街知巷聞，唱片銷情依然理想，成為同月的銷量冠軍，埋單有可觀進賬。
最意想不到，是七年冇出過碟的盧冠廷，今年中推出新碟《 Beyond Imagination》，翻唱自己的名曲和作給其他人的經典，一樣賣到金唱片銷量！
但年度金主，則是唱片連經理人合約均屬於環球的陳慧嫻，去年在紅館開《 Back to Priscilla 30th Anniversary Concert》，緊接多場巡迴及多場《寶麗金永恆金曲演唱會》，明年再踏紅館開騷，成為公司最大一棵搖錢樹，難怪慧嫻要求再出翻唱唱片《 Evolve》食老本，環球都全面配合。
現今香港樂壇，只能依賴一班上世紀歌手吊命！
老餅有火
新不如舊，造就舊一輩復出搵錢，老餅開 show，十居其九反應熱烈，可以一加再加。
撰文、攝影、攝錄：娛樂組
|
鍾意就快D Share啦！
|
|
|
