細細老師曾經痛恨媽媽令她 DNA出錯，「慢慢知道佢都好痛苦，面對家族嘅壓力，佢承受的污名都好大。」母親近年已接受現實，有街坊撞到她倆：「同個女去行街呀？」
「係呀。」若在以前，她會充耳不聞。父親去年去世，在病榻上不忘叮囑她「要幫手搞我件事」。細細老師在靈堂上再穿男裝，以長子身份處理白事，了卻先人心願。
非常人語
摸黑吻一吻 雙性人細細老師
五十年前，陸家的孩子呱呱墜地。揭開襁褓，卻是噩夢的開始。在嬰兒的兩腿間，有一顆花生米大小的肉芽，尿道卻長在會陰。這是男是女、是人是妖？連醫生都答不上。
半年後，孩子的下體長出了疑似睾丸的兩團肉，出世紙性別一欄，總算能如願寫上「男」，取名耀鴻。相士說他受不起這剛陽的名字，建議改名，父母偏不信邪。由八歲開始，他進出手術室不下二十次，「切開隻蕉，塞番條飲管入去。又喺大腿、屁股割啲皮肉、補上去，令佢大啲、長啲。」不幸地，割肉壯陽的工程從沒成功，「我唔係第一年做手術就知咩事，要到第二、三年先識得追問。淨係知佢哋想我可以企喺度小便。但，點解要年年去醫院？點解要咁痛？點解唔可以踎喺度小便？」
與別不同就是原罪。往後多年，他飽受欺凌、嘲笑、性侵犯，直至把男人這角色演得純熟。然而在一次身體檢查中，竟發現他體內有半份子宮和陰道，「學做男人學得咁辛苦，你而家又要我學做女人。我當時三十六歲，再學十年都變阿婆啦。」一切又得推倒重來。
男人來自火星，女人來自金星，雙性人來自哪星？耀鴻只知世上沒有他的容身之所。這寄寓光耀門楣的名字，終究連同那布滿補釘的陰莖，一併割掉。她現時叫陸月明，與溫柔的嗓音很相襯。至於「細細老師」，則是行走江湖的寶號，反正長短大小都不再重要，「我真係唔想再做男人，雖然我唔渴求做女人。」年近四十才由男變女，她不是沒有猶豫，「究竟我做唔做到女人呢？不過做男人咁難，都做咗咁多年啦。」只是不忿身不由己，「以前為咗好過日子啲，屋企要我做男人；而家為咗好過日子啲，醫生要我做女人。幾時可以做番我真正嘅身份，人哋唔會因為我係雙性人而歧視我、侵犯我？」 Facebook有五十八項性別選擇，當中包括雙性（ androgynous）。香港身份證仍是非男即女，懶理黑白之間還有遼闊的灰色地帶。
對細細老師來說，做男人是一場漫長的酷刑。她患有「雄激素不敏感綜合症」，染色體是男性的 XY，身體對雄性荷爾蒙卻無動於衷。體毛、鬚根、喉核，都不曾在她身上出現，蘭花手卻是渾然天成，「揸筷子時自然就會咁，冇人教的。爸爸見到，一下就扑落嚟。」手指吃過不少苦頭，一旦放鬆，又故態復萌。「由細到大，都係人哋話我知咁樣『好女仔』，我本身冇概念。 OK，父母話乜就乜。我只係奇怪，點解我做唔到佢哋嘅期望。」長期反串不疲累嗎？「慣㗎啫。問題係，當你好努力都得唔到欣賞，仲要俾人玩。對細路來講，咁好辛苦。」做女孩會否自在一點？「有閃過呢個念頭，但同時又會自我批判，我係咪變態㗎？呢啲叫人妖。」
陰莖
小學雞的玩意離不開屎尿屁。耀鴻無論開大開細，都要衝入廁格。公廁那條「大運河」直通羅馬，間格卻沒有頂天立地。常有好事之徒冒着墮坑的危險，也要一窺他褲襠下的秘密。其他同學漸漸發育，他卻鵪鶉依舊，「同佢哋相處，我攞唔到定位。男嘅打你，女嘅笑你，咁咪要 perform。有段時期，我都扮到好暴戾咁。但後來諗番，我真係唔鍾意。」他住秀茂坪下邨，學校在上邨。童黨見他形單隻影，由山頂窮追至山腳，不外乎是強徵路費，或把書包掉到老遠，要他連爬帶滾的去撿拾。後來他學會先下手為強，「人哋未兇你，就搵石頭掟佢先。其實惡得出咩樣？只係發癲。」
最恐怖的刑場在醫院。由八歲開始，耀鴻的暑期活動就是被切割。試過有兩次，醫生嫌他太瘦弱，手術前先催谷兩週，「一日食四、五餐，唔准食剩。否則撐唔住個手術。」他在病房中首次發現同類，大家以尿裝為標記，「都係修補性器官、做尿道下裂手術，係咪雙性就唔知，當時根本冇呢個概念。只知暑假、寒假就會撞到，『保重啦，下年見』，冇人喺醫院會咁講。」就算在今日，人工重建陰莖仍是難度極高。這十隻稚齡白老鼠年年被修理，卻落得全軍覆沒。
病房內也有真男人。同層有位留鬚的叔叔，罹患肝癌，「成個西部牛仔咁，係我當時嘅 role model。」鐵漢一直強忍着痛楚，某日卻一躍而下。耀鴻和一名學護剛好扯住了他的衫尾，最終還是目送他肝腦塗地，護士病了一星期才復工。「好震撼。係佢啟發我，原來死是一個選擇。」他不夠力攀過圍欄，餘下的暑假就被綁在床上。
事後回想，細細老師的抑鬱症當時已開始發作。做三行的爸爸很少來醫院探望，專程請假來勸說：「你生出來就係不男不女。做手術，係要盡長子的責任，將來傳宗接代……」直到十三歲那年，他堅決說不，「嘈得好勁，阿媽喊、阿爸鬧。惟有唔返屋企，落街又俾人蝦，頂你個肺。」
乳房
病友後來相繼自殺，到三十歲時，只剩下細細老師一人。他不是不想死，只是命太硬，「試過企喺馬路，望住部巴士衝過來。」卻被路人一手扯回來，「你傻㗎，睇路呀！」又試過半夜在醫院吊鹽水，遭細菌感染，休克了十分鐘。又遭鄰居發現，撿回一命。死不了就得繼續做男生。到了十六、七歲，乳房竟然有異動，「第一個反應係，死啦，我點買胸圍？怪物咁。下面已經夠怪，仲多嚿嘢喺上面？」惟有遮遮掩掩。
家境拮据，細細老師唸到中三便放棄升學，「我想照顧自己，唔使攤大手板問屋企攞錢。以為佢哋會少啲管我，後來當然發現唔係。」他做過好 man的電工，但手術後遺症纏身，經常患尿道炎、發低燒，因病假太多而被辭退。後來加入安老院，由福利工作員做起，再讀夜校，輾轉成為註冊社工。性別認同障礙卻揮之不去，經常進出精神科，「醫生和心理學家一直說服我，要接受自己係男人。」雖然他不曾勃起。由於體弱多病，為了自醫，他在二千年開始兼讀浸大中醫學位課程，「如果考到執照，有自己嘅 business，對性小眾嚟講，係容易過打工。」
子宮
核爆之前，世界總是出奇地平靜。在一次曼谷之旅，細細老師發現彼邦的醫院美輪美奐，與廣華和威爾斯大不同，便即興來個身體檢查，竟有驚人發現：他體內有發育不全的子宮組織。回港後，精神科醫生恍然大悟：「你會唔會考慮做女人？」
細細老師猶豫了好幾個月。他的雄激素比尋常男人高出六倍，大腦發現身體雄風不振，所以過猶不及，患睾丸癌的機會卻因此大增。醫生說：「你仲諗乜嘢？會死㗎。」引刀成一快，把殘缺的陽具、子宮一併割捨。其中一顆「睾丸」其實是卵巢，證實了他是雙性人。手術後，細細老師的雌、雄性荷爾蒙均跌至極低水平：「成個人好 calm，冇晒火氣，似出家人。對名利、權力、性、愛都無慾無求，好舒服。」物極必反。半年後，她開始嚴重抑鬱。「冇咗荷爾蒙，精神根本支撐唔到。」原來不但父母、醫生、社會要你歸邊，肉身也不想兩頭唔到岸。現時她要攝取低量的雌性荷爾蒙，做個「真」女人。「嗰半年嘅平靜，令我內視到自己其實係點。扮咗四十年男人，我好純熟，但已經冇晒動力再演下去。」
良心
變身後，細細老師輕鬆了不少，入廁格不用左閃右避、浸溫泉不必等到夜深。五年前，她成立了「藩籬以外」，以中醫和社工的身份為雙性人發聲，今年初正式出櫃。所謂組織，其實就是獨腳戲，至今她在香港仍未找到另一位願意面向大眾的雙性人，「企出嚟嘅風險好高，但再唔出聲，我過唔到自己的良心。」上個月，她自費出席聯合國人權委員會，報告雙性人在香港的情況。聯合國向港府發出指示：非必要的手術和治療，要待雙性人心智成熟，才讓他/她自行決定接受與否。「好過冇，雖然聯合國係冇牙老虎。」
萬里迢迢，只因在本地疾呼沒有回響，「同醫生傾，佢哋覺得社會而家咁樣就好好，係雙性人家長要求做手術；同父母傾，佢哋話醫生嘅意見咁專業，可以唔聽咩？同政府傾，又話尊重醫生和家長。咁邊個尊重小朋友？」香港根本沒有統計雙性人的數目，躲於衣櫃的幸存者不容易被發現，「究竟我做嘅嘢，雙性人係咪認同？我好想佢哋話我知。」
性愛
追求者眾，但此刻細細老師寧願孑然一身，「而家都有（人追），但對方唔想我做雙性人工作，佢又唔係我好心儀的，咁做乜要開始呢？」「做我身邊嘅人會好辛苦，唔可以好似小妹妹咁話：試吓先啦。啲人指住我嚟笑，我習慣咗，佢得唔得？我都唔想偷偷摸摸，唔通喺街唔拖手，返到屋企先拖？」
細細老師做仔時，已有女孩投懷送抱，「有啲女仔係鍾意中性氣質的書呆子。」試過有女同學蹺課，被訓導逮住，竟推說自己跟陸耀鴻去拍拖，但他明明在課室釣魚。女孩被開除後，仍然日日在學校門口等他。「我鍾意女仔啫，唔係係人都啱㗎嘛。嘩，你 gay㗎？即係係人都啱啦？完全係謬誤。」自出櫃以來，細細老師明碼實價，省卻不少誤會。為何急於着燈，不能先摸黑吻一吻？「自己知自己事。人哋追我，我接受咗，通常有兩個後果：對方知道我係雙性人後，即跑；但最傷既係，佢以為自己接受到，結果一年半載後，先話頂唔住家人壓力。」也試過在肉帛相見時，對方下意識的避開，「女人推開你，未必要講理由，但我會感覺到。」
轉性後，細細老師依舊喜歡女生，變成了另一種假鳳虛凰，「令女人開心，唔一定要大大條陰莖。」但無論是男是女，她都只能施予，「我嘅滿足係見到對方開心。如果要我性興奮，地球都應該冇乜人做到。我接受呢個現實。」忽然變了同性戀者，明光社聞腥而至，「《聖經》有句話，叫『逆了本性』，佢哋用呢一點去批判同性戀、變性人。但喺我身上用唔着。我從來都冇變，從來都鍾意女人。男、女唔係我可以揀，講來講去，係你哋令我冇咗個權利。」
撰文：蔡慧敏
攝影：葉漢華
攝錄：高仲明
news@nextdigital.com.hk
|
鍾意就快D Share啦！
|
|
|
