熱爆娛樂: 鄧健泓搵靠山　厚顏翻兜陳志雲 [壹週刊

2015年12月24日星期四

鄧健泓搵靠山　厚顏翻兜陳志雲 [壹週刊 - 1346] 志雲,鄧健泓,M1,陳志雲

娛樂偵訊

鄧健泓搵靠山　厚顏翻兜陳志雲

無綫前總經理陳志雲與前助手叢培崑秘撈收受利益案，上週五（ 18/12）宣判，陳志雲獲輕判罰款八萬四千元。官司擾攘五年，跟他一度疏遠的鄧健泓劃清界線，直至判刑當日，卻離奇現身法院。原來無寶不落的鄧健泓將約滿無綫，並打算轉做製作人，所以現實的他更翻兜在商台做高層的陳志雲！

離奇撐場

拖了五年的官司終於宣判，陳志雲出庭當日除了親密戰友王喜，還有數十名親友及支持者到庭聲援，包括商台副主席俞琤、林以諾牧師及與他疏遠多時的鄧健泓。見到現實鄧健泓出現，大家都感到詫異；而忽然蒲頭的鄧健泓沒有幫手護駕，只是掛住接受訪問。

「五年來，陳生打咗四十堂官司，都未見過 Patrick（鄧健泓）出現；今次突然咁熱心，大家都覺得好奇怪。出庭前一晚，佢打俾陳生，問大家會喺邊度集合，第二朝佢有去香格里拉酒店 join食早餐，不過冇乜人理佢。」知情人說。

王喜：佢以前有更重要嘅事

左二起：王喜、馬時亨和林以諾一直很支持陳志雲，對於鄧健泓（右二）今次才撐場，王喜以短訊回應謂他過往可能有更重要的事才未能現身。

王喜和「愛將」梁泰來沿途為陳志雲開路，但當時鄧健泓就墮後。

教路宣傳

厚顏翻兜陳志雲，因為鄧健泓要鋪路做製作人。其實自陳志雲離開無綫後，原是「迷雲黨」的他一直被大台投閒置散，月前他為女友石詠莉籌劃出發燒靚聲碟，見反應不俗，加上即將約滿無綫，鄧健泓決心放手一搏，自立門戶。

鄧健泓有事鍾無艷，陳志雲依然大方任「用」，八月石詠莉出碟，亦有幫手度宣傳策略。當時陳志雲公開講：「呢排宣傳成日見，佢（指鄧健泓）同石詠莉仲嚟過我屋企食飯，又喺我屋企 sell我啲朋友，買佢女朋友隻新碟，我啲朋友都有同佢落咗好多 order。」

當初陳志雲出事，身邊愛將第一時間閃開避嫌，人情冷暖。

「 Patrick同崔建邦可以返去無綫，都係陳生幫手嘅，出事後，佢兩個都冇乜點理陳生，令佢好傷心。呢幾年大時大節 Patrick會搵佢，講吓新年快樂咁囉！陳生亦唔記仇，幫得就幫，所以連俞琤都話陳生係當今世上，極少數在生而能夠俾咁多人稱讚嘅人！」知情者說。

陳志雲不記舊惡，今年八月鄧健泓女友石詠莉出碟，他更做幕後軍師，教路做宣傳。

07年鄧健泓在陳志雲搭路下重返無綫，對他照顧有加，但自陳志雲官司纏身後，二人關係一度疏離。

「我都要食飯」

本刊致電鄧健泓，他承認將全職做製作人，亦坦言陳志雲給他不少幫助。

壹：壹週刊　鄧：鄧健泓

壹：點解會去法庭？

鄧：因為係比較重要嘅關口，佢係我恩師，我好想去現場支持佢。

壹：之前從冇見你去法庭撐佢？

鄧：支持有好多種，之前我深信係一件好簡單嘅案件，我深信會冇事。但上次已經係罪成同判刑，係關鍵時間，作為朋友一定要支持。

壹：近年同陳志雲見得密唔密？

鄧：都密㗎……有記者問我哋係咪因呢單官司割席，從來冇！割席係你哋講咋，我從來冇！咁多年來，我哋有 keep住來往、食飯，我一直喺佢隔籬，感情一向都好。

壹：轉做製作有問過陳志雲意見？

鄧：呢點就冇，搞製作公司係自己想做嘅嘢，一直做緊，但宣傳方面係有問佢。

壹：有冇傾吓未來方向？

鄧：未來路向我都好清楚，除咗幫我女友做碟，仲會做舞台劇同製作音樂。我不停幫人寫歌，最近幫陳敏之寫咗兩隻，又幫一位台灣天后寫咗一份歌詞，我都要食飯。