Hazel（唐紫睿）
有五呎九吋高的 Hazel，單憑身形已經贏晒對手，加上好勇鬥狠的性格，連同樣高大的龍小菌都唔夠佢打。
探熱針
堅打！「晶女郎」 Hazel講明要右手 對手 Winkie退賽保命
明年四月出街的 ViuTV話題節目《 G1格鬥會》，以一班女藝人拍 MMA真人騷為賣點，女人多是非就多，互片出口仲郁埋手。據了解，比賽期間曾經打到動真火！早有牙齒印的「晶女郎」 Hazel（唐紫睿）和前 HotCha成員 Winkie（黎美言）勢成水火；火遮眼的 Hazel贏獎其次，以眼中釘 Winkie的右手為終極目標。為防有人借機公報私仇，保住手腳要緊的 Winkie，即使打入四強，都被迫臨尾退賽。
手口並用
ViuTV的 MMA真人騷《 G1格鬥會》，參賽者要埋身肉搏堅砌，八位參賽女藝人甚至要簽下生死狀，打死冇怨！
打真軍自然動真火，節目還未出街，有份參賽的吳浩康前度 Hazel（唐紫睿）因不滿對手 Winkie（黎美言）拍訓練花絮時打得「太認真」，令參賽者之一的阿旦（鄧洢玲）面部受傷；當事人未投訴，揪得的 Hazel卻藉機出手，教訓 Winkie，二人打出牙齒印，成為仇家。之後出席活動，兩人互相單打，郁完手再出口。
Hazel寸爆：「贏要贏得光明磊落，有啲參賽者嘅所作所為，我係極度鄙視。」
爆響口
據悉，八個參賽者中，打到周身傷的鄧洢玲（阿旦）及王蘊妮已頂唔順退賽，身形高大的龍小菌及劉燕妮，亦大熱倒灶，剩下鄧穎芝、 Hazel、 Winkie及郭思琳進入最後四強。
有指玩開泰拳的鄧穎芝及高頭大馬的 Hazel是《 G1》大熱，恃住揪得的 Hazel，試過忍唔住向工作人員爆響口，要在終極一戰對準眼中釘 Winkie的右手攻擊。
「 Hazel話如果 Winkie四強贏咗，就有機會同佢對打，到時一定去到盡，目標係 Winkie隻右手。我哋有勸佢只係一個節目，唔使為啖氣去到咁盡，雖然真打手腳腫瘀在所難免，但玩到咁大，就冇謂」場組工作人員透露。
承認退賽
自己隻右手被視為目標， Winkie亦收到風，為安全計，她寧願放棄機會，決定退賽。求證 Winkie經理人公司星韜，公司高層 Carol亦承認有聽過此事。
「關於呢件事，我哋公司都有聽過吓，但始終係傳聞，我哋冇專登搵當事人求證，不過為咗旗下藝人自身安全，俾 Winkie打埋最近嘅一場，無論贏輸，都唔會再打落去！最緊要保住 Winkie塊面同手手腳腳，完完整整咁。」 Carol說。
惹火尤物
吳浩康前度唐紫睿（ Hazel），曾受男友影響學習泰拳，擁有 33C上圍的她唔只身材火辣，行為談吐亦相當惹火。
寸爆袁嘉敏
15年， Hazel參與電影《鴨王》，被袁嘉敏在微博暗寸她借位做新聞， Hazel即時還拖，指對方恃住自己是女主角，在片場經常黑面，又在 ig寫下：「我認為真正的明星，應該係一個真正值得人鍾意的人，品格言行態度才是最重要！」
撰文、攝影、攝錄：娛樂組
|
鍾意就快D Share啦！
|
|
|
