兜巴摑
李亞男爸爸交足戲，呢一幕兜巴摑祖藍，全程忍到笑，臨尾仲爆肚，果然潛質高。
娛樂偵訊
搞笑過女婿 王祖藍捧外父做接班人
有橋有諗頭的王祖藍，知人善任，成功幫了不少藝人上位，有指過檔邵氏開埋經理人部門的他，會將小巨肺林欣彤收歸旗下外，分分鐘捧埋自己外父。在內地狂賺人仔的王祖藍，睇中外父轉數快，於是翁婿拍住做真人騷，搞笑外父隨即在內地跑出，再下一城孖住拍網劇，繼續俾位上，有眼光的王祖藍銳意捧外父做接班人。
老新人價六位數
王祖藍拉埋外父（李群力）、外母（朱如翠）為江蘇衞視拍真人騷《女婿上門了》，意外發掘出外父潛藏的搞笑本能，更在內地爆發人氣，連同祖藍兩公婆合作的網劇《餓了別叫媽之走火入模》，廣告商亦點名要李亞男父母客串，食住人氣在劇中亮相幾分鐘，輕易袋到六位數字。
臨老入行，王祖藍外父發揮小宇宙。上週五（十二月十八日），祖藍兩公婆加埋外父外母，一家四口於西貢開工，主題是惡搞《匆匆那年》 MV；只見著住皮褸戴黑超，看來有點像高大版羅莽的外父，唔使女婿指導，一埋位，自動波搵位搞笑。
第一場戲要掌摑女婿，外父入鏡前先吸啖大氣紓緩緊張情緒，之後行埋祖藍兩公婆身邊，一手掃走枱上食物，跟住就兜巴星祖藍，臨尾再嚟爆肚動作，兩 take收貨，對比處男作真人騷《女婿上門了》，今次的表現簡直可以攞飛躍進步獎。
為李亞男拍劇
外父夠放，有小鳳姐氣質的外母一樣玩得！兩老陪祖藍癲，一家四口拍劇，賺人仔輕輕鬆鬆。
其實李亞男父母願意粉墨登場，主要目的是想借此機會，爭取和女兒見面。近年李亞男經常跟隨祖藍北上搵銀，兩老想見個女，幾乎要度期。「我哋想有多啲時間見到個女，拍嘢當家庭樂，當佢哋帶住我哋去玩！」王祖藍的外母說。
拍住搞笑女婿開工，外父外母都話冇壓力。「佢唔會俾我哋壓力，唔使睇劇本，祖藍叫我哋喊就喊，笑就笑。但有時一睇到佢，就忍唔住笑， NG多啲！」
捧邊個紅邊個
王祖藍從不獨食，過往曾帶挈過唔少藝人成功跑出，絕對有點石成金的本事。
撰文、攝影、攝錄：娛樂組
|
鍾意就快D Share啦！
|
|
|
