有亞視「新聞王子」之稱的鄧景輝今晨在寓所墮樓身亡，他當年在亞視的最佳拍檔、前女主播繆美詩，得悉噩耗後傷心不已，一提到這位前輩、好友兼好拍檔，都悲從中來多次哽咽。「Kelvin（鄧景輝）係一個帶畀人歡樂的人，形象都係嘻嘻哈哈，極度開朗，大家都覺得佢係一個好charm嘅人，最經典係佢嘅笑容。」繆美詩接受《蘋果》訪問時，多次以「Mr Good Man」、「超級友誼先生」、「超級歡樂先生」來形容鄧景輝，處處充滿陽光歡樂。繆美詩稱，當年她在外國大學畢業後加入亞視，可能與鄧景輝一樣由外國畢業，所以份外投契。「喺外國讀新聞番嚟，喺香港做新聞，當年真係唔多。佢對人好親切，無論你係一個小檸檬、小蕃薯或者係大明星，佢唔會因為對方係小蕃薯而唔同佢講嘢。」鄧景輝親切及平易近人的一面，給初出茅蘆的繆美詩留下深刻印象。「我入去（亞視）時，佢已經係新聞王子，但佢完全冇架子。」繆美詩稱，即使之後大家各有發展，各有各忙，但今年8月再因工作見面，鄧景輝的半個鬼仔及陽光性格依然未變。繆美詩憶稱，她97年加入亞視，99年開始跟鄧景輝一起拍檔主播新聞，合作兩年後對方離開亞視。在工作上，鄧景輝好有要求，但「佢唔會婆婆媽媽，唔係語重深長嘅人，而係好親切朋友，佢係一個好cheerful嘅人」；一起拍擋的日子中，最令繆美詩印象深刻的是99年颱風約克襲港，天文台掛起十號風球，「佢嗰日要出去採訪，畫面上佢吹到反艇」，另外一起報道千禧年亦印象難忘。「佢有佢好認真嘅一面，工作之外，佢係帶畀身邊朋友好歡樂，好親切、開朗嘅人，冇任何人想象到會發生...冇負面情緒，只有正能量，所有嘢係陽光。」繆美詩亦無法理解好拍檔的最後選擇，但她認為「大家記得佢經典開朗笑容」，所以認識他的幾代新聞從業員，過去只要鄧景輝「吹雞」，大家都會樂於出席聚會，理由是Kelvin「佢有咁嘅charm」。想睇最新消息？ 即時follow【現場－蘋果突發】fb！http://fb.com/applecitycrime
|
鍾意就快D Share啦！
|
|
|
