紀曉波同小蕊蕊玩騎膊馬，有男友幫手湊女，吳佩慈雙手插袋悠悠閒。
探熱針
吳佩慈添丁有獎勵 紀曉波交人陪過元旦
有九頭身少女之稱的台灣女星吳佩慈， 14年為富商男友紀曉波做未婚媽媽，誕下女兒小蕊蕊（ Hillary）後，去年 11月再誕下慈姑椗 Hans，湊成一個好字。
鮮有同女友孖咇出現公眾地方的紀曉波，上週五元旦日同吳佩慈帶埋囡囡到中環碼頭旁邊的嘉年華會玩，又讓餅印般的小蕊蕊騎膊馬，笑到見牙唔見眼。排隊入場人頭湧湧，紀曉波一手拖實吳佩慈，好細心。
雖然仔女都生埋，但吳佩慈冇名冇分，陰功豬！
出現媽媽手
一月一日元旦假期，中環 IFC商場人頭湧湧，戴白帽黑超加頸巾包到冚的吳佩慈，在人群中分外顯眼。為男友誕下慈姑椗不足兩個月，已經修身的吳佩慈篤住電話，跟住手抱女兒小蕊蕊的紀曉波，行向中環碼頭方向。
當日所見，陪住吳母和親友跟後的吳佩慈右手戴上護腕，估計是同豪嫂陳茵媺一樣，湊 B用錯力，出現「媽媽手」（筋膜炎）；至於有傳因為欠債被貼街招唱衰的紀曉波，抱住囡囡有講有笑，其間更將小蕊放上膊玩「騎膊馬」。
行到去嘉年華會入口附近，見周圍人多，紀曉波將囡囡交給吳母和親友代為照顧，自己就一手拖實吳佩慈，先行排隊買飛。
排隊半粒鐘
嘉年華會內多個機動遊戲，人龍都是見唔到尾，吳佩慈同紀曉波埋位排隊，吳母則負責帶住小蕊在附近四圍行，免得小朋友等太耐扭計。
等了足足半粒鐘，小蕊蕊終於玩到兒童機動韆鞦，已由九頭身少女變成九頭身索媽的吳佩慈，孖住男友搵有利位置，拎住電話為囡囡拍照；當小蕊蕊每次經過，二人都興奮揮晒手，流露有女萬事足的笑容，更氹得坐在韆鞦上的小蕊蕊，不時開心大叫！
從後熊抱打氣
之後轉場玩擲銀換公仔，被親友抱住的小蕊蕊親自出手，但年紀太細，全數落空。紀曉波決定落場幫囡囡掟個大公仔，一樣唔中！
其間，吳佩慈從後熊抱給男友打氣，開始引起現場遊人留意。「個女仔係咪明星嚟㗎？好似台灣嗰個吳佩慈喎！」原本專心擲銀的紀曉波於是提議轉去玩其他遊戲。一家三口玩了個多小時，傍晚六點才離開。
一三年未婚懷孕的吳佩慈講過，婚書會在女兒出世後補辦，如今再添慈姑椗，一樣都無聲氣！不時同國內花旦傳緋聞的紀曉波，更曾講明：生孩子可以，結婚不可能。長此下去，真的可能！
冇名分
成功搭上富商紀曉波的吳佩慈， 14年誕下女兒宣布收山退出娛樂圈，去年囝囝出埋世，依然無名無分，名副其實生仔機器。
15年 8月
懷有第二胎的吳佩慈，被網友發現與紀曉波到巴黎旅行，二人攬到實十分恩愛。
11月
擇吉時為紀曉波剖腹誕下慈姑椗，寶貝仔取名 Hans（漢斯），與吳佩慈早年去世愛犬一樣名。
撰文、攝影、攝錄：娛樂組
|
鍾意就快D Share啦！
|
|
|